Read Sukuma Bible 2015 – Bibilia Ilagano Lya Kale 2015 Ayubu 11 Bible Online

Ayubu 11 - Sukuma Bible 2015 – Bibilia Ilagano Lya Kale 2015 bible

Ayubu 11

¹Nang'hwe ū Zofali ū muna Namatī ūshosha ūhaya,

²“Ī mihayo na wingī yenīyī Ībīte ndūhū nūūlū gwa kūshoshiwa? Ū ng'wenūyū alī na gwa ng'hana ūmo okwīgījaga mihayo gīkī?

³Bebe, ī mihayo yako ī mingī yenīyī h'īhuumīje banhū, atizilonga wa kūkūhama ū mu mihayo yako y'ibengwe yenīyī?

⁴Īkī walinhyaga kūhaya gīkī, ‘Ū nene nalī na kūzunya kwela no, nū kū būtongi wako nalī ng'wela!’

⁵Ī gete ū Mulungu ūlū ni wayomba, ūūkūyombya na nomo gwakwe wei ng'wenekīlī;

⁶ūūkoolekeja nang'ho ī mbisīla ja masala, nguno a masala gakiyoolechaga mu mbika ningī. Nīyo shikwigelile ūmane gīkī ū nsango ūyo wakwinhile ū Mulungu ndo no, kūtinda ūmo shiigeleelilwe ī shibi shako.”

⁷Ū bebe ūdūgije kwīyitegeleja Ī mihayo īyo ayībisile ū Mulungu? Ūdūgije kūdeeba ūko īgelelile Ī mihayo ya Ndūji wa shose?

⁸Ī yoi īlī higūlya no kūtinda igūlū, nang'ho ūlī na gwa kwīta? Īlī na būshimu būtaale no kūtinda kūlimu, ūkūmana kī ū bebe?

⁹Ū būlīhu wayo būkūbanīgije sī ningī, nū būgalī galī wayo būkundīkīgije manyanza gose.

¹⁰Ū wei ūlū wiza kūkūdima hūna ūūkūponya mu jeela, hanuma ūūkūshisha kwibanza, nani akūnkuuma?

¹¹Nguno a banyeecha abamanile no, Ī gīsī ūlū ūbona būbi nibūlī abūleke gīko dūhū atizīta mhayo gose gose?

¹²Ū munhū mbūūlī kūpandīka masala, numho nzobe ya ng'wikūngū ībyalwe na masala gītī ga munhū.

¹³Alīyo ū bebe ūlū ūngalūkīja wei ī ng'holò yako, hūna ūng'wambīla a makono gako,

¹⁴ūlekana nasho ī shibi īsho ūshidimīīlile, ūbūlemeja ū būbi ū kwikala ū mu kaya yako,

¹⁵a henaho ūtūding'wa minala nūūlū ūkūbūūchaga būshū wako, ūkwīmīīla nyagosha, ūtikala ogohaga yaya.

¹⁶A makoye gako ūkūgība, ūkūyūgizūkwa dūhū gītī minzī gaamalile kūbīta.

¹⁷Ū būpanga wako būkwandya kwaka, leba nū kwaka kwa līīmi nūūlū līlī ntwe gatī; Ī giiti shikūbiza gīt'isana līlandya kūfuma makanza ga dilū.

¹⁸A henaho ūkwiyigwa ūlī mu mhola, nguno ūkūbiza na kwisagīlwa, ūkūyilalangīja ūko nū kūko ūlī mu kwifuula.

¹⁹Ūkūyūlaala ndūhū na wa kūkūkanga; bingī bakūyūkūkooba gīkī ūbagunanhe.

²⁰Alīyo a bahūbi, a miso gabo gakūbbopoma, pyī ī nzīla ja kūpeelela jikūbagaya, ū kwisagīlwa kwabo līkūbiza icha dūhū!