Read Sukuma Bible 2015 – Bibilia Ilagano Lya Kale 2015 Kūfuma 34 Bible Online

Kūfuma 34 - Sukuma Bible 2015 – Bibilia Ilagano Lya Kale 2015 bible

Kūfuma 34

¹Ū SEEBA ūng'wīla ū Musa, “Beejaga mabalala gangī abīlī ga mawe gītī a ga kwandya, nayandīke hangī ī mihayo īyo yalī a ha mawe ga kwandya ayo wagabelagūlile.

²Ī ntondo ī dilū ūbize wamalamajaga, ūlinhe ū mu lūgūlū lwa Sinai; wize kūlī nene ū kwigūlya ya lūgūlū.

³Munhū ūngī ose ose atiziza hamò nang'ho, nūūlū atizūbonekana hose hose bbihī nū lūgūlū. Nūūlū ng'holo nūūlū ng'ombe jitizūdīīmīla hihī nalo ū lūgūlū.”

⁴Na lūūlū ū Musa ūbeeja mabalala gangī abīlī ga mawe, ūmo gaalī a ga kwandya. Ntondo yaho wipuuna dilū ūlinha ū mu lūgūlū lwa Sinai ūmo SEEBA walī wanagīīlīla; na a mabalala ga mawe ay'abīlī ūgabūūcha mu makono gakwe.

⁵Hūna ū SEEBA wika ū ng'wilunde, wīmīīla hamò nang'hwe ūlīkumūcha ī lina lyakwe ī lya SEEBA.

⁶Ūbīta ū kūbūtongi bo ng'wa Musa akūkumūchaga, “SEEBA, SEEBA, Mulungu ūyo alī nsaatwa wa banhū na nchīji wa shigongo, ndīzu kūpelana, ookalile būtogwa, hangī alī nsanyiwa no.

⁷Ūyo akoolechaga shigongo shakwe kū banhū mashihūmbī na mashihūmbī, hama nekeja wa būkenaagūji na būgomi bo banhū na shibi shabo. Alīyo atalekaga kūbinha nsango a bakenaagūji; akabinhaga nsango baana, na a baana babo kūlwa nguno ya būkenaagūji wa basaabo, kūshisha shibyalīlwe sha kadatū na sha kanè.”

⁸Ū Musa winamya hasī wangū wangū ū ntwe gwakwe ūlamya.

⁹Ūhaya, “Ee Seeba, ūlū wanibonaga nigeleelilwe ū kū būtongi wako, nalīlomba ū Seeba ashimīze hamò nise. A banhū benaba ī chene balī na mitwe midiimu, alīyo tūlekejage ū būsobya wise, nī shibi shise, ūtwanukūle tūbize wingīji wako.”

¹⁰Ū SEEBA ūhaya, “Nalībeeja ilagane nang'ho, Nakwīta mihayo mitaale ū kū būtongi wa banhū bako, mihayo īyo ītaalī kwītwa ng'wihanga līngī lyose lyose ū mu sī. A banhū abo ūkwikalaga mubo bakūgabona a makanji ga milīmo īyo nalīkwītīla ū nene SEEBA.”

¹¹“Īyo nalīkūlagīla lelo īdimage. Nakūbapeeja a Baamoli bakwīngīle na a Bakanaani, Bahītī, Bapelizi, Bahīvī, na a Bayebusi.

¹²Lang'hanaga gete ūtizūbeeja ilagane nabo a bikaji ba mu sī yenīyo ūmo ūlīkikala; ūlū wīta gīko bakūbiza lūtu ū kūlī bebe.

¹³Ī myalīlo yabo īsambaagūlage gete, hama balī na mawe bakagalamyaga, nago gabelagūlūge; na ng'hīngī ja Maashela balī najo, nī jene jikambagūlage.

¹⁴Yaya kūgima kūlamya mulungu ūngī ose ose, nguno ū SEEBA ūyo lina lyakwe alī ‘Wa Wilu,’ ū wei alī Mulungu wa wilu.

¹⁵Lang'hanaga gete ūtizūbeeja ilagane nabo a bikaji ba mu sī yenīyo; nguno ūlū bandya kwīta ī yabo ya malofu, īyo bakīītaga kū bamulungu babo mu mawitongeleja gabo ga kūbafunīja shitambò, bakūng'wegeleja na a bing'we mulye ī shitambò shabo.

¹⁶Nūūlū muyūsola bashīke babo bamò na bamò, ng'wabatooja kū bitūnja bing'we, hūna a bakīma benabo bandya kwīta ya malofu kū bamulungu babo, bakūbadutīla a bitūnja bing'we ū mu shītwa shenīsho.

¹⁷A bing'we yaya gete ū kūsula shiikolile sha kūlamiwa.”

¹⁸Shiizūkagwe ī shigukulu sha migatī ītī na shibimbya. Ūkūlya migatī ītī na shibimbya ikanza lya shikū mpungatī, gīt'ūmo naakūlagīīlīlile; ū mhayo gwenūyū gwītage kūlenganīla nī likanza īlo līhelilwe ū mu ng'weji gwa Abibu, nguno ū mu ng'weji gwenūyo h'ūkūfuma ū mu sī ya Misili.

¹⁹Pye abo bakahangūlaga nda ja baninabo balī bane, nī mbyalwa ja kwandya ū mu mitugo jako jilī jane, jibize ng'holo nūūlū ng'ombe.

²⁰Ī nzobe ī mbyalwa ya kwandya īkomoolage na ng'wana wa ng'holo; alīyo ūlū ūlemeelwa ū kwīkomoola, ībūlagage. Na a bitūnja bako a babyalwa ba kwandya ūkūbakomoola pye. Atizilonga nūūlū ūmò wa kwegeela kū būtongi wane alī makono dalali.

²¹Tūmamaga shikū itandatū, alīyo ū mu lūshikū lwa mpungatī wifuule; ifuulage nūūlū īkabiza mu shikū j'ilīma nūūlū ja magesa.

²²Ī shigukulu sha mifungo ūkūshiizūkwa, nī sh'ikanza lya matwajo ga kwandya ga magesa ga ngano; nī shigukulu sha kūkuminga shilīwa mu kaya a ha būkalīkījo bo ng'waka.

²³Pye a bagosha abo ūlī nabo bakwiza ng'hangala idatū kū būtongi bo ng'wa SEEBA Mulungu, ū Mulungu wa Isilaeli.

²⁴Nakūgapeeja a mahanga ū kū būtongi wako, nī sī yako nakūkūgalīhīja; nīyo atīho wa kwīyikūmva ī sī yako. Ū bebe shikaga dūhū ū kū būtongi bo ng'wa SEEBA Mulungu wako, ng'hangala idatū ū mu ng'waka.

²⁵Yaya kūnenhela mininga ga shitambò hamò na shose shose īsho shilī na shibimbya. Hama yaya nūūlū hado ū kūshilekeela ī shitambò sha ha shigukulu sha Pasaka, kūshisha kū ntondo dilū.

²⁶A matwajo gawiza a ga kwandya ū mu ngūnda gwako, genhage mu numba ya ng'wa SEEBA Mulungu wako. Yaya kūzuga mbūli mu mabeelè ga ninayo.

²⁷Hūna ū SEEBA ūng'wīla ū Musa, “Ī mihayo yenīyī yandīkage, nguno ū mu mihayo yenīyī naabeejaga ilagane nang'ho, hamò na a Baisilaeli.”

²⁸Ū Musa akikala ū mu lūgūlū, alī hamò nū SEEBA, ikanza lya shikū makūmi anè; līīmi na būjikū ataliile shilīwa nūūlū kūng'wa minzī yaya. Ū ng'wikanza lyenīlo h'akīyandīka a ha mabalala ga mawe ī mihayo y'ilagane, īyo īlī mu shilagīlo ikūmi.

²⁹Hūna ū Musa wika kūfuma ū mu lūgūlū lwa Sinai alī nago ū mu nkono gwakwe a mabalala ga mawe, ayo gaalī na būkaanīji; aho alika walī atadeebaga gīkī ū būshū bokwe boteemagīlaga, īkī walī wahoya na SEEBA.

³⁰Ū Alooni na a Baisiaeli a bose, aho bamona ū Musa ū būshū bokwe būkūteemagīlaga, bakogoha ū kūng'wegeela.

³¹Alīyo ū wei ū Musa ūbitana; na lūūlū ū Alooni na a batongeeji a bangī a ba banhū, būshoka aho walī, biza būhoya nang'hwe.

³²Hanuma y'ikanza, na a Baisilaeli a bangī būng'wegeela a bose, ūbinha pyī ī shilagīlo īsho SEEBA walī wang'winha kūfuma ū mu lūgūlū lwa Sinai.

³³Ū Musa aho wamala ū kūyomba nabo witunga līng'wenda ū kū būshū wakwe.

³⁴Alīyo būl'ikanza ūlū alī kū būtongi bo ng'wa SEEBA, alīhoya nag'hwe, walyīnjaga ī līng'wenda kūshisha ūlū wafuma hanze hū walitunga hangī. Wabizaga ūlū wafuma ī hanze gīkī abawīle a Baisilaeli īyo walagīlagwa,

³⁵Ū būshū bokwe bobatemaga kūlwa kūteemagīla. Na lūūlū ū Musa walitungaga hangī ī līng'wenda ū kū būshū bokwe, kūshisha wingīla hangī kūhoya nū SEEBA.