Read Sukuma Bible 2015 – Bibilia Ilagano Lya Kale 2015 Kūfuma 38 Bible Online

Kūfuma 38 - Sukuma Bible 2015 – Bibilia Ilagano Lya Kale 2015 bible

Kūfuma 38

¹Hanuma ūzenga ng'walīlò gwa ntī gwa ng'wininga, ū būgūngūhu ūgwīta gwa mita īmò na sentimita makūmi adatū. Ū būgalī galī būbiza mita ibīlī na sentimita makūmi adatū, nū būlīhu mita ibīlī na sentimita makūmi adatū.

²A ha koona būnè wajo ūgūtūūlīla ipembe būlī hene; ī lipembe ūlīdimanya nū ng'walīlò, lyūbiza shikolo shimò nago; hūna ū ng'walīlò ūgūbila shaba pyī ū gose.

³Pyī ī shiseme sha kūtūmamīla ho shūbeejiwa sha shaba; shikolo gītī, mayoolelo, makolelo, mabakuli, uma ja kūsabūlīla nyama, na a maahulīlo ga moto.

⁴Ūgūbeegeja na lweyo lwa chūma sha shaba, shishibanije gītī ntego; lwa kūyūsweng'hwa a ha sīlīlī ya ng'walīlò, a ha gatī gatī yago.

⁵Ūbeeja na matendele ga kūtūūla a ha koona ja lweyo būnè wajo būlī hene līmò, kūlwa kwīlang'hana ī mitī ya kūbūūkīja.

⁶Hanuma ū ng'walīlò ūgūpūnzīla mitī ībīlī ya ng'wininga, yūbilwa shaba.

⁷Ī mitī yenīyo yūbītiwa ū mu matendele, yūgūtingata ha gatī ū ng'walīlò kūlwa kūyūtūmamīlwa kūgūbūūcha. Ū ng'walīlò gwenūyo gwalī gwa mbawa, ū mu gatī gwalī na mhembo, ndūhū mo shikolo.

⁸Ī shiseme sha shaba, nī likīndīkīlo lyasho, ūshibeeja kūfuma mu malole bilolelaga bakīma, abo batūmamaga ha nyango gwa kwingīla ng'wiheema lya kwibilingīla.

⁹Hanuma ūbeeja gwalugwa īpīndīlījiwe lūūba; ū būlīīhu bo lwande lwa dakama būbiza mita makūmi anè n'itandatū, ūlūbeeja lwa matundubaali ga būlūba wa kitaani īdosilwe chiza.

¹⁰Ū lwande lwenūlo lwalī na ng'hīngī makūmi abīlī, hamò nī shidako shaajo makūmi abīlī sha shaba, a malobò gajo na a magwasījo gaalī ga feza.

¹¹Nū būlīhu bo lwande lwa sukuma būbiza mita makūmi anè n'itandatū; nū kwene ī ng'hīngī jalī makūmi abīlī, hamò na shidako shaajo makūmi abīlī sha shaba, a malobò na a magwasījo gajo gaalī ga feza.

¹²Ū lwande lwa ng'weli ū kū būgalī galī wayo ī gwalugwa, yūbiza na lūūba lwa mita makūmi abīlī n'idatū; gaalīko koi matundubaali na ng'hīngī ikūmi, hamò nī shidako shaajo ikūmi; a malobò gajo na a magwasījo gaalī ga feza.

¹³Nū būgalī galī wa kū būfuma līīmi, ū kū lwande lwa kīya ya gwalugwa, būbiza mita makūmi abīlī n'idatū.

¹⁴A ha mita, ī lipandī ī līmò gaalīho matundubaali ga būlīhu bo mita itandatū na nusu, na ng'hīngī idatū, hamò na shidako shaajo shidatū.

¹⁵Nī lipandī ī līngī lyūbiza na matundubaali ga būlīhu bo mita itandatū na nusu, na ng'hīngī idatū, hamò na shidako shaajo shidatū.

¹⁶Pye a matundubaali ayo gaalī gīpīndīlīgije ī gwalugwa gaalī ga būlūba bo kitaani būdosilwe chiza.

¹⁷Ī shidako sha ng'hīngī gaalī ga shaba; a malobò na a magwasījo ayo gaalī a ha ng'hīngī gaalī ga feza. Lelo ī joi ī ng'hīngī ū kwigūlya jalī jikundīkījiwe chūma sha feza; pyī ī ng'hīngī ījo jalī jīpīndīlīgije ī gwalugwa jalī na matungījo ga chūma sha feza.

¹⁸Ī litundubaali lya ha mita gwa kwingīlīla mu gwalugwa, lyaalī lya būlūba wa būlulu, na nzulunge, na waza; na kitaani īdosilwe chiza; nīmo go ng'wa koolī ntaale. Ū būlīhu walyo walī mita kenda, ū būgūngūhu bo kūja ng'wigūlya walī gīt'ūmo gaalī a matundubaali a gangī, a ga ha lūūba, mita ibīlī na nusu.

¹⁹Jalīho na ng'hīngī inè, na shidako shaajo shinè sha shaba; a malobò gajo na a magwasījo gaalī ga feza, ū kwigūlya jalī jikundīkījiwe chūma sha feza.

²⁰Pyī ī mambo j'iheema lya h'ipandī lya kwikala, nī ja lūūba lwa kwīpīndīlīja ī gwalugwa, jalī ja shaba.

²¹Ī shikolo īshi h'īsho shikatūmama ha kūbeeja ipandī lya kwikala, ī lipandī lya kwikala mo isandīko lya būkaanīji. Ū Musa akalagīla shandīkwa na Balawī, baatongeelagwa na Itamaali ng'witūnja wa ngabīji Alooni.

²²Ū Beezaleli ū ng'witūnja o ng'wa Uuli, ng'wizūkūlū o ng'wa Huuli wa lūganda lwa Yuda, akabeeja pyī ī shikolo gīt'ūmo SEEBA walī wanagīīlīla Musa.

²³Nū Oholiabu ng'witūnja o ng'wa Ahisamaki wa lūganda lwa Dani, walī hamò nang'hwe; ū munhū ng'wenūyo walī na būdūla bo kūshiiganika shikolo na kūshibeeja. Nīyo walī koolī ntaale na ngaliili wa kūshibanya na kūsuma myenda ya būlūba bo langi ja būlulu, nzulunge, na waza; na kitaani yawiza.

²⁴Ī zahabu ījo jikatūmama nīmo gwa ng'wipandī lyeela, ī jose jalī jafuma mu shakwinha sha kūyengeejiwa; jalī talanta makūmi abīlī na kenda, na shekeli magana mpungatī na makūmi adatū ū kūlenganīla nī shipimo sha shekeli ya ng'wipandī lyeela.

²⁵Ī feza ījo jikilonga kūfuma ū ng'wibità lya banhū abo bakabalwa ng'wikanza lya kūbalwa, jalī talanta igana, na shekeli shihūmbī shimò na magana mpungatī na makūmi mpungatī n'itanò, ū kūlenganīla nī shipimo sha shekeli ya ng'wipandī lyeela.

²⁶Būlī munhū beeka īmò; hū kūhaya nusu ya shekeli ū kūlenganīla nī shipimo sha shekeli ya ng'wipandī lyeela, ū kū bagosha bose abo bakabalwa; kwandīja ba myaka makūmi abīlī na kūja kū būtongi, banhū shihūmbī magana atandatū na shidatū, na magana atanò na makūmi atanò.

²⁷Ī talanta ja feza ījo igana jikatūmamīlwa kūsula ī shidako sha h'ipandī lyeela, nī sha h'itundubaali ly'isenge; ū kūfuma ū mu talanta igana shiigigela shidako igana, hū kūhaya būlī talanta ikīndīkīlo līmò.

²⁸Ī shekeli shihūmbī na magana mpungatī na makūmi mpungatī n'itanò jikatūmamīlwa kūbeeja malobò ga ha ng'hīngī, na kūjibila ī ng'hīngī ū kwigūlya, hamò na kūjibeegeja magwasījo.

²⁹Ī shaba ja kūfuma mu shakwinha sha kūyengeejiwa jalī talanta makūmi mpungatī, na shekeli shihūmbī shibīlī na magana anè.

³⁰Jikatūmamīlwa kūbeeja shidako sha ha nyango gwa kwingīlīla ng'wiheema lya kwibilingīla; na kūgūbeeja ū ng'walīlò gwa shaba, nū lweyo lwaho ū lwa shaba, nī shiseme shaho ī shose.

³¹Jingī būbeeja shidako sha ha lūūba lwa gwalugwa, na sha ha mita gwayo ī gwalugwa; pyī nī mambo ī jose, ī ja h'iheema nī ja h'ipandī lya kwikala, nī ja lūūba lwa gwalugwa.