Read Sukuma Bible 2015 – Bibilia Ilagano Lya Kale 2015 Kūfuma 39 Bible Online

Kūfuma 39 - Sukuma Bible 2015 – Bibilia Ilagano Lya Kale 2015 bible

Kūfuma 39

¹Ū kūfuma ū mu būlūba bo langi ya būlulu, na ya nzulunge, nī yaza, bakabeeja shizwalo sha kūtūmamīla ng'wipandī lyeela, būbeeja na shizwalo sheela sha ng'wa Alooni gīt'ūmo SEEBA walī wanagīīlīla ū Musa.

²A kagoodi ka makono maguhī akakabeeja ka zahabu, būsanjiwa mo na būlūba wa būlulu na wa nzulunge na waza, hamò na kitaani īdosilwe na būgaliili būtaale.

³Ī zahabu yalī yapondwa pondwa yūbbapaana, yūbiza gītī ibbaapala ly'ibbaadi ibbūpu, hūna īyūchemva ndo do do gītī būlūba bo zahabu; būyūdūla mu gīko ū kwīsanja nū būlūba ū wa būlulu nū wa nzulunge, nū waza, hamò nī kitaani īyo yalī īdosilwe chiza; nīmo go ng'wa koolī ngoogo.

⁴A kagoodi ka makono maguhī būkatūūlīla na shipande shibīlī, shūdimanīgīwa ha mabega gako, hūna shūsumīīlwa hoi kadūle kūfatanyiwa hamò.

⁵Ū mu nkīmbīlī kūtūūlīlwa ngwasho gwa kwiyikola nako; gwa zahabu īsangije na būlūba wa būlulu na wa nzulunge na waza, hamò na kitaani īdosilwe chiza; gūkasung'wa na būgaliili būtaale, gūdamīlījiwa a ha koi, gūbiza mīlī gūmò nako, gīt'ūmo SEEBA walī wanagīīlīla ū Musa.

⁶Hūna būsola mawe ga oniki būgandīka ho a mina ga bitūnja ba ng'wa Isilaeli gīt'ūmo koolī wa kwandīka akīītīlaga ūlū alītūūla wandīke h'imeng'helo, hanuma būgadamīlīja mu mabalala ga zahabu.

⁷Hanuma ya henaho a mabalala ga zahabu būgasumīīla a ha shipandī īsho shilī ha mabega ga kagoodi ka makono maguhī, gīkī gabize mawe ga shiizūkījo kūlwa baana ba ng'wa Isilaeli, gīt'ūmo SEEBA walī wanagīīlīla ū Musa.

⁸Hūna būūkabeeja a kamfuko ka ha shikuba; nīmo go ng'wa koolī ngoogo. Nako būūkabeeja gīt'ūmo kaalī a kagoodi ka makono maguhī; ka zahabu īsangije na būlūba wa būlulu na wa nzulunge na waza, hamò na kitaani īdosilwe na būgaliili būtaale.

⁹Kaalī ka malīngīīla dūhū, ū būlīhu nū būgalī galī wako būlenganīlile; sentimita makūmi abīlī n'ibīlī būlī kwene; hama kūbiza kagondilwe habīlī.

¹⁰Hūna būkatūūlīla ng'hīlīlī inè ja mawe ga mpango; ū mu lūhīlīlī lwa kwandya jūbiza mo lubi, topazio na belilo.

¹¹Ū mu lūhīlīlī lwa kabīlī jūbiza mo takwiyo, safilo na sumaladi;

¹²Ū lwa kadatū lūbiza na yakonto, agate na ametisto.

¹³Ū mu lwa kanè jūbiza mo klisolito, sadoniko na yaspi. Hūna a mawe ga mpango genayo būgadaamīlīja mu mabalala ga zahabu.

¹⁴A mawe gose gaalī ikūmi n'abīlī; iwe līmò ha ng'wanya gwa būlī ūmò wa bintūnja ba ng'wa Isilaeli; būlī lyene lyūbiza na lina lya lūganda lūmò ū mu ng'anda īj'ikūmi n'ibīlī, lyandīkilwe mu wandīke gītī w'imeng'helo.

¹⁵A kamfuko ka ha shikuba būūkabeegeja migufu ya zahabu īdosilwe chiza na būgaliili būtaale.

¹⁶Bakabeeja na tūbalala tūbīlī twa zahabu hamò na tūgwasījo tūsoga twa zahabu, būtūsumanīja ha koona ibīlī ja kamfuko ka ha shikuba.

¹⁷Ū tūmigufu twa zahabu tūgwashiwa ū kū tūgwasījo twa zahabu ūto tūlī ū kū koona ja kamfuko ka ha shikuba.

¹⁸Ī lipandī ī līngī ī lya tūmigufu twenūto lyūdimanījiwa ū kū mabalala ga zahabu; tūbiza twadimanījiwa kū būtongi wa shipandī ī shibīlī ī sha ha mabega ga kagoodi ka makono maguhī.

¹⁹Hanuma būbeeja na tūgwasījo tūngī tūbīlī twa zahabu, tūsung'wa ū kū koona ja kamfuko ka ha shikuba, ījo jilī ū kwipandī lya mu gatī, ījo jikuumije a ha kagoodi ka makono maguhī.

²⁰Hanuma būbeeja tūgwasījo tūngī tūbīlī twa zahabu, ū twene būtūsuma a ha sīlīlī ya shipande shibīlī ī sha ha mabega ga kagoodi ka makono maguhī, a ha būtongi yaho; bbihī nū būlūngīlo wa ngwasho gwa mu nkīmbīlī ū gwa kagoodi ka makono maguhī.

²¹Ū tūgwasījo twa kamfuko ka ha shikūba būtūtunga na katungījo ka langi ya būlulu ū kū tūgwasījo twa ha kagoodi ka makono maguhī. Kwīngīīla a henaho tūlūngwa a ha ngwasho gwa mu nkīmbīlī, kūlwa kūkahangīja a kamfuko ka ha shikuba katizihubenga kwīnga a ha kagoodi ka makono maguhī, gīt'ūmo SEEBA walī wanagīīlīla ū Musa.

²²Ī ng'hanjo ya kūzwalwa higūlya ya kagoodi ka makono maguhī, akībeeja ya ng'wenda gwa langi ya būlulu dūhū; nīmo gwa nsumi koolī.

²³Īkīītīlwa ipūndū lya kūbītīja ntwe a ha gatī; yūsumīīlwa na shipande sha ng'wenda kūlīpīndīlīja ī lipūndū lyenīlo, ītizūdasimūka na kūtandūka.

²⁴Ī ng'hanjo yenīyo pye a hose ū ng'wipīndo lyayo bakītūūlīla būlenji wa makomamanga, gasumīīlilwe būlūba bo langi ya būlulu, ya nzulunge, yaza, na kitaani īdosilwe chiza;

²⁵hūna būtūūla na nzoozo ja zahabu, jiitobanīja na a makomamanga.

²⁶Ī nzoozo ja zahabu na a makomamanga jūhelwa gīt'ūmo SEEBA walī wanagīīlīla ū Musa, kūlwa kūzwalwa ikanza lya kūtūmama; jūtobanījiwa hose pyī ū ng'wipīndo lyayo ī ng'hanjo yenīyo, aho ikomamanga aho nzoozo.

²⁷Ū Alooni na a bitūnja bakwe būbeegejiwa mashadi ga būlūba wa kitaani yawiza; nīmo go ng'wa koolī ntaale.

²⁸Na a mahima būbeegejiwa ga kitaani yawiza, pyī nī shikoye sha kwitunga kū ntwe, nī shizwalo sha kūzwala mu gatī shalī sha kitaani yawiza īdosilwe chiza.

²⁹Ū ngwasho bakabeegejiwa gwa kitaani yawiza īsumilwe chiza, na būlūba wa būlulu na wa nzulunge na waza; nīmo gwa nsumi ndeeba; gīt'ūmo SEEBA walī wanagīīlīla ū Musa.

³⁰Būbeeja n'ibalala lyeela lya zahabu niza, lya kūbiza gītī sahani; hūna būlyandīka gīt'ūmo meng'ho jikandīkīlīgwa, bandīka, “NG'WELA KŪLĪ SEEBA.”

³¹Hanuma būlītūūlīla itungījo lya langi ya būlulu; lya kūyūtungīlwa a h'ihima, gīt'ūmo SEEBA walī wanagīīlīla ū Musa.

³²Na lūūlū gūshila ū nīmo gwa kūlībeeja ī lipandī lya kwikala, ī liheema lya kwibilingīla. A Baisilaeli bakīīta gīt'ūmo SEEBA walī wanagīīlīla ū Musa.

³³Hūna būlyenha kūlī Musa ī lipandī lya kwikala, ī liheema nī shikolo shalyo ī shose, a malobò galyo, mīīmīlīkījo galyo, nī mbawa ja magito, hamò nī ng'hīngī jalyo, nī shidako shaajo.

³⁴Būng'wenhela nī likundīkījo lyaho, ī lya makūnza ga ng'ondi gadabbiwe mu langi yaza, nī likundīkījo īlo lyalī lībeejiwe na makūnza ga mbūli, nī litundubaali ī lya kūshīkīja isandīko.

³⁵Nī lisandīko lya būkaanīji būng'wenhela, nī mitī ya kūlībūūkīja, nī lisumbī lya shigongo;

³⁶nī meza hamò nī shikolo shaho pyī ī shose, nū ngatī gwa koolechiwa.

³⁷Būng'wenhela nī likīndīkīlo lya talà īlo lyalī lībeejiwe lya zahabu niza, nī talà jalyo, nī shikolo shalyo ī shose; na a maguta ga kūbakīja ī talà.

³⁸Būng'wenhela nū ng'walīlò gwa zahabu, na a maguta ga kūbitīīla batūmami, nū būbbani wa ng'waso gwawiza, nī litundubaali lya ha nyango gw'iheema.

³⁹Būgwenha nū ng'walīlò gwa shaba, nū lweyo lwaho ū lwa shaba, nī mitī ya kūgūbūūkīja, nī shiseme shaho; nī shiseme sha kūkalabīla nī likīndīkīlo lyasho.

⁴⁰Būng'wenhela na a matundubaali ga lūūba lwa gwalugwa nī ng'hīngī jaho, nī shidako shaajo; nī litundubaali lya kūtūūla ha mita gwa ha gwalugwa, nī ngoye jaho nī mambo ja lūūba lwa gwalugwa. Būshenha pyī ī shikolo sh'ipandī lya kwikala, ī liheema lya kwibilingīla.

⁴¹Nī shizwalo būng'wenhela, īsho shalī shabeejiwa kūlwa nguno ya būtūmami wa ng'wipandī lyeela; ī shizwalo sheela ī sha ngabīji Alooni, nī sha bitūnja bakwe ūlū balītūmama nīmo gwa būgabīji.

⁴²A Baisilaeli bakagwīta ū nīmo gīt'ūmo SEEBA walī wanagīīlīla ū Musa.

⁴³Ū Musa aho wagūlola ū nīmo ūbona gīkī baalī bagwīta gīt'ūmo SEEBA walī walagīīlīla. Na lūūlū ū Musa ūbafuuha.