Read Sukuma Bible 2015 – Bibilia Ilagano Lya Kale 2015 Kūfuma 4 Bible Online

Kūfuma 4 - Sukuma Bible 2015 – Bibilia Ilagano Lya Kale 2015 bible

Kūfuma 4

¹Ū Musa ūshosha hangī, “Ī gīsī īkūja kinehe ūlū būlema ū kūzunya, nūūlū ū kūlīdegeleka ī lilaka lyane? Nguno badūgije kūhaya gīkī, ‘Ū SEEBA atakwilongelile!’”

²Hūna ū SEEBA ūng'wīla, “Kī īsho ūlī nasho ū mu nkono shenīsho?” Ūhaya, “Nang'ha.”

³Ū SEEBA ūng'wīla, “Aligūponejage ha sī.” Ūgūponeja ha sī, gūgalūka yūbiza nzoka; ū Musa wīpeela.

⁴Ū SEEBA ūng'wīla, “Goloolaga ū nkono gwako wīdimīle kū nkīla.” Ng'hana ū Musa ūgūgoloola ū nkono gwakwe wīdima ū kū nkīla, ū mu nkono gwakwe yūgalūka, gūbiza nang'ha hangī.

⁵Ū SEEBA ūng'wīla, “Ū mhayo gwenūyū gūkūbinha kūzunya gīkī ū SEEBA, ū Mulungu wa bakūlūgenji babo, ū Mulungu o ng'wa Abulahamu, Mulungu o ng'wa Isaka na Mulungu o ng'wa Yakobo, wakwilongelaga.”

⁶Na hangī ū SEEBA ūng'wīla, “Aligūsweng'hage ū nkono gwako mu ng'wenda a ha shikuba shako!” Ng'hana ū Musa ūgūsweng'ha mu ng'wenda ū nkono gwakwe; wahayūgūfunya gwabizaga na mbiji, gwahilindūkaga no.

⁷Ūng'wīla hangī, “Gūshoshage mo ū mu ng'wenda.” Ūgūshosha ū nkono gwakwe ū mu ng'wenda. Aho wagūfunya, gwashokaga ūmo gūlī ū mīlī gwakwe na kale.

⁸Na lūūlū ū SEEBA ūng'wīla, “Ūlū būlema ū kūkūzunīlīja nūūlū kūshidīlīla ī shakūkumya ī sha kwandya, bakūshizunya ī sha kabīlī.

⁹Alīyo ūlū būlema ū kūshizunya ī shimanīkījo būbīlī washo shenīshi, nū kūkūdegeleka būlema, dahaga minzī kūfuma mu mongo gwa Nile ūgiite ha sī nyūmu. A minzī ayo ūlagadahe kūfuma mu mongo genayo, ūlū ūgiita ha sī nyūmu gakūbiza mininga.”

¹⁰Ū Musa ūng'wīla ū SEEBA, “SEEBA, ū nene natī nyombi; h'ūmo nalī kūfuma kale, nūūlū ū kūfuma aho wandījaga kūyomba nane ū nene nsese wako, ūlībona gīkī nalī ndito ū mu nomo; ū lūlīmi lwane lūdito.”

¹¹Ū SEEBA ūng'wīla, “Bebe ū meeja wa nomo go ng'wa munhū ni nani? Nū yūyo akang'wītaga ū munhū kūbiza gulu, nūūlū shitayomba nani? Nani ūyo akang'winhaga kūbona nūūlū būbboku? Natī nene SEEBA?

¹²Na lūūlū jaga; nakūkūgunanha ūdūle ū kūyomba, nī ya kūyomba nakūkūlanga.”

¹³Alīyo ū Musa ūhaya, “Ee Seeba, nalīlomba ūtūme munhū ūngī agwīte ū nīmo gwenūyo!”

¹⁴A henaho ū būpelanu bo ng'wa SEEBA būbaka ū kūlī Musa, ūhaya, “Ū nkūlūyo ū Alooni ū Nnawī, atīho? Namanile gīkī ū ng'wenūyo adūgije kūlūngalūnga chiza. Nīyo ī haha alī mu nzīla aliza kūkūsūng'wanha; ī ng'holò yakwe īkūyega no ū kūkūbona.

¹⁵Ū bebe ūkūyūlūngalūnga wang'winha ī mihayo.[4] A bose būbīlī wing'we nakūmugunanha ū kūyomba, na nakūmulanga nī ya kwīta.

¹⁶Akūyūyomba nabo a banhū a ha ng'wanya gwako; ū wei akūbiza gītī nomo gwako; ū bebe ūkūbiza gītī ūlī Mulungu ū kūlī wei.

¹⁷Alīyo ū nang'ha gwenūyū jaga nago, wikale nago mu nkono, nguno ūkūyūbeegeja shimanīkījo.”

¹⁸Hūna ū Musa ūshoka ū kūlī nkwīye ū Yesilo, ūūkang'wīla, “Baba nizunīlījage naje ū kū banhū bane ī Misili, nakababone ūlū ninga bataalī bapanga.” Ū Yesilo ūng'wīla, “Jaga baba, shimīzaga būtūmba na būgīlī.”

¹⁹Na lūūlū, ū Musa aho ataalī mu Midiani, ū Mulungu ūng'wīla, “Shokaga ko ī Misili, nguno baachile pye abo balūbūkoobaga ū būpanga wako.”

²⁰Hūna ū Musa ūnsola ū nke wakwe na a bintūnja bakwe, ūbadamhīja ha nzobe ūbūūka ashokile Misili. Nū nang'ha go ng'wa Mulungu ūgūsola ūgūbūūcha mu nkono gwakwe.

²¹Ū SEEBA ūng'wīla ū Musa, “Igwaga gete, ūlū ūlashike ī Misili, ī mihayo ya kūkumya īyo naakwinhile būdūla bo kwīyīta, yītage pyī ī yose ū kū būtongi bo ng'wa Falao. Kwike nakwīgagabaja ī ng'holò yakwe aleme ū kūbazunīlīja a banhū ū kwīnga.

²²Na lūūlū ūkūng'wīla ū Falao, ‘Ū SEEBA alīhaya gīkī, ū Isilaeli ng'wene ng'witūnja wane, tangī wane.

²³Naamalile kūkūwīla gīkī, Nekelage ū ng'witūnja wane aje akanilamye. Alīyo walemile ū kūnekela aje, na lūūlū nakūmūlaga ū ng'witūnja wako, ū tangī wako.’”

²⁴Hūna būshika ipandī ilebe būtūūla ng'hambī, ū SEEBA ūmanhya nū Musa ūhaya kūmūlaga.

²⁵Kwike ū Sipola ūsola iwe lyūgī, ūlītūmamīla gītī lūshū, ūnsaala ū ng'witūnja wakwe; hūna ūlīsola ī likoba īlo akalībbuta, ūlīponena mu magūlū ga ng'wa Musa; ūhaya, “Ū bebe ūlī ngoshi wane wa mininga ng'hana gete.”

²⁶Hūna ū SEEBA ūnekeja, wikala mpanga. (Ī likanza lyenīlo ū nkīma ūng'wīla, “Ūlī ngoshi wane kūlwa mininga.” Wagūhayaga ū mhayo gwa kūsaala).

²⁷Ū SEEBA ūng'wīla ū Alooni, “Jaga kwitogolo ūkansūng'wanhe ū Musa.” Ng'hana ūja ūūkamanhīja nū Musa kū lūgūlū lwa ng'wa Mulungu, ūmbipa.

²⁸Hūna ū Musa ūng'wīla pyī ī mihayo īyo SEEBA walī wanagīīla kūng'wīla; ūng'olekeja nī shimanīkījo ī sha kūkumya īsho walī wanagīīla kūshīta.

²⁹Ū Musa nū Alooni būbakuminga pye a banamhala ba Baisilaeli.

³⁰Ū Alooni ūbawīla pyī īyo SEEBA walī wang'wīla ū Musa. Nī shimanīkījo ūsholecha ū kū būtongi wa banhū.

³¹Bakazunya; nīyo aho bigwa gīkī ū SEEBA wabagenihile a baana ba ng'wa Isilaeli abagunanhe, na gīkī wabūbonile ū būluhi wabo, bakinamya ī mitwe yabo būlamya.