Read Sukuma Bible 2015 – Bibilia Ilagano Lya Kale 2015 Ayubu 15 Bible Online

Ayubu 15 - Sukuma Bible 2015 – Bibilia Ilagano Lya Kale 2015 bible

Ayubu 15

¹Hūna ū Elifazi muna Tema ūshosha alīhaya,

²“Ū munhū wa masala akūshosha mihayo midūhū gīko, akwikala okajaga nda yakwe myūyī ya lūyaga lūkalamuku lwa kīya?

³Ashikile kūhalalīla bo mihayo Ītī na ntwe na magūlū, na kalūngalūngīle katī na fiilū gīko?

⁴Nguno ī haha nū logohano lwa ng'wa Mulungu walūponyaga, nū gwa kūng'widedeeng'hanya ū Mulungu ūlīgūhangīja.

⁵Ī shibi shako hū shene shilīgūlanga ū nomo gwako ī ya kūyomba, wagwashije kayombele ka nyasala sala.

⁶Nomo gwako h'ūyo gūlīkūkaanīla būhūbi ītī gwane; bebe ng'wenekīlī gūlīkūbūūla ū nomo gwako.

⁷Ī gīsī, ū bebe h'ūlī wa kwandya kūbyalwa ū mu bose? Ū bebe wabeejiwa kūfuma aho ngūlū jitaalī kūbiza ho?

⁸A hene ū bebe ūkabūdegelekaga ū būganikīji bo ng'wa Mulungu? Nūūlū hamo ūkiganikaga gīkī pye a masala galī mulī bebe dūhū?

⁹Shikolo kī īsho ūshimanile ū bebe a bise tūtashimanile? Mihayo kī ī mitengeke īyo ūlīnayo ū bebe, a bise tūtī nayo?

¹⁰A bakūla kale a ba nzwīlī jape hū tūkikalaga nabo a bise; a banamhala ba kale kūtinda nū so.

¹¹Ū būlūngūja bo ng'wa Mulungu, Ī mihayo īyo ūkūmanagūwīlwa mu būlembeezu, īlīkwileba?

¹²Nibūlī ī ng'holò yako īlīkūjaananīja? Nibūlī ūlīkwīja mbyūla miso gīko?

¹³Īkī nose wampelanīlile ū Mulungu, kūshisha ūlitagūla mihayo sagala kūfuma mu nomo gwako!

¹⁴Ū munhū nang'hwe alī kī nose abize ng'wela? Ūyo abyalilwe na nkīma alī shikolo kī nose abize ntūngīlīja?

¹⁵Ū Mulungu ūlū waleka kūbasanya a beela bakwe, ūlū nī ligūlū lyabiza lītī lyeela ū kū būtongi bokwe,

¹⁶sumbagwa na munhū ūyo alī wa malofu na akikalaga wibbuka mu shibi, nū būbi akabūkwelelaga gītī akūng'waga minzī!”

¹⁷Nidegelekage nakūsomboolele, lembeelaga nakūwīle īyo nībona ū nene;

¹⁸Īyo bīhaya banhū ba masala mu būtūbisa nūūlū gūmò ū mu yose īyo bīpandīka kūfuma kū bataale babo.

¹⁹(A benabo h'abo bakinhwa ī sī, ngeni nūūlū ūmò atizile kwiguulanya nabo).

²⁰Ū munhū wabūbi akakoyaga na mayanga pyī ī shikū jakwe, pyī ī myaka īyo ahelelilwe ū ng'wiboneeji.

²¹Ū mu matū gakwe akūmanigwa malaka ga kogohya, ūlū ūbiza gītī wifuula hado, akūhayimanīla wadumīlwa biboneeji!

²²Akamalaga gete ū kwisagīlwa gīkī akūshipūlūgūka ī giiti, ameng'hilwe kūlwa līlūshū!

²³Akūmanūhūhūūlīja ūko na ūko; alīyo alī shilīwa sha mbeeshi, amanile ū lūshikū lwa giiti lūtī kūle.

²⁴Alī na makoye mataale na kūzwangana kūlwa boobà; ī yenīyī yīnkiimaalīlile gītī ntemi aliza kūndumīla mu būlūgū;

²⁵yose yenīyī īkūng'wikīīla kūlwa kūgoloola nkono gwakwe kwilwisha na Mulungu; kūlwa kūng'wigīmba gīmbīla ū Ndūji wa shose,

²⁶akūndaalulīlaga na lūgiili giili gīkī ilwishe nang'hwe, kūnū abūkije lūmūda lūdaamu lūdito.

²⁷Nūūlū akagīna kūshisha ū būshū bokwe bookala pa, nī lidako litūlīīla pa kūlwa mazezele.

²⁸Alīyo nahene ū wingīji bokwe būkūbiza mu mizengo ya mafuluka, mu numba jitī ja kwikala mo banhū, misaka ya numba jigwile.

²⁹Atūdūla ū kwikala alī nsabi, nī sabo jakwe jitikala ho, ū būsabi bokwe būtīko ū kūtana na kwiyongeja ū mu sī.

³⁰Atūshiiliga ī giiti; lūlali lwa moto lūkūjinyaalīka ī saapa jakwe, myūyī ya mu nomo go ng'wa Mulungu īkūmūcha īng'wīnje ho.

³¹Ni atizagilemba kūlwa kwisagīlwa mabu ng'wizungu, nguno atūpandīka mheela yose yose.

³²Ī mheela yakwe akwinhwa mu būshikanu bose nūūlū aho lītaalī ū kūng'wa ī likanza lyakwe, na a matambī gakwe gatūfuluma.

³³Akūbiza gītī nzabibu kūholoosha,[9] gītī ntini kūlagaja būlabo wago.

³⁴Nguno a magelè ga bahūnga gatūpandīka matwajo, abo batogilwe kūhongwa ī ng'hambī jabo jikūkūbīkwa moto.

³⁵Bakabūūchaga nda ja makoye baayūbyala būbi, ī ng'holò jabo jikikalaga jūhela ya kūnyeekeja banhū.