Read Sukuma Bible 2015 – Bibilia Ilagano Lya Kale 2015 Kūfuma 27 Bible Online

Kūfuma 27 - Sukuma Bible 2015 – Bibilia Ilagano Lya Kale 2015 bible

Kūfuma 27

¹“Hanuma ūkūzenga ng'walīlò gwa ntī gwa ng'wininga, gūbize na būgūngūhu wa mita īmò na sentimita makūmi adatū. Ū būgalī galī būbize mita ibīlī na sentimita makūmi adatū, nū būlīhu mita ibīlī na sentimita makūmi adatū.

²A ha koona būnè wajo ūkūtūūla ipembe būlī hene; ī lipembe lyūdimana nū ng'walīlò, shūbiza shikolo shimò, hūna ū ng'walīlò ūgūbile shaba pyī ū gose.

³Pyī ī shiseme sha kūtūmamīla hoi ūkūshibeeja sha shaba, shikolo gītī, mayoolelo ga mabu, makolelo, mabakuli, uma ja kūsabūlīla nyama, na a maahulīlo ga moto.

⁴Ūkūgūbeegeja na lweyo lwa chūma sha shaba shishibanije gītī ntego, na matendele ga shaba ga kūtūūla a ha koona ja lweyo būnè wajo; būlī hene līmò.

⁵Ū lweyo lwenūlo ūkūgūbeegeja ha kūsweng'hwa ū mu sīlīlī ya ng'walīlò, a ha gatī gatī ya ng'walīlò.

⁶Hanuma ū ng'walīlò ūkūgūpūnzīla mitī ībīlī ya ng'wininga, wībila shaba.

⁷Ī mitī yenīyo īkūbītiwa ū mu matendele, īgūtūūle ha gatī ū ng'walīlò kūlwa kūgūbūūkīja.

⁸Ū ng'walīlò gwenūyo gūkūbiza gwa mbawa, gūlī na mhembo ū mu gatī; shiigelile gūbeejiwe gīt'ūmo ūkoolekegejiwa mu lūgūlū.”

⁹“Hanuma ī lipandī lya kwikala lībeegejage gwalugwa, īpīndīlījiwe lūūba. Ū kū lwande lwa dakama lūbize lwa būlīhu bo mita makūmi anè n'itandatū, lwa matundubaali ga būlūba bo kitaani īdosilwe chiza;

¹⁰Ī ng'hīngī jibize makūmi abīlī, jilī na malobò na magwasījo ga feza; ī shidako shaajo shibize sha shaba, nasho makūmi abīlī.

¹¹Nū lwande lwa sukuma lūkūbiza na būlīhu bo mita makūmi anè n'itandatū; nū kwene a matundubaali gabize ga būlūba bo kitaani būdosilwe chiza; nī ng'hīngī jibize makūmi abīlī, jilī na malobò na magwasījo ga feza; nī shidako shaajo shibize sha shaba, nasho makūmi abīlī.

¹²Ū lwande lwa ng'weli ū kū būgalī galī wayo ī gwalugwa, ū lūūba lūkūbiza lwa mita makūmi abīlī n'idatū; gakūbiza ko matundubaali na ng'hīngī ikūmi, na shidako shaajo ikūmi.

¹³Nū kū būgalī galī bo kū būfuma līīmi, ū kū lwande lwa kīya ya gwalugwa, būkūbiza mita makūmi abīlī n'idatū.

¹⁴A ha kwingīlīla, ī lipandī ī līmò līkūbiza na matundubaali ga būlīhu bo mita itandatū na nusu, na ng'hīngī idatū, hamò na shidako shaajo shidatū.

¹⁵Nī lipandī ī līngī līkūbiza na matundubaali ga būlīhu bo mita itandatū na nusu, na ng'hīngī idatū, hamò na shidako shaajo shidatū.

¹⁶A ha mita gwa kwingīlīla ū mu gwalugwa, ūkūtūūla ho itundubaali lya būlīhu bo futi makūmi adatū; lībize lya langi ya būlulu, nzulunge na yaza, hamò na būlūba bo kitaani būdosilwe chiza na koolī wa nīmo gwenūyo; jibize ho na ng'hīngī inè, na shidako shaajo shinè.

¹⁷Ī ng'hīngī pyī ījo jīpīndīlīgije ī gwalugwa hose hose, jikūbiza na malobò hamò na magwasījo ga chūma sha feza, na shidako sha shaba.

¹⁸Ī gwalugwa īkūbiza na būlīhu bo futi igana na makūmi atanò, ū būgalī galī wayo būkūbiza na futi makūmi mpungatī n'itanò. A matundubaali ga lūūba lwa kwīpīndīlīja, ū būlīhu wago ū kūja ū ng'wigūlya gakūbiza ga futi mpungatī na nusu. Ī shidako sha ng'hīngī shikūbiza sha shaba.

¹⁹Pyī ī shikolo ī shingī īsho shikūtūmama ū mu milīmo ya ng'wipandī lya kwikala shibize sha shaba; nūūlū shikabiza shilī na nīmo hīmba gwa mbika kī; nūūlū jibize mambo ja h'iheema, nūūlū ja kūtūmamīla ha gwalugwa.”

²⁰“Balagīlage a Baisilaeli kūkwenhela maguta gawiza ga mizeituni; ga kūyūtūūla mu talà, ī talà jiyikala jikūbakaga būlī gwa.

²¹Ū Alooni na a bitūnja bakwe bakūbiza na nīmo ū ng'wiheema lya kwibilingīla, ī hanze y'isenge īlo līlī kū būtongi w'isandīko lya būkaanīji. Ū nīmo gwabo gūkūbiza gwa kūjilang'hana ī talà, jikale jikūbakaga kū būtongi bo ng'wa SEEBA, kwandīja mhīndī kūshisha ntondo yaho dilū. Ū mhayo gwenūyū gūkūbiza shilagīlo sha būja na būja ū kū shibayalīlwe na shibyalīlwe sha Baisilaeli.”