Read Sukuma Bible 2015 – Bibilia Ilagano Lya Kale 2015 Kūfuma 26 Bible Online

Kūfuma 26 - Sukuma Bible 2015 – Bibilia Ilagano Lya Kale 2015 bible

Kūfuma 26

¹Hanuma ya henaho ūkūbeeja ipandī lya kwikala, lībize lya matundubaali ikūmi, ga kitaani īdosilwe chiza na būgaliili; hamò na būlūba būdosilwe bo langi ya būlulu na ya nzulunge na yaza; na makelubi gasumīīlilwe ū mu matundubaali genayo, gabeejiwe na koolī wa nīmo gwenūyo.

²A matundubaali genayo gabize ga būtaale būlenganīlile, būlī lyene lya būlīhu bo makono ikūmi na nibudīka, ū būgalī galī mkono gumò na sentimita makūmi anaane.

³Atanò ga matundubaali genayo gadimanījage hamò, na a gangī ay'atanò nago ūgadimanīje hamò.

⁴Itundubaali līmò lya kū mhelo ū mu atanò a ga kwandya ūkūlītūūlīla ū kū mhelo ya hanze, ngoye ja chūūlū ja langi ya būlulu, nū kwitundubaali ī lya kū mhelo ū kū atanò a gangī, wīte gīko.

⁵Itundubaali līmò ūkūlītūūlīla ngoye makūmi atanò ja chūūlū; nī litundubaali ī lya kū mhelo ū kū atanò a gangī, ngoye makūmi atanò ja chūūlū; a mapandī ayo galī na ngoye ja chūūlū gilolele.

⁶Hūna ūkūbeeja na madimanīgījo makūmi atanò ga zahabu, kūlwa kūgadimanya a matundubaali genayo, ī lipandī lya kwikala lībize līmò.

⁷Hanuma ya henaho, ī lipandī lya kwikala ūkūbeeja ikundīkījo; ūlyīte lya matundubaali ikūmi na līmò, ga boya bo mbūli.

⁸A matundubaali genayo a gose gabize ga būtaale būlenganīlile, ū būlīhu makono ikūmi na ni budīka, ū būgalī galī mkono gumò na sentimita inaane.

⁹Atanò ūkūgadimanīja lībize līmò, na ay'atandatū nago ūgadimanīja lyūbiza līmò, ī lya katandatū ūkūlīgonda kabīlī a ha būtongi w'iheema.

¹⁰Ī litundubaali lya kū mhelo ū kū ga kwandya ayo gadimanyiwe hamò, ūkūlītūūla ngoye makūmi atanò ja chūūlū ū kū mhelo mhelo yalyo; nī litundubaali lya kū mhelo ya ga kabīlī ayo gadimanyiwe hamò, ūkūlyītīla gīko.

¹¹Hanuma ūkūbeeja na madimanīgījo makūmi atanò ga shaba, ayo ūlagabītye ū mu ngoye ja chūūlū, kūlwa kūlīdimanya ī likundīkījo lībize līmò.

¹²Alīyo ī shipande īsho shikūsaagīīla ū mu matundubaali g'ikundīkījo, libudika lyi tundubaali īyo īlasaagīīle, īkūbiza ya kūningeela ū kū numa y'ipandī lya kwikala.

¹³Ū būlīhu wa matundubaali g'ikundīkījo būkūbiza būkīlanīgije; shikūsaagīīla shipande sha būgalī galī bo sentimita makūmi atanò ū lwandī ūlū nū lwandī ū lūngī, hūna shūningeela kūlīkundīkīja ī lipandī lya kwikala.

¹⁴Ūkūbeeja ikundīkījo lya makūnza ga ng'ondi gadabbiwe mu langi yaza, kūlwa kūlīkumba ī likundīkījo lya h'ipandī lya kwikala, na a h'igūlya yalyo ī lyenīlo ūkūtūūla hangī ikundīkījo lya makūnza ga mbūli.

¹⁵Ūkūbeeja na mīīmīlīkījo ga mbawa ja ng'wininga, kūlwa kūlyīmīlīkīja ī lipandī lya kwikala.

¹⁶Būlī lyīmīlīkījo lībize na būlīhu wa mita inè na nusu, na būgalī galī wa sentimita makūmi mpungatī.

¹⁷Hūna būlī lyīmīlīkījo lībize na magūlū abīlī gihelile; a mīīmīlīkījo a gose a ga kūlyīmīlīja ī lipandī lya kwikala ūkūgabeeja galī gīko.

¹⁸Ūkūbeeja mīīmīlīkījo makūmi abīlī a ga kū lwandī lwa dakama y'ipandī lya kwikala.

¹⁹Hanuma ūlabeeje na shidako makūmi anè sha chūma sha feza, sha kūtonga a ha sīlīlī ya mīīmīlīkījo genayo, būlī lyīmīlīkījo lībize na shidako shibīlī; būlī gūgūlū na shidako shimò.

²⁰Nū lwande ū lūngī ū lw'ipandī lya kwikala, ū lwa sukuma, nalo ūkūlūbeegeja mīīmīlīkījo makūmi abīlī.

²¹Ūkūbeeja hangī na shidako makūmi anè sha chūma sha feza, būlī lyīmīlīkījo lībize nasho shibīlī a ha sīlīlī yalyo.

²²Ī lipandī lya kwikala ūkūlībeegeja mīīmīlīkījo atandatū ū kū lwandī ū lūngī, ū lwa ng'weli.

²³Ī koona ja kū lwandī lya kū numa ūkūjibeegeja mīīmīlīkījo abīlī būlī hene.

²⁴Hū kūhaya a ha koona būbīlī wajo, a hitina ū mu sīlīlī, gakūkīndīkwa ho mīīmīlīkījo abīlī bīlī, gīmīīla gihelile gūūkadimanyiwa n'itendele līmò ū kwigūlya; a gose būbīlī wago gakūbiza gīko.

²⁵Na lūūlū gakūbiza ho mīīmīlīkījo anaane, na shidako ikūmi na shitandatū; būlī lyīmīlīkījo shidako shibīlī.

²⁶Hanuma a mīīmīlīkījo ga kūlyīmīlīkīja ī lipandī lya kwikala, ūkūgabeegeja na ngito ja mbawa ja ntī gwa ng'wininga, kūlwa kūgadimanīja, ī ja lwandī ū lūmò ūkūbeeja itanò,

²⁷nī ja lwande ū lūngī itanò. Na a mīīmīlīkījo ga kū lwandī lwa kū numa y'ipandī lya kwikala, ū lwa kū ng'weli, nū kwene ngito itanò.

²⁸Ū lūgito lwa ha gatī gatī ya mīīmīlīkījo lūkūbiza lwa kūpulung'hanya, kwīngīīla kū wandījo kūshisha kū būkalīkījo.

²⁹A mīīmīlīkījo genayo ūkūgabila zahabu, ūbeeje na matendele ga zahabu ga kūjidimīīla ī mbawa ja magito. Nī joi ī mbawa ī ja magito ūkūjibila zahabu.

³⁰Ī lipandī lya kwikala ūkūlībeeja lībize lya kūlenganīla nī mbika īyo oolekejiwe ū bebe mu lūgūlū.

³¹Ūkūbeeja itundubaali lya būlūba bo langi ya būlulu na ya nzulunge na yaza, na kitaani īdosile chiza, na makelubi gasumīīlilwe mo ū ng'witundubaali lyenīlo, gabeejiwe na koolī wa nīmo gwenūyo.

³²Hūna līkūningelejiwa na malobò ga zahabu ha ng'hīngī inè ja ntī gwa ng'wininga, najo jibilwe zahabu; jīmīīle ha shidako sha chūma sha feza.

³³Ī litundubaali lyenīlo ūkūlīningeleja na madimījo, hūna ī lisandīko lya būkaanīji ūkūlītūūla ū kū mpīndo y'itundubaali lyenīlo, ī litundubaali lyenīlo līkūlekanya a ha gatī y'ipandī Lyeela, nī lipandī Lyeela no no no.

³⁴Ī Lisumbī lya shigongo ūkūlītūūla ng'wipandī Lyeela no no no, a higūlya y'isandīko lya būkaanīji.

³⁵Ī meza yene ūkwītūūla hanze y'isenge, lwandī lwa sukuma, ū ng'wipandī lya kwikala; hūna ī likīndīkīlo lya talà ūlītūūla ha dakama yaho, shiihela.

³⁶Ū nyango gwa kwingīlīla ū ng'wiheema, ūkūgūbeegeja itundubaali lya būlūba bo langi ya būlulu na ya nzulunge na yaza, na kitaani īshibanyiwe chiza mu būgaliili būtaale; gūbize nīmo go ng'wa koolī ntaale.

³⁷Ī litundubaali lyenīlo ūkūlībeegeja ng'hīngī itanò ja ntī gwa ng'wininga jilī na malobò ga zahabu, najo ūkūjibila zahabu. Hanuma ūjibeegeja shidako shitanò sh shaba.