Read Sukuma Bible 2015 – Bibilia Ilagano Lya Kale 2015 Ayubu 23 Bible Online

Ayubu 23 - Sukuma Bible 2015 – Bibilia Ilagano Lya Kale 2015 bible

Ayubu 23

¹Nang'hwe ū Ayubu ūshosha,

²“Kūshisha nī lelo īyī nataalī niyanda kūlwa kūminyiwa kūtaale, nakūgang'hīlaga alīyo ū nkono gwakwe gūtaalī gūnisheedekegije.

³Gīt'ūlū ūlū ni namanile a ha kūmpandīkīla, nūshika aho akikalaga!

⁴Ni nansomboolela īyo īlīnikoya, ū nomo gwane ni gwakwīja no a malang'wa.

⁵Ni nīdeeba ī mihayo īyo atogilwe kūnishokeja; nīyitegeleja īyo alīniwīla.

⁶Ū wei ni wabūtūmamīla ū būdūla bokwe kūnifīīkīlīja gete? Ītī gīko yaya, ni wanidegeleka.

⁷Munhū ntūngīlīja ni wang'wibūūlīla nang'hwe ū kwenūko; hūna ū nene ni nīnjiwa ū mu nkono gwa namuji wane nūpīla ilalī.

⁸Alīyo nalihamba ū kūja ī kīya nangayiwa, nūūlū naaja ī ng'weli natūmonaga.

⁹Ūlū alītūmama kū lwandī lwa sukuma natūmonaga, nūūlū wagalūkīla dakama ndūhū kūng'wilabya nūūlū hado.

¹⁰Alīyo ayīmanīle ī nzīla yane, ūlū ūmala ū kūnigema nakūfuma nalī ng'wiza no gītī zahabu.

¹¹Ī mhambala jane jikūbītīlaga mu kashimīzīle kakwe, nalī mu nzīla yakwe gwa, nataalī ū kwīleka.

¹²Ī shilagīlo sha kūfuma mu nomo gwakwe nataalī ū kūlekana nasho; ī mihayo ya nomo gwakwe nīlang'hanile no, kūtinda shilīwa shane sha būlī lūshikū.

¹³Kwike ū wei alī iyene, nani adūgije kūng'halalīja? Akīītaga gīt'ūmo atogelilwe.

¹⁴Nguno hū ng'wene ū nshikīlīja wayo īyo anihelelile, nīyo alī nayo mingī ī ya mbika yenīyo abīkile.

¹⁵H'ī chene nalī na boobà būtaale ū kū būtongi bokwe; ūlū nayizūkwa pyī ī yenīyī nakūng'ogohaga no.

¹⁶Ū Mulungu wanigwishije ng'holò, ū Ndūji wa shose wanogohije no.

¹⁷Alīyo ū kūhuumūjiwa na giiti yaya, Ī giiti sha gamha īsho shinikundīkīgije kū būshū wane.”