Read Sukuma Bible 2015 – Bibilia Ilagano Lya Kale 2015 Kūfuma 25 Bible Online

Kūfuma 25 - Sukuma Bible 2015 – Bibilia Ilagano Lya Kale 2015 bible

Kūfuma 25

¹Ū SEEBA ūng'wīla ū Musa gīkī,

²“Bawīlage a Baisilaeli banenhele shakwinha. Ī shakwinha kūlwa nguno yane ūkūshanukūla kūfuma kū būlī munhū ūyo ng'holò yakwe īlīzunya.

³Ī shakwinha īsho ūkwanukūla kūfuma kūbo shikūbiza, zahabu, feza, shaba,

⁴būlūba būdosile bo langi ya būlulu, ya nzulunge na yaza; ūkwanukūla na kitaani, hamò na boya bo mbūli.

⁵Na ndīlī ja ng'ondi jidabbiwe mu langi yaza, makūnza ga mbūli,[20] mitī ya ng'wininga.[21]

⁶Na maguta ga mizeituni ga kūbakīja talà, shingīla sha kūsanja mu būbbani na mu maguta ga kūbitīīla batūmami.

⁷Na mawe ga oniki[22] na gangī ga mpango ntaale ga kūtūūlwa ha ifoodi[23] na ha kamfuko ka ha shikuba.[24]

⁸“Hanuma ya henaho ūbawīle banibeegeje ipandī lyeela, nayikala hamò nabo.

⁹Ī liheema nī shiseme shaamo ī shose, mukūlībeeja lībize gīt'ūmo nalīkoolekegeja gīkī.

¹⁰“Bakūbeeja isandīko lya mbawa ja ntī gwa ng'wininga, lya būlīhu bo sentimita igana n'ikūmi; ū būgalī galī sentimita makūmi mpungatī, nū būgūngūhu būbize sentimita makūmi mpungatī.

¹¹Hūna ūkūlībila zahabu yawiza ū mu gatī na a h'igūlya; hama ū mu mhelo mhelo ūkūlīpīndīlīja būlenji bo lūgala lo zahabu lūbeegije chiza.

¹²Ūkūsula na matendele anè ga zahabu, ūgadimanye ū kū magūlū galyo būnè wago; abīlī ī lipandī ī līmò nī lipandī ī līngī abīlī.

¹³Hanuma ūkūbeeja na mitī ībīlī ya ng'wininga yūbilwa zahabu.

¹⁴Ī mitī yenīyo ūkūsweng'ha ū mu matendele ayo gadaamīlījiwe a h'isandīko, kūlwa kūyūlībūūkīja.

¹⁵Īkūbiza ya kwikala ū mu matendele g'isandīko lyenīlo; ītī ya kwīnjiwa mo.

¹⁶Hūna a mawe ga būkaanīji ayo nalakwinhe ūkūgatūūla ū ng'wisandīko lyenīlo.

¹⁷Ūkūbeeja n'isumbī lya shigongo,[25] lya būlīhu bo sentimita igana n'ikūmi, ū būgalī galī walyo sentimita makūmi mpungatī; ūkūtūmamīla zahabu niza.

¹⁸Hanuma ya henaho ūkūbeeja makelubi abīlī ga zahabu ya kūsula, gabize a higūlya y'isumbī lya shigongo, ū kū mhelo būbīlī wajo.

¹⁹Ūbeeje ikelubi līmò ū kū lwandī ūlū, nū kū lwandī ū lūngī ikelubi līmò; a makelubi genayo ūkūgīīta gadimanile nī lisumbī lya shigongo ū kū mhandī būbīlī wajo.

²⁰Gakūbiza na manana gagagoloolile higūlya, gūūlīfīīkīja ī lisumbī lya shigongo na manana gago. Hama gabize gilolegije ū būshū, hūna gūūlola a hisumbī lya shigongo.

²¹Ū būkaanīji ūbo nalakwinhe ūkūbūtūūla ū ng'wisandīko, hanuma ī lisumbī lya shigongo lyenīlo ūkūlītūūla a higūlya y'isandīko.

²²Ū ng'wikanza lya kūyūmanhyja nang'ho nakūbiza ha gatī gatī ya makelubi ayo galī a h'isumbī lya shigongo, a higūlya y'isandīko lya būkaanīji, naakwinha pye a malange gane kūlwa Baisilaeli.”

²³“Hūna ūkūbeeja na meza ya ntī gwa ng'wininga, ībize na būlīhu bo sentimita makūmi kenda, ū būgalī galī sentimita makūmi atanò, ū būgūngūhu wayo sentimita makūmi mpungatī.

²⁴Hanuma wībile zahabu niza, ū mu mhelo mhelo wīpīndīlīje būlenji bo zahabu ībūmbile chiza.

²⁵Hūna wīpīndīlīje lūgala lo būgalī galī bo kūbiza gītī shiganza sha munhū, ū lūgala lwenūlo ūlūtūūlīle būlenji bo zahabu kūlūpīndīlīja ū lose.

²⁶Ūkwībeegeja matendele anè ga zahabu, ūgadimanya ū kū magūlū gayo ī meza būnè wago.

²⁷A matendele genayo gakūbiza bbihī nalo ū lūgala, ga nīmo gwa kwīlang'hana ī mitī ya kwībūūkīja ī meza.

²⁸Ī mitī ya kwībūūkīja ī meza wībeeje ya ng'wininga, hūna yūbilwa zahabu.

²⁹Ūkūbeeja na sahani, shijiko, nungū na mabakuli kūlwa shitambò sha kwitwa; ī shose shenīshi shibeejiwe kūfuma mu zahabu niza.

³⁰A ha meza ūkūtūūla na migatī ya koolechiwa; īyo īkūbiza kū būtongi wane būlī lūshikū.

³¹“Hūna ūkūbeeja n'ikīndīkīlo lya talà, lya zahabu niza; lībize lya kūsula. Ī shidako shalyo nū nshigītī gwalyo shisulanījiwe hamò nī shikombe shalyo, nī shitūlī nū bonji.

³²A h'ikīndīkīlo lya talà gafume ho matambī atandatū, adatū ī lipandī ī līmò, nī lipandī ī līngī adatū.

³³Ī litambī ī līmò lībize na shikombe shidatū sha kwikola bonji wa mulozi, hamò na shitūlī na būlabo, nī lya kabīlī lībize nasho shidatū; pye na a gangī, a gose būtandatū wago ayo gafumile a h'ikīndīkīlo lya talà gabize gīko.

³⁴Ū nshigitigi gw'ikīndīkīlo lya talà gwenūyo shibize ho shikombe shinè sha kwikola na bonji wa mulozi, hamò na shitūlī na būlabo.

³⁵A ha sīlīlī ya būmanhījo bo matambī galyo a ga kwandya, shibize ho shitūlī shimò, na a ha sīlīlī ya matambī a ga kabīlī shitūlī, na a ha sīlīlī ya matambī a ga kadatū; pye a matambī būtandatū wago gatang'anhīle.

³⁶Ī shitūlī na a matambī gakūbiza gabeejiwe kūfuma mu zahabu niza, gasulanījiwe hamò nī likīndīkīlo lya talà, shibize shikolo shimò.

³⁷Hanuma ya henaho ūkūjibeeja ī talà jaho ījo mpungatī, ūjitūūle ho jiyūtwima ū kū būtongi w'ikīndīkīlo lya talà.[26]

³⁸A majimījo ga talà jalyo nī sahani jaho, ī shose shibize sha zahabu niza.

³⁹Īkūtūmama zahabu niza ya būdito bo talanta īmò, ū kūlībeeja ī likīndīkīlo lya talà lyenīlo, nī shikolo shalyo ī shose.

⁴⁰Na lūūlū lang'hanaga, nguno īkwigeleelilwe ūshibeeje kūlenganīla nū mumo ūkoolekegejiwa ū mu lūgūlū.”