Read Sukuma Bible 2015 – Bibilia Ilagano Lya Kale 2015 Ayubu 18 Bible Online

Ayubu 18 - Sukuma Bible 2015 – Bibilia Ilagano Lya Kale 2015 bible

Ayubu 18

¹Hūna ū Bilidadi ū muna Shūha ūshosha ūhaya,

²“Ū bebe, ūkwikala walīlīja mihayo kūshisha nanalī? Iganikage, hūna tūlūngalūnge.

³Nibūlī a bise tūlībalwa kūbiza gītī tūlī mitugo, na kūbonekana tūlī babbūūlī ū mu miso gako?

⁴Ū bebe ūmo ūkwitandagūlīlaga ng'wenekīlī kūlwa būpelanu gīko, hū ūliganika ī sī īkūlekanījiwa kūlwa nguno yako? Nūūlū ī shiganga shikūsaamiwa a ha wikikalo washo?

⁵Ī chenge sha munhū wabūbi shikajimiagwa na kale, nī ndali ja moto gwakwe jaasota.

⁶Ī lisana lya ng'wiheema lyakwe līkagalūkaga kūbiza giiti, nī tala īyo alī bbihī nayo Īkajimaga jimijimi.

⁷Ī nguzu ja kashimīzīle kakwe akīngījiagwa, ī nyasala sala ya kahelele kakwe Īkangwishaga wei ng'wenekele.

⁸Ī mhambala jakwe jikantūngīījaga mu lūtu, hūna wayitaligīnjiwa mitego būlī kwene ūko alīgalūkīla.

⁹Ī haha agwashiwe lūtu kwishigina, ntego gūng'hagije atīko kūsegeja.

¹⁰A hasī lūlīho lūtu ategilwe; gūlīho ntego gūbangilwe, hūna gūbiswa ū mu nzīla yakwe.

¹¹Ūko alagalūkīlage līlīko lyogohya līkūng'wibakījiaga, nīyo līkūnkūūbīlījaga būlī kwene ūko alībītīla.

¹²A mayanga gantuubīīlile kībi no, ū būkenaagūji būnindīīlile agwe.

¹³Nīyo ī haha būlīīlīlya ī likūnza lya mīlī gwakwe; ng'wana tangī w'icha alīgūlya ū mīlī gwakwe.

¹⁴Alīhulumūlwa kwīnjiwa ū ng'wiheema lyakwe īlo alīsanije; alītongekwa kūja kūlī ntemi wa lyogohya.

¹⁵Ū ng'wiheema lyakwe gūlīmo moto, ū wikalo bokwe witīīlilwe būgota bo shibiliti, būkūligimaga moto.

¹⁶Ū mu gatī ī miji yakwe īlūūma, nū kwigūlya a matambī galīnyaala.

¹⁷Ī shizūkījo shakwe ū kū banhū shashilile ū mu sī, ī lina lyakwe lyajimīīlile ū mu matogolo.

¹⁸Waponyiwe kūfuma ng'wisana kūja mu giiti, wapeejiwe īnge ū mu sī.

¹⁹Atī na baana nūūlū būbyīle ū mu banhū bakwe, ndūhū wa kūsaagīīla aho walikalaga.

²⁰A bikaji ba ng'weli īlībajinjimaja Īyo yang'wilongelile, a bikaji ba kīya nabo baagwīlilwe igekemaja.

²¹Ū wenūbū hū wikalo wa munhū wabūbi, ipandī lyakwe ūyo ataamanile Mulungu.”