Read Sukuma Bible 2015 – Bibilia Ilagano Lya Kale 2015 Ayubu 21 Bible Online

Ayubu 21 - Sukuma Bible 2015 – Bibilia Ilagano Lya Kale 2015 bible

Ayubu 21

¹Ū Ayubu ūshosha hangī ūhaya gīkī,

²“Īdegelekagi chiza ī mihayo yane, hū mukūpandīka ī mihayo ya kūnilūngūja.

³Iyūmīlījagi munidegeleke namusomboolele, hūna ūlū nūmala ū kūmusomboolela, ng'ongeje ū kūnigīmba nyachilū.

⁴Ī gīsī, ū nene nalīng'wiyandīīla munhū? Hama nibūlī natizūlemeelwa ū kwiyūmīlīja?

⁵Nilolagi, mujinjimale, hūna ng'witūle itama!

⁶Ūlū nayideedeng'hanya ī mihayo yenīyī nakogohaga; pyī ū mīlī gwane gūkūdetemaga.

⁷Nibūlī a bahūnga bakalamaga shikū ningī, kūshisha banamhaala, bayūja bakongejaga dūhū ū kūkwīja ū būdūla?

⁸Na a baana babo bakababonaga ūmo bakahangamīlaga, ī shibyalīlwe shabo bakashilūmbaga ū kūshibona!

⁹Ī kaya jabo jilī mhola hangī jitī na boobà mu mhayo gose gose, hama nū nang'ha go ng'wa Mulungu gūtajikuumyaga.

¹⁰Ī nzagamba jabo jitī na makoye nū mhayo gwa kūbyaja, ī mbogoma jabo najo jikabyalaga ndūhū nūūlū kūtaaja hado.

¹¹A babyalwa babo bakafumīlaga biyaala gītī madaale ga ng'holo, a baana babo bakasadagūkaga kīngī nasho.

¹²Bakīmbaga kūnū bakūtūlaga shitumba[13] na malimba, kūnū na mbiilulu jikongelelejaga a ha būyegi wabo.

¹³Ī myaka yabo bakīkalīchaga balī mu kwīlūkīlwa kwawiza, hūna baagung'wa mu shigila balī mu mhola.

¹⁴Ū Mulungu baakūyūng'wila, ‘Bebe tūlekage a bise! Tūtī na nguno ya kwikoya kūjimana nzīla jako!

¹⁵Ū Ndūji wa Shose nang'hwe nani nose tūntūmamīle? Tūkūpandīka kī ūlū tūnomba?’

¹⁶Alīyo nahene ū kwīlūkīlwa kwabo kūtī mu makono gabo; hūna lūūlū ū nene yaya ū kwisanja mu mahooya ga bahūnga.

¹⁷Kwike wabona ng'hangala jinga Ī tala ya bakenaagūji yajimiagwa? Ng'hangala jinga gakabagwīlaga a mayanga gabo? Wabona kanga ū Mulungu wabagwisīja ū ngabo ūyo abahelelile kūlwa kūmpelanya?

¹⁸Hama nīyo babange gītī mapalala mūūmu kū lūyaga, gītī meela ayo gakaheheejiagwa nshūūlūlū!

¹⁹Gūkahayiagwa gīkī, ‘Ū Mulungu akagūbīkaga ū nsango gwa ng'hūbi kūlwa baana babo;’ ni anīpīlage shiilī būlī ng'hūbi wei ng'wenekīlī ilolekeje.

²⁰A makoye gakwe ni agilolekejage na miso gakwe we ng'wenekele, abūkwelele ū būpelanu bokwe ū Ndūji wa shose.

²¹Nguno ūlū lyūkalīka ī lisaabu lya myeji īyo ahelelilwe, alī na makoye kī nayo ī kaya yakwe īyo alīyīleka?

²²Alīho ose ose ūyo adūgije kūnanga masala ū Mulungu, alīyo hū wei akabalamulaga na a bakūjiwa a bataale?

²³Alīho munhū akūcha ngīlīng'hanu, ūsangwa alī mu mhola no, hangī alī mu kwifuula kūtaale,

²⁴ū mīlī gwakwe gūfulile maguta, a maguha gakwe gookalile mhongo gakūfuutīlaga.

²⁵Na ūngī akūcha, ūja asaayile ū mu ng'holò yakwe, wīnga ataalī nūūlū kūloja shawiza shose shose.

²⁶Alīyo a bose bakalambalalaga mu lūbuubu bihela, bose pye jikabakundīkījaga ī ngino.”

²⁷Nīmanile no īyo mulīyiganika, ī long'we ying'we īyo mulomanile kūlwa kūnihūbya.

²⁸Mulīyiwīla gīkī, “Īlīhe ho lūūlū ī kaya ya ntaale; jilīhe ī numba ījo jiikalīlagwa na banhū babūbi?

²⁹A bing'we mutaalī ū kūbabūūja a bashimīzi? Nūūlū hamo mutīdīīlīlaga īyo bakīhayaga;

³⁰Ī gīkī ū ng'hūnga akalekejiagwa ū mu lūshikū lo mayanga, akapījiagwa ū mu lūshikū lwa būpelanu?

³¹Nani ashikile kūgima kūng'hama bo hape hape kūlwa nhūngwa jakwe? Nani ū wa kūnīpa shiilī kūlenganīla nū mumo wītīlaga?

³²Akabūūchiagwa dūhū kūtwalwa mu shigila, nī shigila shakwe shikūlang'hanwa chiza no nīyo.

³³A masalū ga ng'witongo gakanonaga no ū kūlī we; nīyo pye a banhū bakūmanūnondeela, na a babo baatonga kūja koi bingī no, batī na būbalīle.

³⁴Ning'we mukūnilūngūja kinehe na mamihayo ging'we gatī na ntwe na magūlū gīko? Ū mu mashosho ging'we ndūhū mo gwa kūpya, ūlū ītī būlomolomo dūhū!”