Read Sukuma Bible 2015 – Bibilia Ilagano Lya Kale 2015 Ayubu 14 Bible Online

Ayubu 14 - Sukuma Bible 2015 – Bibilia Ilagano Lya Kale 2015 bible

Ayubu 14

¹Ū munhū wa kūbyalwa na nkīma ī shikū jakwe ngehu no, nīyo jokalile makoye.

²Akafulumaga wabeelela gītī bonji, hanuma wanyaala ūma; atī wa kūshinga, akabītaga alīpeela gītī ng'wengeeji.

³Ūyo alī gīko ūkwikala wangomhaga? Ūtogilwe kūnishisha kū būtongi wako ūnilamule?

⁴Nani adūgije kūpandīka shikolo sheela kūfunya mu sha malofu? Atīho nūūlū ūmò!

⁵Ī shikū ja ng'wa munhū jihelilwe kwīngīīla kale, bebe ūlītūūlile ī lisaabu lya myeji yakwe; wantūūlīla na mbīmbī Ījo atīko kūjikīlanhya.

⁶Galūkīlaga kūngī ūleke ū kūnola, alīshikīlīje ī likanza lyakwe gītī ng'witūmamīja wa mheela.

⁷Ū ntī gūlī hambū hambū, ū gwene gūlī na kwisagīlwa; nūūlū gūūbbutwa gūkūsonga hangī, nīyo ī saapa jago jitī ja kūkalīka.

⁸Ī miji yaago īdūgije kūkwīja shikū ī hasī, nī lītindigishi lyaago lyūbiza gītī lyaacha ū mu malongo.

⁹Alīyo ūlū gūūpandīkwa fuulīīla ya minzī, haho na haho gūkafulumaga gwasonga saapa gītī ntī nagana.

¹⁰Ū munhū ng'wene ūlū ūlinda ūcha akajīkagwa, ūlū ūtīna ng'holò numho hū wajaga.

¹¹Ūmo minzī ga nyanza gakakamīlaga, nū mumo minzī ga mongo gakanweleelaga gwakalamuka,

¹²nū munhū akalaalaga gīko, ndūhū kūbūūka hangī; a banhū batalabūūka nūūlū kūmishiwa kūshisha lyīnge ī ligūlū,

¹³Hambū hambū ūlū ni wanibisa mu shigila,[8] ūnikundīkīja kūshisha būbīte ū būpelanu wako! Hambū hambū ni wanihelel'ikanza, hūna ūnizūkwa hangī!

¹⁴Ū munhū ūlū ūcha, akabizaga mpanga hangī? Ū mu shikū jane jose ī ja būtūmami bo milīmo midito nakūlindana, kūshisha līshike ī likanza lya kūtungūlwa kwane.

¹⁵Ūkwitana, nane nakūkwidīka, ūkūshikūmbūla ī shiseeng'wa īsho washibeeja na makono gako.

¹⁶A henaho hū ūkūnibalīla Ī nhaamulo jane, alīyo ūtūniisaabīla ī shibi shane.

¹⁷Ū būkenaagūji bone būkūbiswa mu mfuko, ī shibi shane ūkūshikundīkīja.

¹⁸Alīyo ūmo ngūlū jikaholomokelaga jashila, nū mumo iwe līkīngījiagwa h'ipandī lyalyo,

¹⁹nū mumo minzī gakapilingītījaga mawe, na mihūūmo ya mahululu ūmo Īkahūūmījaga malongo ga hasī, h'ūmo ūkankenaagūgījaga nū munhū ū kwisagīlwa kwakwe.

²⁰Ūkang'heebaga kamò na kamò, hūna wajimīīla ilalī; ī lihanga lyakwe ūkangalūchaga hūna wang'wīnja gete.

²¹A bitūnja bakwe ūlū bakwinhwa ikūjo atūmana; nūūlū būdalahījiwa nahene atīko kūgūbona ū gwenūyo.

²²Ū wei akwiyigwa ū kūsaatwa ū mu mīlī gwakwe, na akwilīla mazumanda ng'wenekīlī.