Read Sukuma Bible 2015 – Bibilia Ilagano Lya Kale 2015 Ayubu 2 Bible Online

Ayubu 2 - Sukuma Bible 2015 – Bibilia Ilagano Lya Kale 2015 bible

Ayubu 2

¹A baana ba ng'wa Mulungu biza hangī lūshikū lūngī kwiyoolecha ū kū būtongi bo ng'wa SEEBA, nū Shetani wiza hamò nabo hangī, kwiyoolecha nang'hwe ū kū būtongi bo ng'wa SEEBA.

²Ū SEEBA ūng'wīla ū Shetani, “Bebe ūlīfuma halī?” Ū Shetani ūnshokeja ū SEEBA, “Nalīfuma kwīyeleela ī sī, nalūbīta bītaga moi.”

³Ū SEEBA ūmūja ū Shetani, “Ūlīng'wiganikīla ginehe ū ntūma one ū Ayubu? Nguno atīho munhū ūngī ū mu sī, ūyo ang'ogohile Mulungu gītī ng'wenūyo; atī na shilingo, hama ntūngīlīja jigi. Ū būbi atatogilwe kwiyegeela nabo, nū wishigwa bokwe ataalī adimanile nabo nūūlū īkī ūkanenhela mihayo, gīkī nang'wītīle yabūbi nū mhayo ndūhū.”

⁴Ū Shetani ūnshokeja ū SEEBA ūhaya, “Angū shimbi na nkoba.[1] Ū munhū ashikile kūshifunya pyī īsho alī nasho kūlwa būpanga bokwe!

⁵Aligūgoloolage ū nkono gwako ūgūkuumye ū mīlī gwakwe, iguha na nofu; akūkūsondagūla haha yenīyī bo loleele!”

⁶Ū SEEBA ūng'wīla ū Shetani, “Ūlītūngīlīja; alilūūlū, ī haha alī mu nkono gwako, kwike yaya ū kūbūkuumya ū būpanga bokwe.”

⁷Hūna ū Shetani wīnga ū kū būtongi bo ng'wa SEEBA; ūūkangwisīja ū Ayubu malonda mabi no, gūgūjimya pyī ū mīlī, kwandīja kū mhambala kūshisha kū londooji lwa ntwe gwakwe

⁸Ūsola ijilinjo lya kwihalaatūlīla, hūna ūbiza wa kūyikala igashije mu mabu akwihalaatūlaga!

⁹Kwimanīla ū nke wakwe wang'wīla, “Ū bebe, ūtaalī ūdimanile nalyo dūhū ī lībūsanyiwa lyako? Ali'ū kūndūkagūla ū Mulungu wichīle na kwichīla shi!”

¹⁰Alīyo ū wei ūng'wīla, “Ū bebe ūlīhaya ūmo bakahayīlaga bakīma bachilū! Ī shawiza h'īsho tūyanukūla ū kūfuma ū kūlī Mulungu, yaya ī shabūbi?” Ū mu yose yenīyī, ū Ayubu atītile shibi ū mu mihayo īyo akīhaya.

¹¹Ū Ayubu walī na banwani biye badatū, Elifazi muna Tema, Bilidadi muna Shuha, na Zofali muna Namatī. Bahayūyigwa ī mibi bi bi īyo īkangwīla yenīyī, būlomana bizunīlīja kūjūngīsha na kūnūngūja; hūna bīnga ū kū kaya jabo.

¹²Aho banoleela bataalī ka kūle, būkoya ū kūng'witegeleja; hūna būtandūka kūlīla ng'hūngū, būtandūla nī shizwalo shabo, bisaamagūlīla na mabu ū kū mitwe yabo.

¹³Hanuma bifudīka hasī hamò nang'hwe; bikala balī gīko dūhū sele sele, kūshisha shikū mpungatī, līīmi na būjikū. Nguno bakabona gīkī ū kūsaatwa kwakwe kwalī kūtaale no, kūtī na kasomboolele.