Read Sukuma Bible 2015 – Bibilia Ilagano Lya Kale 2015 Ayubu 10 Bible Online

Ayubu 10 - Sukuma Bible 2015 – Bibilia Ilagano Lya Kale 2015 bible

Ayubu 10

¹Ū būpanga bone bonikolile no; na lūūlū nakūdaaya mu kadaayīle kose, nakūyomba kūlwa kūminyiwa ū mu ng'holò yane.

²Nakūngw'īla ū Mulungu gīkī, “Ūtanibalīlage nsango, alīyo nilanjage ī nguno ya kūnisola būbi.”

³Kolaga hamo shi gūlīkūyeja ū gwa kūniluhya, ū gwa kūgūdalaha ū nīmo gwa makono gako, alīyo wīyegela īyo bakwīhelaga a bahūnga?

⁴Nang'ho ūlī na miso ga mīlī gītī gwa banhū? Ūkalolaga ūmo banhū bakalolelaga?

⁵Ī shikū ja būlamu wako jilī gītī ja munhū ūyo akachaaga, nūūlū ī myaka yako ībange gītī ya munhū,

⁶nose ūkwikalaga ūgīsīlīja ya būhūbi bone, na kwikala ūshikula ī shibi shane?

⁷Ū bebe ūmanile gīkī ū nene natī ng'hūbi, nī gīkī atīho ose ose wa kūnipīja ū mu nkono gwako!

⁸Ū nkono gwako h'ūyo gūkanibeeja, gūnidoganya, ī haha hū ūlīhaya kūgalūka ūnikenaagūle?

⁹Izūkagwa gīkī wanibūmba gītī ibūmba, ī haha ūlīhaya kūnigalūcha nabize lūbuubu?

¹⁰Ūtanikenenenile gītī mabeelè, na kūnīīta nūbiza gītī mashishanga galaalile?

¹¹Hū bebe ūkanizwīka nofu n'ikūnza, hūna ūnilūnganya na maguha na nge,

¹²Ūkaninha būpanga, ūnoolekeja būtogwa būtaale; nū moyo gwane ūgūlang'hanile bebe kūlwa wila wako.

¹³Alīyo gashi walī wībisile mu ng'holò ī mihayo yenīyī; nadeebile ī yenīyī walī nayo ū mu maganiko gako.

¹⁴Wanikūngīlaga nīīte shibi ūnidime, hūna ūleme ūkūbūlekeja ū būbi bone.

¹⁵Ūlū nalī ng'hūbi, nimana nene! Alīyo nahene nūūlū nalī ntūngīlīja, natīko kūgūngūmūla ntwe gwane, nguno nalī na magooke no, nū būluhi bone nabūdeebile ūmo būlī.

¹⁶Ū bebe ūkūnikūngīlaga gītī shimba, ūlū nabūūcha ng'wigūlya ū ntwe gwane ūkūnīītīlaga mihayo mitaale ya kūkumya, gīkī ūniminye.

¹⁷Ūkwikalaga ūnenhela babūūji bapya, hūna ū būpelanu wako bongeja ū kūnipembekela; na a mabità gako gaayūnisanga lwīsī lwīsī.

¹⁸Nibūlī ūkanīnja ū mu nda ya ng'wa mayū? Yalī hambū hambū kūcha aho lītaalī kūnibona liso nūūlū līmò.

¹⁹Nakwikūmbagwa ūlū ni natilongile gete, nūūlū ni nīnga ū mu nda nūlūmbūlījiwa mu shigila!

²⁰Ī gīsī, ī shikū jane jitī ngehu no? Galūkīlaga na kūngī ūnileke nifuule nūūlū kakanza kado,

²¹kūko nataalī kūja kwipandī Īlo batashokaga, ipandī ly'ilundu na giiti sha gamha.

²²Kū sī ya giiti shidito, sī ya nengeeji gwa lūfu, na ndūhū kūlembeela; ūko ī lisana nī giiti shitikīlile.