Read Sukuma Bible 2015 – Bibilia Ilagano Lya Kale 2015 Ayubu 12 Bible Online

Ayubu 12 - Sukuma Bible 2015 – Bibilia Ilagano Lya Kale 2015 bible

Ayubu 12

¹Hūna ū Ayubu ūshosha alīhaya,

²“Ee angū gashi a bing'we hū mulī banhū iyene, nīyo ūlū ng'ūcha, numho na a masala gaacha!

³Alīyo nū nene nalī nabo ū witegeleja gīt'ūbo mulī nabo a bing'we, mutanilebije mhayo gose gose. Ī gīsī nani ūyo atīmanile Ī mihayo yenīyī?

⁴Ū nene naabizile ndalahwa ī haha, nūūlū īkī nanombaga ū Mulungu waniigwa; naabizile wa kwikala akwineenelegejiagwa nūūlū īkī nalī ntūngīlīja, natī na shilingo!

⁵Ū munhū ūyo atī mu makoye, a maganiko gakwe gabūdalahile ū būluhi, awisaabile kūbiza inong'ho lya kwinhwa balelengetu.

⁶Ī kaya ja basambo jitabizaga mu makoye, na a babo bakīītaga ītigeleelilwe kūlī Mulungu balī mu mhola gwa; abo mulungu wabo bakamūchaga mu makono gabo.”

⁷Alijibūjage nūūlū ī shiinū, jikūkūlanga; nūūlū ī noni ja kūlala, jikūkūsomboolela.

⁸Nūūlū wīyombyī ī sī, nayo īkūkūlanga, nūūlū ī ndīlo ja mu nyanza ni jikūhwegejage.

⁹Ū mu shose shenīshi, shilī kinehe Īsho shitadeebile gīkī nkono go ng'wa Mulungu h'ūyo gwīyītile Ī yenīyī?

¹⁰Nguno ū būpanga bo shiseeng'wa shose būlī mu nkono gwakwe, nī myūyī ya banhū py'a bose.

¹¹Ī gīsī, ū gūtū gūtīdegelekaga mu kwīlola ī mihayo, gīt'ūmo lūlīmi lūkalojaga būsandūku bo shilīwa?

¹²Tūhaya ū witegeleja būlī mu bakūla kale, nū būlamu bo myaka mingī būkenhaga masala!

¹³A masala nū būdūla shilī kūlī Mulungu; pyī nū būganikīji nū witegeleja shilī shakwe.

¹⁴Īsho ūshisambaagūla wei atīho wa kūshizenga, ūlū ūnugalīla munhū hanhū, atīho wa kūnugūlīla.

¹⁵Ūlū ūgalemeja a minzī Ītūūtūla ī mbula, ūlū ūgalekela gize mu wiyaabī, Ī sī yūmilwa ihūūma.

¹⁶Ū būdūla nū būpyeni shilī kūlī we, a balomolomo na a balembagūlwa balī bakwe.

¹⁷Akapeejaga baganikīji baaja balī dalali, na a balamuji akabīītaga kūbiza bachilū.

¹⁸Akīnjaga banhū mu būsese bo batemi, a batemi wababohya ngwasho gwa nyasese mu nkīmbīlī.

¹⁹A bagabīji akabapeejaga baaja balī dalali, na a banhū ba būdūla akabagwishaga.

²⁰Abo bakakumīlījiagwa akabīngījaga ū būdūla wa kūloma, na a banamhala akabataajaga ū witegeleja wabo.

²¹A bakūjiwa nabo akabahooleelaga būdalahwa, na a ba nguzu akabīngījaga ū būdūla.

²²Īsho shiibisile mu giiti akashitendegesaga ha ng'wape, nī giiti h'ūmo shikūlīle akashigalūchaga shabiza isana.

²³Hū ng'wene akaginhaga būtaale a mahanga, pyī nū kūgagwisha hū ng'wene; hū ng'wene akagagalīhyaga, nū kūgasambaaja hū ng'wene dūhū.

²⁴A basugi ba banhū ba mu sī akabīngījaga wei ū witegeleja, wabaleka baaja bakūkoyaga mu matogolo gatī na nzīla.

²⁵Bakajaga bakūpaamagīlaga mu giiti, ndūhū isana lya kūbatiimīla, akabīītaga baaja bakūlelengetaga gītī bakolwa walwa.