Read Sukuma Bible 2015 – Bibilia Ilagano Lya Kale 2015 Ayubu 26 Bible Online

Ayubu 26 - Sukuma Bible 2015 – Bibilia Ilagano Lya Kale 2015 bible

Ayubu 26

¹Ū Ayubu nang'hwe ūshosha hangī,

²“Ee nang'ho ī gīko ūlī ngunanhi wabo abo batī na nguzu! Na a ba makono magokolo ūlī nguzuhya wabo ng'hana!

³Hama ūlī nganikīji wa banhū abo batī na masala! Nī mihayo ya būdeeba būshimu ūlī nayo mingī!

⁴Ī gete nani ū ngunanhi wako ū mu kūyomba mihayo īlī gīko? Nū moyo ūyo gūlī mulī bebe go ng'wa nani?

⁵A bafu ū mu kūlimu balī mu makoye madito; nī shiseeng'wa sha mu minzī, nī shingī pyī īsho shikikalaga mo.

⁶Ī kūlimu īlī ng'waje ū mu būtongi bo ng'wa Mulungu; nī Abadoni[19] īlī hape, ītibisile.

⁷Ī ligūlū lya sukuma wei alyambile higūlya aho līlī, nī sī ayītūūlile yeleela higūlya ya kūdūhū.

⁸A minzī akagabungaga mu malunde gakwe madito, alīyo a malunde gatatuumūkaga kūlwa kūbunwa.

⁹Ū ng'weji akagūshīkījaga gwajimīīla, akasambaajaga malunde gakwe gagūshīkīja.

¹⁰Atūūlile lūmeng'ho a higulya ya minzī ga nyanza, lūbize lūbīmbī lwa kūlekanya isana na giiti.

¹¹Ī ng'hīngī j'igūlū jikazugumaga, jikajinjimalaga kūlwa kahamīle kakwe.

¹²Ī nyanza īkalibangūkaga kūlwa būdūla bokwe, nī Līlahabu akalībbutagūla mapingili mapingili kūlwa masala gakwe.

¹³A mapandī g'igūlū agagaliilile na myūyī yakwe, ī liyoka lya kūlala akalīchima na nkono gwakwe we.

¹⁴Ū mu shītīle shakwe ī yenīyī ya ha mhuunīlo dūhū, nī yakwe īyo tūkīyigwaga īlī mu mahwehwe dūhū. Ū ng'hilimo gwa nguzu jakwe nani ūyo adūgije kūgwitegeleja?”