Read Sukuma Bible 2015 – Bibilia Ilagano Lya Kale 2015 Kūfuma 29 Bible Online

Kūfuma 29 - Sukuma Bible 2015 – Bibilia Ilagano Lya Kale 2015 bible

Kūfuma 29

¹Ū mu kūbīītabeejà gīkī banitūmamīle nīmo gwa būgabīji, ūkūbabeegeja mihayo yīyī, ūkūsola nzagamba īmò mūūga, na ng'ondi ibīlī; ī jose jibize jitī na shilingo.

²Hanuma ūkūsola būsu būnogu bo ngano, būtī na shibimbya; hūna ū kūfuma ū mu būsu wenūbo, ūkūbeeja migatī na keki jisangije maguta, na migatī mikalamuku ībililwe maguta.

³Ī shose shenīsho ūkūshitūūla mu shigabbu, hūna ūshenhe hamò nī nzagamba nī ng'ondi īj'ibīlī.

⁴Hūna ū Alooni na a bitūnja bakwe ūkūbenha ū kū nyango gwa kwingīlīla ng'wiheema lya kwibilingīla, ūbooje na minzī.

⁵Hanuma ya henaho ūkūshisola ī shizwalo ūnzwalīkīje ū Alooni, ī ligoodi, nī ng'hanjo ya kūzwalwa higūlya ya kagoodi ka makono maguhī, na a kagoodi ka makono maguhī, na a kamfuko ka ha shikuba. Ū mu nkīmbīlī gwakwe ūkūgūntunga na ngwasho, ūyo gūbeejiwe na būgaliili būtaale kūlwa kagoodi ka makono maguhī.

⁶Hūna ūkūntūūlīla ī lihima ū kū ntwe gwakwe, nī libalala lya zahabu ūlītunga a h'ihima.

⁷Hanuma ya henaho ūkūgasola a maguta ga kūntūūla ha nīmo, ūng'witīīla ū kū ntwe gwakwe.

⁸Na a bitūnja bakwe ūkūbenha ūbazwalīkīje būlī ng'wene igoodi lya mabala mabala,

⁹na shitambaala ū kū mitwe yabo. Hanuma ya henaho ū Alooni ūkūntunga ngwasho; na a bitūnja bakwe, būlī ng'wene ngwasho gwakwe. Kwīngīīla ikanza lyenīlo, ū būgabīji wabizaga wabo shikū jose, kūlwa shilagīlo sha būja na būja. H'ūmo ūkūntūūlīla ū Alooni na a bitūnja bakwe a ha nīmo.

¹⁰Hanuma ī nzagamba ūkwīyenha kū būtongi w'iheema lya kwibilingīla, ū Alooni na a bitūnja bakwe bakūtūūla a makono gabo a ha ntwe gwayo.

¹¹Ī nzagamba yenīyo īkūsīnzīlwa ha nyango gwa kwingīlīla ū ng'wiheema lya kwibilingīla, kū būtongi bo ng'wa SEEBA.

¹²Ū mu mininga ga nzagamba yenīyo, ūkūgasola magehu ūgabilīje na makono gako a ha mapembe ga ng'walīlò. Ayo galasaage gitage hasī, a ha sīlīlī ya ng'walīlò.

¹³Hanuma gasolage pye a masazu ayo gakundīkīgije sha mu nda; gītī ayo galīpīndije ī litīma, nī mhīgo būbīlī wajo, hamò na a maguta ayo gajikundīkīgije; pyī ī shenīsho shipembage mu moto ha ng'walīlò.

¹⁴Alīyo ī nyama ī yīngī ī ya nzagamba yenīyo, nī likūnza lyayo, pyī nū būūshi, shene sha kūpemva mu moto, hanze ya ng'hambī. Ī shenīshi shilī shitambò kūlwa shibi.

¹⁵Hanuma ū mu ng'ondi īj'ibīlī, ūkwīsola īmò yajo, ū Alooni na a bitūnja bakwe bakūtūūla a makono gabo a higūlya ya ntwe gwayo;

¹⁶hūna ūkwīsīnza, a mininga gayo ūkūgasola ūgaseeseebele a ha ng'walīlò koose koose.

¹⁷Ī ng'ondi yenīyo ūkwībbutagūla mapingili mapingili, ī sha mu nda ūkūshooja, pyī nī chūūga, hūna ūshitūūla hamò na a mapingili a gangī nū ntwe.

¹⁸Hanuma ūkwīpemba ha ng'walīlò īnogotele gete pyī ī ng'ondi yenīyo. Ī shenīsho shilī shitambò sha kūpemva, kūlwa kwenha ng'waso gwawiza, gwa kūnyeja SEEBA; shilī shitambò sha kūfunījiwa SEEBA mu nzīla ya moto.

¹⁹Hūna ūkwīsola nī ng'ondi ī yīngī, ū Alooni na a bitūnja bakwe batūūle a makono gabo a ha ntwe gwayo.

²⁰Īkūsīnzwa, hūna ū bebe ūsole mininga gayo gamò, ūgabile a ha gūtū gwa būlyo go ng'wa Alooni, na a ha matū ga kū nkono gwa būlyo a ga bitūnja bakwe, na a h'ikuulume lya nkono gwa būlyo gwa būlī ūmò wabo; na a h'ikuulume lya kū gūgūlū gwa būlyo. Nū ng'walīlò ūkūgūseeseebela mininga koose koose.

²¹Hanuma ūkūsola mininga kwīnga a ha ng'walīlò, ūsola na maguta magehu, a ga kūbitīīla bagabīji, ūnseeseebele ū Alooni nī shizwalo shakwe, na a bitūnja bakwe nī shizwalo shabo nabo. Ū wei na a bitūnja bakwe bakwejiwa mu gīko, nī shizwalo shabo.

²²A mazezele ga ng'ondi yenīyo ūkūgasola, nī likīla lyayo ī lizezemu, pye na a masazu ayo gakundīkīgije sha mu nda; gīt'ayo galīpīndije ī litīma, nī mhīgo būbīlī wajo, hamò na a maguta ayo gajikundīkīgije, nī litango lya kū nīīla. Ī ng'ondi yenīyo īlī y'ikanza lya kūtūūlwa ha nīmo.

²³Ū kūfuma ū mu shigabbu sha migatī īyo ītī na shibimbya, īyo īlī kū būtongi bo ng'wa SEEBA, ūkūsola ngatī gūmò na keki īsangije maguta, hamò na ngatī nkalamuku.

²⁴Pyī ī shenīshi ūkūshitūūla mu makono ga ng'wa Alooni na bitūnja bakwe, bashiyengeeje kū būtongi bo ng'wa SEEBA, nguno shilī shitambò sha kūyengeejiwa.

²⁵Hanuma ūkūshisola ū mu makono gabo ūshipembe a ha ng'walīlò, hamò nī shitambò sha kūpemva kūlwa ng'waso gwa kūnyeja SEEBA; ī shoi shilī shitambò sha kūmfunīja SEEBA mu nzīla ya moto.

²⁶Ī shiguuku sha ng'ondi ya kūtūūlwa Alooni ha nīmo ūkūshisola ūshiyengeeje kū būtongi bo ng'wa SEEBA, shibize shitambò sha kūyengeejiwa; ū gwenūyo ngabo gwako.

²⁷Ī nyama ja ng'ondi ya kūtūūlwa ha nīmo ījo jiigeleelilwe kūbiza ja ng'wa Alooni na bitūnja bakwe, jeejage, ī shiguuku īsho shamalaga kūyengeejiwa, nī litango īlo lyafunyiagwa.

²⁸Ū gwenūyū hū gūkūbiza ngabo gwa būlī lūshikū kūlwa ng'wa Alooni na bitūnja bakwe kūfuma kū Baisilaeli. Kalī kafunīje ka Baisilaeli ako bakūmfunīja SEEBA kwīnga mu shakwinha shabo sha būsangī.

²⁹Ī shizwalo sheela, ī sha ng'wa Alooni shikūbiza sha kūtūmamīlwa na banhū ba shibyalīlwe shakwe. Bakūyūshizwala h'ikanza lya kwitīīlwa maguta kūlwa kūtūūlwa ha nīmo.

³⁰Ū ng'witūnja wakwe ūyo alatūūlwe ha nīmo a ha ng'wanya gwakwe, ūlū wingīla ū ng'wiheema lya kwibilingīla kwiza kūtūmama ū ng'wipandī lyeela, akūshizwala shikū mpungatī.

³¹Ī nyama ya ng'ondi ī ya kūtūūlwa ha nīmo ūkwītwala kwipandī lyeela īkazugwe.

³²Alooni na bitūnja bakwe bakwīlya ī nyama yenīyo nī migatī īyo īlī mu shigabbu; bakūbiza ha nyango gwa kwingīlīla ng'wiheema lya kwibilingīla.

³³Bakūshilya ī shakwinha īsho shatūmamaga nīmo gwa kūtūūla būsangī h'ikanza lya kwejiwa na kūtūūlwa kwabo ha nīmo. Alīyo atīho ūngī ū wa kūshilya, nguno shilī sheela.

³⁴Ūlū yūshiiga nyama yose yose ī ya ng'ondi ya kūtūūlwa kwabo ha nīmo, nūūlū ngatī gwaho gūshiiga kūshisha ha ntondo dilū, shipembage mu moto. Shitigelile kūlyiwa, nguno shilī sheela.

³⁵Pyī īyo naakūlagīlaga kwīta kūlwa ng'wa Alooni na a bitūnja bakwe bīītīlage. Ū nīmo ū gose ū gwa kūbīīta babize beela, gūkūsola ikanza lya shikū mpungatī.

³⁶Būlī lūshikū ūkūfunya nzagamba īmò kūbiza shitambò kūlwa shibi, nguno ya kūtūūla būsangī. Ū ng'walīlò ūkūgwīngīja ū būsoso mu nzīla ya kūgwītīla isangī, hama ūkūgweja mu nzīla ya kūgwitīīla maguta.

³⁷Ikanza lya shikū mpungatī ūkūgwītīla isangī ū ng'walīlò, na lūūlū ūkūgweja mu gīko, hū gūkūbiza ng'wela no no no ū ng'walīlò; būlī shose īsho shūgūkuumya shikūbiza sheela.

³⁸Ī shikolo īshi ūkūyūfunya būlī lūshikū a ha ng'walīlò, Ng'holo ibīlī ja myaka ībīlī būlī yene;

³⁹Īmò ūkwīfunya dilū, yīngī mhīndī.

⁴⁰Ūlū ūlīfunya ī ya kwandya, ūkūfunya na kilo īmò ya būsu būnogu, na lita īmò ya maguta ga kūkang'wa kūfuma mu matwajo ga mizeituni; na lita īmò ya divai; ī shenīshi shibize shakwinha sha kūng'wiwa.

⁴¹Ī ng'holo ī yīngī ūkwīfunya shitambò makanza ga mhīndī, hamò nī shakwinha sha būsu, nī shakwinha sha kūng'wiwa gīt'ūmo īlī ī ya dilū, kūlwa ng'waso gwawiza; shilī shitambò sha kūmfunīja SEEBA mu nzīla ya moto.

⁴²Ū gwenūyū gūkwītwa na banhū ba shibyalīlwe shose, nī shisho shikūlondeela hanuma. Ī shakwinha sha kūpemva mu moto shenīshi, shikūyūfunyiwa būlī lūshikū kū būtongi bo ng'wa SEEBA a ha nyango gwa kwingīlīla ng'wiheema lya kwibilingīla. Hū nakūyūmanhīja nang'ho henaho nayomba nang'ho.

⁴³Na a Baisilaeli nakūyūmanhīja nabo henaho, nīyo ī lipandī lyenīlo līkūbiza lyeela kūlwa nguo y'ikūjo lyane.

⁴⁴Na lūūlū nakūlyeeja ī liheema lya kwibilingīla, pyī nū ng'walīlò nakūgweja; nū Alooni nakūng'weja hamò na a bitūnja bakwe, banitūmamīle nīmo gwa būgabīji.

⁴⁵Hūna nakwikala hamò nabo a Baisilaeli, nabize Mulungu wabo.

⁴⁶Bakūdeeba gīkī ū nene hū nalī SEEBA Mulungu wabo, ūyo wabīnja mu Misili gīkī nikale hamò nabo, nene ng'wenekīlī SEEBA Mulungu wabo.