Read Sukuma Bible 2015 – Bibilia Ilagano Lya Kale 2015 Ayubu 24 Bible Online

Ayubu 24 - Sukuma Bible 2015 – Bibilia Ilagano Lya Kale 2015 bible

Ayubu 24

¹Nibūlī ū Ndūji wa shose atahelaga ī likanza lya būlamuji bokwe? Ni kinehe abo bang'witegelegije bakajiisagīlagwa ī shikū jenījo alīyo ndūhū ū kūjibona?

²Balīho banhū bakasaamyaga meng'ho ja ha mbīmbī, na bakadīīmaga madaale ga ng'holo ja kūdaatya mu wiboneeji.

³Bakatulaga nzobe ja bapīna bajaana, na kūsola ng'ombe ja bachīlwa gīkī jibize ndiimīli.

⁴Bakabahagagūlaga a bagayiwa baabīnja ū mu nzīla; a bahabī ba mu sī baayūbasambaaja nose baayikala bibisaga.

⁵A bahabī bakatūmamaga milīmo gītī nzobe ja kū matogolo, bakūkoobaga shilīwa mu masaka; a baana babo bakabalishaga sha kūkwemeleja mu matogolo madūhū.

⁶Bakajaga bakūsīngījaga mu malaale kūkong'onheja sha būyaga būyaga, na kūmanūpūmbīīla mu migūnda ya mizabibu ya banhū bibonya.

⁷Bakawejaga ū būjikū balī dūūhū batī nasho ī shizwalo, ī mbeho h'ūmo īkūlīle batī nasho Ī sha kwikumba.

⁸Mbula na mbula[17] jikabigatīīlaga mu ngūlū baalekwa baasedeekaga, batī na ha kūūbīla ūlū ītī kwishishinīka mu mahalo ga mawe dūhū.

⁹Ū ng'wana ūyo wachīlwa ise akahulumūlagwa wīnjiwa ha lūbeele, baana beleele ba bahabī bakasolagwa kūbiza ndiimīli.

¹⁰Bakashimīzaga dūūhū kūlwa nguno ya būzuuka; ī mikīmba bakībūūchaga alīyo ū kūnū būminyiwa būtamo.

¹¹Ī mizeituni bakīkamaga a maguta, nī mizabibu bakīpandagīlaga ū mu makamīlo bakūbeejaga divai, alīyo ī notà yaya ū kūshila.

¹²Kūgang'hīla kūtaale kūlīho ū mu mizengo kūlwa banhū abo bakūchaaga, ng'holò ja banhū bingī ījo jilabūkile jikūdaayaga jūkooba kūgunwa; alīyo ū Mulunga ndūhū nūūlū kūbūdīīlīla ū būbi ūbo būlīho.

¹³Balīho abo balīlemile ī lisana, nī nzīla jalyo batatogilwe ū kūjiitegeleja, nū kwikala mo balemile.

¹⁴Ī lisana lya līīmi ūlū lyūshila, ū nyoli[18] akabūūkaga wandya kūbabūlaga a bahabī na a bagayiwa; ū mu makanza ga būjikū wa kūja akwibaga.

¹⁵Ī liso lya nshihani līkalindaga yabiza ka munhū ūyo; a henaho h'akwiwīla, “Lītīho liso lya kūnibona;” hūna wikundīkīja ū kū būshū atizūmanwa.

¹⁶A basambo mu makanza ga giiti bakakambūlaga numba bingīla, alīyo ī līīmi bilugalīja mu kaya; ī lisana batī nalyo nīmo.

¹⁷Nguno pye a bose ī giiti sha gamha h'ī dilū yabo; nīyo ī mihayo ya mu giiti ī ya kūdetemya banhū, h'īyo banwanile nayo.

¹⁸Alīyo nahene a boi balī mafulo geleelile higūlya ya minzī; ū ngabo gwabo ū mu sī gūzumilwe, nose atīho ūyo akatūngīīlaga kū migūnda yabo ya mizabibu.

¹⁹Ūmo būsebu wa līīmi na būūmà shikīngījaga minzī hūūma kūlū kūlū, h'ūmo shikabīngījaga nī shigila a bīīti ba shibi.

²⁰Ī nd'ījo jababyala jikabīībaga, bakabizaga shilīwa sha ngino, a babūbi atīho wa kūbizūkwa hangī; alīyo bakūbīnzagūlwa gītī līntī.

²¹Nguno ū ngūmba nū nkīma ūyo atī na ng'wana bakang'wiboneelaga; nūūlū nkīma ūyo wachīlwa ngoshi batansaatagwa.

²²Alīyo a ba nguzu ū Mulungu akabagwesaga na būdūla bokwe; nūūlū bakome miji batī na kwisagīlwa kwa kūlama.

²³Adūgije kūbazunīlīja bibone gītī gīkī balī mu mhola, alīyo a miso gakwe gajibonile dūhū Ī nzīla jabo.

²⁴Bakagūngūhiagwa kakanza kado, alīyo batadīīlaga ū kūbīta baaja; bakichiagwa ha sīlīlī bakumingwa gīt'ūmo bakīītīlagwa dūhū pye a banhū, bakagesagwa gītī mangala ga būsīga.

²⁵Ī yenīyī ūlū ītī chene, ni igelage wa kūnikaanīla gīkī nalīlomaloma, ooleche nī gīkī nalīyomba mihayo ītī na gwa kūpya.