Read Sukuma Bible 2015 – Bibilia Ilagano Lya Kale 2015 Kūfuma 36 Bible Online

Kūfuma 36 - Sukuma Bible 2015 – Bibilia Ilagano Lya Kale 2015 bible

Kūfuma 36

¹“Na lūūlū a ba Beezaleli nū Oholiabu, na a baakoolī a bangī pye abo SEEBA wabinhile witegeleja na būdūla bo kwīyīta pyī ī milīmo ya kūlībeeja ī lipandī lyeela, ībigeleelilwe bagwīte ū nīmo gīt'ūmo SEEBA walagīīlīlile.”

²Hūna ū Musa ūbitana a ba Beezaleli nū Oholiabu, na a banhū a bangī pye a baakoolī, abo SEEBA walī wabinha būdūla, abo baalī batogilwe ū kwiza kūgwīta ū nīmo.

³Būshanukūla kūfuma ū kūlī Musa pyī ī shakwinha īsho shaalī shafunyiwa na Baisilaeli kūlwa nīmo gwa kūlībeeja ī lipandī lyeela. Nīyo a banhū bakongeja ū kūyenha ī shakwinha būlī lūshikū ī dilū.

⁴Na lūūlū baakoolī a bose abo bīītaga pyī ī milīmo y'ipandī lyeela, būleka tame ū kūtūmama,

⁵biza kūng'wīla ū Musa, “A banhū baakīlanījaga no ū mu kenhele ka shikolo ī sha nīmo ūyo SEEBA walagīlile gwītwe.”

⁶Hūna ū Musa ūtūma shilagīlo hose pyī ū mu ng'hambī, ūhaya, “Ī haha lūūlū munhū ose ose, ngosha nūūlū nkīma atizūbeeja hangī shikolo sha kūfunya kūlwa nīmo gw'ipandī lyeela.” A banhū būbiza baalemejiwa ū kongenja kwenha ī shikolo,

⁷nguno īsho baalī nasho shalī shingī no, shalī shikomile kūgūmala ū nīmo na kūshiiga.

⁸Pye a baakoolī abo baalīmo ū ng'wibità lya batūmami būlībeeja ī lipandī lya kwikala, lya matundubaali ikūmi ga kitaani īdosilwe chiza, na būlūba wa būlulu, na wa nzulunge, na waza; na makelubi gasumīīlilwe mo na koolī wa nīmo gwa kūsuma.

⁹Pye a matundubaali gaalī ga būtaale būlenganīlile, būlīhu bo mita ikūmi n'ibīlī na būgalī galī bo mita ibīlī.

¹⁰Atanò ga matundubaali genayo būgadimanya, na a gangī ayo atanò nago būgadimanya.

¹¹Hūna būtūūla ngoye ja chūūlū ja langi ya būlulu ū kū mhelo y'itundubaali lya kū mhelo ū mu atanò a ga kwandya, nū kū mhelo y'itundubaali lya kū mhelo ū mu atanò a gangī bīīta gīko.

¹²Ī litundubaali ī līmò būlītūūlīla ngoye makūmi atanò ja chūūlū; nī litundubaali ī lya kū mhelo ū mu atanò a ga kabīlī, nalyo būlītūūlīla ngoye makūmi atanò ja chūūlū; a mapandī ayo galī na chūūlū būgatūūla gilolelile.

¹³Hūna būbeeja na madimanīgījo makūmi atanò ga zahabu, būgatūmamīla kūgadimanya a matundubaali genayo, ī lipandī lya kwikala lyūbiza līmò na līmò.

¹⁴Hanuma ya henaho būbeeja ikundīkījo lya h'ipandī lya kwikala; būlyīta lya matundubaali ikūmi na līmò, ga boya bo mbūli.

¹⁵A matundubaali genayo a gose gūbiza ga būtaale būlenganīlile, mita ikūmi n'idatū ū būlīhu, ū būgalī galī mita ibīlī.

¹⁶Atanò būgadimanya lyūbize līmò, na a yayo atandatū būgadimanya lyūbiza līmò.

¹⁷Ī litundubaali ī līmò būlītūūlīla ū kū mhelo yalyo ngoye makūmi atanò ja chūūlū, nī līngī būlyītīla chene ū kū mhelo yalyo.

¹⁸Hanuma būbeeja na madimanīgījo makūmi atanò ga shaba, ga nīmo gwa kūlīdimanya ī liheema lībize shikolo shimò.

¹⁹Hūna ī liheema būlībeegeja ikundīkījo lya makūnza ga ng'ondi gadabbiwe mu langi yaza, a higūlya yaho hangī būtūūla ikundīkījo lya makūnza ga mbūli.

²⁰Būbeeja na mīīmīlīkījo ga mbawa ja ng'wininga kūlwa kūlyīmīlīkīja ī lipandī lya kwikala.

²¹Būlī lyīmīlīkījo lyalī na būlīīhu bo mita inè na nusu, na būgalī galī bo sentimita makūmi mpungatī.

²²Būlī lyīmīlīkījo lyūbiza na ndīmi ibīlī jiihelile; pye a mīīmīlīkījo ga kūlyīmīlīkīja ī lipandī lya kwikala būgabeeja galī gīko.

²³Bakabeeja mīīmīlīkījo makūmi abīlī a ga kū lwande lwa dakama y'ipandī lya kwikala;

²⁴būgabeegeja na shidako makūmi anè sha chūma sha feza, sha kūtonga a ha sīlīlī yago, būlī lyīmīlīkījo lyūbiza na shidako shibīlī; būlī lūlīmi na shidako shimò.

²⁵Nū lwande ū lūngī ū lw'ipandī lya kwikala, ū lwa sukuma, nalo būlūbeegeja mīīmīlīkījo makūmi abīlī.

²⁶Būbeeja hangī shidako shingī makūmi anè sha chūma sha feza, būlī lyīmīlīkījo lyūbiza nasho shibīlī a ha sīlīlī yalyo.

²⁷Ī lipandī lya kwikala būlībeegeja mīīmīlīkījo atandatū ū kū lwande ū lūngī, ū lwa ng'weli.

²⁸Ī koona ja kū lwandī lya kū numa būjibeegeja mīīmīlīkījo abīlī būlī hene.

²⁹Hū kūhaya a ha koona būbīlī wajo jenījo, a hitina ū mu sīlīlī gakakīndīkwa ho mīīmīlīkījo abīlī bīlī, gīmīīla gihelile gūūkadimanyiwa itendele līmò ū kwigūlya. A gose būbīlī wago gaalī gikolile gīko.

³⁰Na lūūlū gakabiza ho mīīmīlīkījo anaane, na shidako ikūmi na shitandatū; būlī lyīmīlīkījo shibīlī.

³¹Hanuma ya heneho a mīīmīlīkījo ga kūlyīmīlīkīja ī lipandī lya kwikala, būgabeegeja na mbawa ja magito, ja ntī gwa ng'wininga. A ga lwandī ū lūmò būbeeja atanò;

³²na a ga lwandī ū lūngī atanò. Hūna nū kū mīīmīlīkījo g'ipandī lya kwikala, ū kū lwandī lwa kū numa ī ng'weli, nū kwene atanò.

³³Ū lūbbawa lw'igito lya ha gatī bakalwīta lwa kūpulung'hanya, kwīngīīla kū wandījo wa mīīmīlīkījo kūshisha kū būkalīkījo wago.

³⁴Na a mīīmīlīkījo genayo būgabila zahabu, būbeeja na matendele ga zahabu ga kūjidimīīla ī mbawa ja magito. Nī joi ī mbawa ja magito būjibila zahabu.

³⁵Būbeeja itundubaali lya būlūba bo langi ya būlulu na ya nzulunge na yaza, na kitaani īdosile chiza, na makelubi gūūsumīīlwa ū ng'witundubaali na koolī wa nīmo gwenūyo.

³⁶Hūna būlībeegeja ng'hīngī inè ja ntī gwa ng'wininga, būjibila zahabu; būbeeja na malobò ga zahabu būjitūūlīla, būjisulīla na shidako shinè sha chūma sha feza.

³⁷Ī sha kūtūūla ha kwingīlīla ū ng'wiheema, bakabeeja itundubaali lya būlūba bo langi ya būlulu na ya nzulunge na yaza, na kitaani īshibanyiwe chiza na būgaliili būtaale; nīmo go ng'wa koolī ntaale.

³⁸Hanuma būbeeja na ng'hīngī itanò, na malobò gajo. Ī ng'hīngī būjibila zahabu ū kwigūlya, pye a magwasījo gajo; ī shidako shaajo būtanò washo būshīīta sha shaba.