Read Sukuma Bible 2015 – Bibilia Ilagano Lya Kale 2015 Kūfuma 37 Bible Online

Kūfuma 37 - Sukuma Bible 2015 – Bibilia Ilagano Lya Kale 2015 bible

Kūfuma 37

¹Ū Beezaleli ūlībeeja ī lisandīko lya mbawa ja ntī gwa ng'wininga, lya būlīhu bo sentimita igana n'ikūmi, ū būgalī galī sentimita makūmi mpungatī, nū būgūngūhu sentimita makūmi mpungatī.

²Ū mu gatī na a h'igūlya ūlībila zahabu niza; hūna ū mu mhelo mhelo ūlīpīndīlīja būlenji bo zahabu ībūmbile chiza.

³Ūsula na matendele anè ga zahabu, ūgadimanya ū kū mhembe jalyo ja ha sīlīlī īj'inè; abīlī ipandī līmò nī lipandī ī līngī abīlī.

⁴Hanuma ūbeeja mitī ībīlī ya ng'wininga wībila zahabu.

⁵Ī mitī yenīyo wīyingīja ū mu matendele ayo gadaamīlījiwe a ha isandīko, kūlwa kūyūlībūūkīja.

⁶Hanuma ūtūmamīla zahabu niza kūbeeja isumbī lya shigongo, lya būlīhu bo sentimita igana n'ikūmi, ū būgalī galī walyo sentimita makūmi mpungatī.

⁷Hama ūbeeja na makelubi abīlī ga zahabu ya kūsula, gūbiza a higūlya y'isumbī lya shigongo, ū kū mhelo būbīlī wajo.

⁸Ikelubi līmò ū kū lwandī ūlū, nū kū lwandī ū lūngī ikelubi līmò. Ūgīīta gadimanile nī lisumbī lya shigongo ū kū mhandī būbīlī wajo.

⁹A makelubi genayo gaalī na manana gagagoloolile a higūlya, gūlīfīīgīja ī lisumbī lya shigongo na manana gago; hūna gilogeja ū būshū, hanuma gūlola a hisumbī lya shigongo.

¹⁰Hūna ūbeeja na meza ya ntī gwa ng'wininga, ya būlīhu bo sentimita makūmi kenda, ū būgalī galī sentimita makūmi atanò, ū būgūngūhu wayo sentimita makūmi mpungatī.

¹¹Wībila zahabu, ū mu mhelo mhelo wīpīndīlīja būlenji bo zahabu ībūmbile chiza.

¹²Hūna wīpīndīlīja na lūgala lo būgalī galī bo kūbiza gītī shiganza sha munhū, nalo ū lūgala lwenūlo ūlūtūūlīla būlenji bo zahabu lūbeegije chiza.

¹³Hūna ī meza wībeegeja matendele anè ga zahabu, ūgakūbanīja ū kū magūlū gayo būnè wago.

¹⁴A matendele genayo gaalī ga nīmo gwa kūbītīja mo ī mitī ya kwībūūkīja ī meza; akagatūūlīla higūlya bbihī nū lūgala.

¹⁵Ī mitī ya kwībūūkīja ī meza yalī ya ng'wininga, hūna yūbilwa zahabu.

¹⁶Ūbeeja na shiseme sha ha meza, sahani, shijiko, nungū na mabakuli kūlwa kūsaamya shitambò; ī shose shenīshi shikabeejiwa kūfuma mu zahabu niza.

¹⁷Hūna ūbeeja n'ikīndīkīlo lya talà, lya zahabu yawiza; ī shidako shalyo ūshibeeja sha kūsula, pyī nū nshigītī gwalyo. Lyalī na būlenji wa shikombe shibange bonji, na shitūlī na būlabo; ī shose shenīshi shalī shidimanījiwe nalyo bo kūshisulanīja haho.

¹⁸Matambī atandatū gaalī gafumile a ha nshigiti gw'ikīndīkīlo lya talà, adatū ī lipandī ī līmò, nī lipandī ī līngī adatū.

¹⁹Ī litambī ī līmò lyūbiza na shikombe shidatū shibange bonji wa ntī gwa mulozi, na shitūlī na būlabo, nī lya kabīlī lyūbiza nasho shidatū, pye na a gangī; kūshisha a gose būtandatū wago ayo gafumile a ha nshigit gw'ikīndīkīlo lya talà.

²⁰Lelo ū nshigiti gw'ikīndīkīlo lya talà, ū gwene gūbiza na shikombe shinè shibange bonji wa mulozi, hamò na shitūlī na būlabo.

²¹A ha sīlīlī ya būmanhījo bo matambī gaalyo a ga kwandya, shūbiza ho shitūlī shimò, na a ha sīlīlī ya matambī a ga kabīlī shitūlī, na a ha sīlīlī ya matambī a ga kadatū; pye a matambī būtandatū wago gūtang'anhīla.

²²Ī shitūlī na a matambī shikabeejiwa sha zahabu yawiza, gūsulanījiwa hamò nī likīndīkīlo lya talà, shūbiza shikolo shimò.

²³Hanuma ya henaho ūtūmamīla zahabu niza, ūjibeeja ī talà jaho ījo mpungatī, na a majimījo nī sahani jaho.

²⁴Īkatūmama zahabu niza ya būdito bo talanta īmò, ū kūlībeeja ī likīndīkīlo lya talà lyenīlo nī shikolo shaho ī shose shenīsho.

²⁵Hūna ūbeeja ng'walīlò gwa ntī gwa ng'wininga, kūlwa kūzuukīja būbbani. Ūgwīta ū būlīhu nū būgalī galī wago būlenganīlile, sentimita makūmi atanò būlī lwandī, ū būgūngūhu sentimita makūmi kenda; ūgwītīla mapembe gadimanījiwe ho, gūbiza shikolo shimò nago.

²⁶Ūgūbila zahabu pyī ū gose, a higūlya nū mu kabazu, na a mapembe gūbiza na zahabu; ū mu mhelo mhelo ūgūpīndīlīja būlenji bo lūgala lo zahabu lūbeegije chiza.

²⁷A ha sīlīlī ya lūgala ūtūūla matendela abīlī ga zahabu, ū kū lwandī ūlū līmò nū lwandī ū lūngī līmò; kūlwa kwībītya mo ī mitī ya kūgūbūūkīja.

²⁸Nī mitī yenīyo akībeeja ya ng'wininga, hanuma bībila zahabu.

²⁹Na a maguta meela a ga kūbitīīla batūmami h'ikanza lya kūtūūlwa ha nīmo būgabeeja, nū būbbani ū wa ng'waso gwawiza; ī shose shenīshi shūsanja sanjiwa na koolī wa nīmo gwenūyo.