Read Sukuma Bible 2015 – Bibilia Ilagano Lya Kale 2015 Ayubu 13 Bible Online

Ayubu 13 - Sukuma Bible 2015 – Bibilia Ilagano Lya Kale 2015 bible

Ayubu 13

¹A miso gane gībona pyī ī yenīyī, na a matū gane gīyigwa nūyitegeleja.

²Īyo ng'wīmanile a bing'we nū nene nīmanile, mutūnidīīmīla mu baana ba ng'holo.

³Ī ng'hūmbū jane jilī kūlūngalūnga nū Ndūji wa shose, ū Mulungu nahoye nang'hwe īyo īlīnikoya.

⁴Alīyo a bing'we mulīnibabaata na mabūlomolomo ging'we, mulī bafumu batī na ngofyoolo, bose pyī mulī gīko!

⁵Hambū hambū muhuumūle sele gete, ū gwene hū gūkūbiza gwa nyagosha[7] ū kū bing'we.

⁶Nidegelekagi chiza īyo nalīyīhaya Ī haha, yigwagi īyo nalīyīlomba na nomo gwane.

⁷Nibūlī mulīng'hayīlīja kībi gīko ū Mulungu? Nibūlī ng'wikale ng'ūhaya ya būlomolomo ha ng'wanya gwakwe?

⁸Mukwikala ng'ūyomba mu būsolanya gīko ha ng'wanya gwakwe? Mukūng'hayīla ū Mulungu Ī mihayo yakwe?

⁹Ī mihayo ying'we īkwikala mhola ūlū ūmugīsīlīja chiza amulole? Nūūlū hamo muliganika gīkī mudūgije kūnemba nang'hwe gīt'ūmo mukabalembelaga banhū?

¹⁰Ūlū mulikale mulīīta būsolanhya mu kwibisa bisa akūmuhama.

¹¹Ī likūjo lyakwe lītūmudetemya? Ī lyogohya lyakwe lītūmugwīla?

¹²Ī sumo jing'we ījo mulītūmamīla, sumo ja mabu ī jenījo; a mahangīgījo ging'we gatī na nīmo, Ī jenījo ndugu ja malongo.

¹³Huumūlagi munileke nayombe, īyo īliza yene ni īnisangage.

¹⁴Nibūlī nalitūūla mu kwihīga kūtaale gīkī, nū būpanga bone nabūdimīīle mu makono gane nene ngwenekīlī?

¹⁵Ū wei nūūlū akanibūlaga nahene, ū nene nang'wisagīlilwe wei dūhū; alīyo nakwīmīīla ū mu nzīla jane nūūlū kū būtongi bokwe.

¹⁶Hama ū gwenūyū gūkūbiza gwa kūnipīja ū nene, nguno ū munhū ūyo atī na logohano kūlī Mulungu atīko kwegeela hoi.

¹⁷Īdegelekagi chiza ī mihayo yane, a matū ging'we gīdime īyo nalīyīhaya.

¹⁸Nīyo īkī ī haha namalaga kwīhela Ī mihayo yane, nadeebile ū būtūngīlīja wane būkwiyolecha dūhū.

¹⁹Nani ū wa kūnihalalīja ūniheeba? Ūlū chene nakūhuumūla nache na kūcha.

²⁰Ee Mulungu, nizunīlījage mihayo ībīlī dūhū, a henaho hū natibisa ū kūlī bebe:

²¹Gūsundage ū nkono gwako gūnīngīle, hama oye ū kwikala ūnogohya na lyogohya lyako.

²²Hanuma ya henaho nitanage, nane nakwidīka; nūūlū ū nene nayombe, ū bebe ūnishokeje.

²³Ū būhūbi wane būlī būnga, nī shibi īsho nīīta shilī shinga? Noolekejage ū būkenaagūji bone nī shibi shane.

²⁴Nibūlī ūkwibisaga ū būshū wako, hūna waniisaaba gītī nalī ng'wanishi wako?

²⁵Ūkwikala ūluhya idūūtū lyūmu līkūheheejiagwa nyaga? Ūkwikala ūkūkūūbīlījaga meela mūūmu?

²⁶Nguno ūkūnandīkīlaga mihayo ya kūniminya, nī ya būhūbi wa ha būyanda bone ūkūnibalīlaga!

²⁷A magūlū gane wagabohije mbohyo, būlī kwene ūko nakūbītīlaga ūnilolile dūhū, nū mumo jikūpandaga ī mhambala jane ūlīyūtūūla meng'ho.

²⁸Nose ū kū ng'halīlo yaho ū munhū wa kūbiza gītī līshikolo lībolile, gītī ng'wenda gūliiwe fufuuji.