Read Sukuma Bible 2015 – Bibilia Ilagano Lya Kale 2015 Ayubu 22 Bible Online

Ayubu 22 - Sukuma Bible 2015 – Bibilia Ilagano Lya Kale 2015 bible

Ayubu 22

¹Hūna ū Elifazi wa Tema ūshosha hangī gīkī,

²“Ū munhū adūūgije kūbiza wa solobo ū kūlī Mulungu? Nūūlū akabiza na masala no adūgije kūbiza na solobo kī ū kūlī we?

³Ū bebe nūūlū ūbiza ūlī ntūngīlīja, ūlī na kī ī sha kūnyeja ū Ndūji wa shose? Akūpandīka solobo kī nūūlū ūkabiza na nzīla jitī na shilingo?”

⁴Ūliganika alīkūhūgūla na kūkūlamula kūlwa logohano lwako kūlī we?

⁵Ū būbi wako būtī būtaale no? Ī shibi shako shitakīlanīgije no, nose shitī na būkalīkīle?

⁶Nguno ūkadimaga ndiimīli kūfuma kū badūgūyo nūūlū ītīho nguno, na a banhū ūkabataagījaga shizwalo shabo wabaleka balī dūūhū!

⁷Ūlemile kwinha banhū minzī ga kūng'wa h'ūmo bakolelwe notà; nū munhū h'ūmo atuubile ūtazunije apandīke shilīwa sha ha ng'wako,

⁸nūūlū īkī ūlī na būdūla na nguzu, hangī ūlī nkūjiwa wa sī ngalī īyo wīsugile.

⁹A bachīlwa[14] ūkabapeejaga baaja ng'hono ndūhū, na a bapīna[15] ūkabamalīīgījaga nī nguzu ī ngehu ījo balī najo.

¹⁰H'ī chene ī haha ūpīndīlījiwe mitego pye hose hose, h'ī nguno ya kwifumbūkījiwa nhabaala ya kūkūzwanja gīkī,

¹¹Ī haha ūpīndiwe giiti ūtūūbonaga, n'ihūūma lya minzī lyakūkundīkīgije!

¹²Bebe, ū Mulungu atī kwigūlya ng'wigūlū? Lolaga nūūlū ūko jilī ī sonda, kwigūlya no!

¹³Alīyo ū bebe walinhyaga kūhaya, “Ū Mulungu akūmana kī? Adūgije kūfunya būlamuji kī ūmo giiti sha gamha shimpīndije gīko?

¹⁴Ashīkījiwe malunde madito no, atīko ū kūtūbona ūlū akūyela yelaga ū kū mpīndo y'igūlū kwenūko!”

¹⁵Ūkwikala mu nhūngwa ja kale Ījo baajilondeelaga banhū babūbi?

¹⁶A benabo bakasolagwa ī ngelo y'ikanza lyabo ītaalī ū kūshika, ī misingi yabo īkahūūmiagwa ihūūma lya minzī.

¹⁷Nguno bakang'wilaga ū Mulungu, “Bebe tūlekage a bise! Ū Ndūji wa shose akūtwītīla kī?”

¹⁸Alīyo hū ng'wene akajookajaga shikolo shawiza ī numba jabo; ū nene yaya ū kwisanja mu mahooya ga bahūnga.

¹⁹A batūngīlīja ūlū bībona Ī yenīyī bakayegaga, abo batī na shisembo bakabasekaga mu kūbabbyeeda,

²⁰kūnū balīhaya, “Ng'wababona a banishi bise, baakenaagūlwa nī sabo jabo janogotejiwa moto.”

²¹Alilūūlū, idoohyage ū kūlī Mulungu ūbize na mhola ū kūlī we; ū mu gīko hū ūkūbūpandīka ū wiza.

²²Igwaga īyo alīkūlanga na nomo gwakwe, wītūūle mu ng'holò yako Ī mihayo yakwe.

²³Ūlū ūnshokela ū Ndūji wa shose, ūkūshoshiwa ūmo walikalīlaga ī kwandya. Ūlū ūlekana nū būbi, ūbūponya kūle nī ng'hambī yako,

²⁴ooya ū kwikala wadīlīīlaga[16] zahabu jako, nī zahabu jako ja kūfuma Ofili ūjileka kū mawe ga kū mahululu,

²⁵a henaho ū Ndūji wa shose akūbiza zahabu ū kūlī bebe, na feza jako ja mpango ntaale.

²⁶Ū mu gīko hū ūkūnyegela ū Ndūji wa shose, nū būshū wako ūkūmūūkīja Mulungu.

²⁷Ūkūnomba nang'hwe akūkwigwa, ūkwīshikīlīja īyo wang'wilahīlīla.

²⁸Īyo wiganika kwīyīta īkūshikīlījiwa, hūna nī lisana līkūkūtwimīla ū mu nzīla jako.

²⁹Abo bakūdalahījiagwa ū bebe ūlū wahaya, “Bagūngūhyagi” a henaho akūbapīja abo bakūdalahījiagwa.

³⁰Akūmpīja nūūlū ūyo alī mu kwihīga, ū ng'wenūyo akūpījiwa kūlwa wela wa makono gako.