Read Sukuma Bible 2015 – Bibilia Ilagano Lya Kale 2015 Ayubu 1 Bible Online

Ayubu 1 - Sukuma Bible 2015 – Bibilia Ilagano Lya Kale 2015 bible

Ayubu 1

¹Walīho munhū wikalaga mu sī ya Uzi, ī lina walī walī Ayubu; ū munhū ng'wenūyo walī ntūngīlīja, hangī atī na shilingo; nīyo walī na logoohano ū kūlī Mulungu, hama ū būbi walī atatogilwe nūūlū kwiyegeela nabo.

²Walī na bitūnja mpungatī, na bashīke badatū.

³Ū mu būsabi bokwe walī na ng'holo shihūmbī mpungatī, ngamīla shihūmbī shidatū, nzīkū ja kūlīma shihūmbī shimò, nzobe ng'hīma magana atanò; na walī na batūmami bingī a ha ng'wakwe. Hūna lūūlū ū mu banhū ba mu sī ja kīya, walī ntaale kūbatinda pye a bose.

⁴A bitūnja bakwe biyītīlaga ndīīma ja kūbeeja shigukulu; būlī ng'wene ha kaya yakwe, na a balūmbū babo babalaalīkaga ū kwiza ū kūlya nū kūng'wa hamò nabo.

⁵Ūlū lyashila ī likanza lya shigukulu shabo, ū Ayubu walagījaga mhayo gwa kūbagunanha kwiyeeja; hūna ū wei wamisha dilū wafunya shitambò sha kūpemvwa kūlwa nguno ya būlī ūmò wabo. Nguno wiganikaga, “A baana bane badūgije kūbiza bīītile shibi mu nzīla ya kūnsondagūla Mulungu ū mu ng'holò jabo.” Hūna lūūlū, ū Ayubu wagwītaga būlī makanza ū mhayo gwenūyo.

⁶Lwise lūmò a baana ba ng'wa Mulungu bakiza kwiyoolecha kū būtongi bo ng'wa SEEBA, nū Shetani wiza hamò nabo.

⁷Ū SEEBA ūmūja ū Shetani, “Al'ū bebe nang'ho ūlīfuma halī?” Ū Shetani ūnshokeja ū SEEBA, “Nalīfuma kwīyeleela ī sī; nalūbīta bītaga moi.”

⁸Hūna ū SEEBA ūmūja ū Shetani, “Ūlīng'wiganikīla ginehe ū ntūmami one ū Ayubu? Nguno atīho munhū ūngī ū mu sī, ūyo ang'ogohile Mulungu gītī ng'wenūyo; atī na shilingo, hama ntūngīlīja jigi. Nīyo ū būbi walī atatogilwe nūūlū ū kwiyegeela nabo.”

⁹Ū Shetani ūshosha alīhaya, “Mm, ū Ayubu akūng'ogoha Mulungu dalali dūhū?

¹⁰Ūtampīndīlīgije ngītīli ū wei nī kaya yakwe, nī shose īsho alī nasho? Tūhaya pyī nī milīmo ya makono gakwe īlī na jako, na a madaale ga mitugo jakwe gakongejaga gūkwīla dūhū, na lūūlū akūmanagongeja kwigalīhaja matogolo.

¹¹Aligūgoloolage ū nkono gwako ūshikuumye pyī īsho alī nasho shenīsho; ūkūbona wakūsondagūla ī haha yenīyī!”

¹²Hūna ū SEEBA ūng'wīla ū Shetani, “Ūlītūngīlīja alilūūlū, pyī ī shikolo shakwe shilī mu nkono gwako, kwike dūhū ūtizūnkuumya ū wei.” A henaho ū Shetani wīnga ū kū būtongi bo ng'wa SEEBA.

¹³Lwise lūmò a bitūnja ba ng'wa Ayubu na a bashīke bakwe baalī ng'wikanza lya shigukulu bakūyegaga, balyaga na kūng'wa divai mu kaya ya nkūlū wabo ū ntaale.

¹⁴Kwimanīla wiza munhū ū kūlī Ayubu, ūng'wīla, “Ī nzīkū jalūlīmaga, nī nzobe jalūdīīmīlaga haho bbihī najo.

¹⁵Kwitulwa biza Basabena būjitula bo nguzu, būleka bababūlaga bo mapanga a batūmami; napūlūgūka nene iyene dūhū ūyo nalīkwinha ī mhola jenīji!”

¹⁶Ū ng'wenūyo aho ataalī akūyombaga, ūshika ūngī; ūhaya, “Moto go ng'wa Mulungu golī gogwa kūfuma ng'wilunde, gojibūlaga pyī ī ng'holo na a badīīmi bajo, napūlūgūka nene iyene dūhū, ūyo nalīkwinha ī mhola jenīji!”

¹⁷Ū ng'wenūyo aho ataalī akūyombaga, ūshika ūngī; ūhaya, “Bakalidayo baalī biza balī magelè adatū, būjitula bo nguzu ī ngamīla, a badīīmi bajo būbabūlaga bo mapanga pye a bose; napūlūgūka nene iyene dūhū ūyo nalīkwinha ī mhola jenīji!”

¹⁸Ū ng'wenūyo aho ataalī akūyombaga, ūshika ūngī; ūhaya, “A bitūnja na a bashīke bako baalūyegaga, bakūlyaga na kūng'wa divai mu kaya ya nkūlū wabo ū ntaale.

¹⁹Kwimanīla gwashika nshūūlūlū ntaale gwafuutumaga gūfumile kwitogolo, gūjitūla ī ng'ongo ja numba būnè wajo. Yagwaga yūbabbuudya būcha pye, nūpūlūgūka nene iyene dūhū ūyo nalīkwinha ī mhola jenīji!”

²⁰Ahenaho ū Ayubu ūbūūka, ūtandūla ī shizwalo shakwe; ūmooga ipala ūgwa hasī ūlamya.

²¹Ūhaya, “Nakiza nalī dūūhū kūfuma ū mu nda ya ng'wa mayū, na nakwīnga nalī dūūhū. Ū SEEBA hū ng'winhi, nū kwīnja wīnjaga SEEBA; ī lina lya ng'wa SEEBA līkumīlījiwe!”

²²Ū mu yose yenīyī ū Ayubu atītile shibi; atansolile būbi ū Mulungu.