Read Sukuma Bible 2015 – Bibilia Ilagano Lya Kale 2015 Kūfuma 33 Bible Online

Kūfuma 33 - Sukuma Bible 2015 – Bibilia Ilagano Lya Kale 2015 bible

Kūfuma 33

¹Hanuma ū SEEBA ūng'wīla ū Musa, “A banhū abo wabenhile kūfuma Misili benaba bīnjage a h'ipandī lyenīlī, ūje nabo ū kū sī īyo naabisagīja ba Abulahamu, Isaka na Yakobo; nūbilahīlīla nalīhaya gīkī, ‘Nakūbinha banhū ba shibyalīlwe shing'we.’

²Nakūtūma malaika atonge ko kūbapeeja a Bakanaani, Baamoli, Bahītī, Bapelizi, Bahīvī na a Bayebusi.

³Jagi ū kū sī yenīyo, sī ya būhondo. Kwike ū nene natūja hamò ning'we, natizūmukenaagūlīla mu nzīla, nguno mulī banhū ba mitwe midiimu no.”

⁴A banhū aho bīyiigwa ī mihayo ya kūsaatya yenīyī bakapīnīhala no, bandya kūlīla ng'hūngū, na atigelile nūūlū ūmò wabo wa kūshizwala ī shizwalo shabo ī sha būlenji.

⁵Nguno ū SEEBA akang'wīla ū Musa, “Bawīlage a Baisilaeli gīkī, ‘A bing'we mulī banhū ba mitwe midiimu no. Ū nene ūlū nūja hamò ning'we nūūlū ikanza iguhī dūhū, nashikile kūmukenaagūla; na lūūlū ī haha zuulagi ī shizwalo shing'we sha būlenji, hū nakūbona ī ya kūng'wītīla.’”

⁶A Baisilaeli būshizuula ī shizwalo shabo sha būlenji aho balī kū lūgūlū lwa Holebu.

⁷Ū Musa walī na shīmīle sha kūsola iheema wakalīkoma hanze ya ng'hambī, ha mhūjo; litanagwa “Iheema lya kūmanhīja.” Ose ose ūyo walī na ng'hūmbū ja kūbūūja mhayo kūlī SEEBA wajaga ū kwiheema lya kūmanhīja, ī hanze ya ng'hambī.

⁸Hama būlī ikanza ū Musa ūlū ūbūūka kūja ī hanze, ū kwiheema lya kūmanhīja, pye a banhū bīmīīlaga ha milyango hanze ya maheema gabo, bang'wiloleela ū Musa kūshisha wingīla ū ng'wiheema lyenīlo.

⁹Ū Musa ūlū wingīla ū ng'wiheema, ī ng'hīngī y'ilunde yikaga yalembeela a ha nyango, ū SEEBA wahoya nū Musa.

¹⁰Būl'ikanza a banhū ūlū bībona ī ng'hīngī y'ilunde īlembeelile a ha nyango, a bose bīmīīlaga baalamya, būlī ng'wene ha nyango gw'iheema lyakwe.

¹¹Ū SEEBA walūngalūngaga nū Musa būshū kū būshū, gīt'ūmo munhū akalūngalūngīlaga na nwani ng'wiye. Hanuma ya henaho ū Musa washokaga ū kū ng'hambī, alīyo ū ngunanhi wakwe ū Yoshwa walī atīngaga ū ng'wiheema.

¹²Ū Musa ūng'wīla ū SEEBA, “Ūlīniwīla gīkī, ‘Batongeelage a banhū benaba,’ alīyo ūtaalī ū kūnilanja ūyo ūlīntūma aje hamò nane, nūūlū īkī ūkūniwīlga gīkī, ‘Nakūmanile ī lina lyako, nīyo ūlī nganja ū kūlī nene.’

¹³Ūlū nalī nganja ū kūlī bebe nilangage ī nzīla jako, nakwiteleje ūmo ūlī gete; hū nakongeja ū kūbiza nganja ū kūlī bebe. Izūkagwa gīkī ī lihanga lyenīlī līlī lya banhū bako.”

¹⁴Ū SEEBA ūnshokeja, “Nakūbiza hamò nang'ho ūko ūlīja, nīyo nakūkwinha kwifuula.”

¹⁵Ū Musa ūhaya, “Ūlū ūtūbiza hamò nane, ūtizūtwīnja a henaha.

¹⁶Ī gīsī ūlū ūtajile hamò nise, gūkūmanīka kinehe ū gwa gīkī ūniyegelile ū nene, hamò na a banhū bako? Mhayo kī gūngī ūyo gūdūgije koolecha gīkī ū nene na a banhū bako, tūlekanile nago pye a mahanga ga banhū bangī abo balī mu sī?”

¹⁷Ū SEEBA ūng'wīla ū Musa, “Ū mhayo ūyo ūlīgūlomba nakūgwīta, nguno ūlī nganja ū kūlī nene, hama nīyo nakūmanile gete nī lina lyako.”

¹⁸Hūna ū Musa ūng'wīla, “Nalīkūlomba ūnoolekeje ī likūjo lyako.”

¹⁹Nang'hwe ū SEEBA ūng'wīla, “Nakūwīta pyī ū wiza bone būbīte ū kū būtongi wako, nī lina lyane ī lya SEEBA nakūlīkumūcha ū kū būtongi wako. Ū nene nakūnchīla shigongo ūyo nalanchīle shigongo, na nakūnsaatwa ūyo nalansaatwe.”

²⁰Ū SEEBA ongeja kūng'wīla, “Kwike ūtīko kūbūbona ū būshū bone, nguno atīho wa kūnibona alīyo wikala mpanga.”

²¹Hūna ū SEEBA ūng'wīla, “Ūkwīmīīla h'itale līlī h'ipandī ilebe bbihī na a haho nalī.

²²Ī likūjo lyane ūlū līlībīta, ū bebe nakūkūtūūla ng'wihalo ly'itale nakūkundīkīje na nkono gwane kūshisha nabīte.

²³Hanuma ya henaho nakūkwīngīja ū nkono gwane ūnibone ū ngongo gwane; alīyo ū būshū wane būtīko ū kūbonwa.”