Read Sukuma Bible 2015 – Bibilia Ilagano Lya Kale 2015 Ayubu 28 Bible Online

Ayubu 28 - Sukuma Bible 2015 – Bibilia Ilagano Lya Kale 2015 bible

Ayubu 28

¹Līlīho ipandī ūko būtundo bo feza būkasīmbagwa, n'ī lipandī lya kwegejiwa zahabu līlīho.

²Nī chūma shikafukūūlagwa mu maseni ga hasī, ī shaba nayo īkaabiagwa kwīnga mu būtundo.

³Ū munhū akashipeejaga ī giiti, hūna ongeja kūsīmba alīkolobela mu gatī akūkoobaga būtundo, kūshīsha kūle kū giiti sha gamha.

⁴Akajaga kūle ūko banhū batikalaga, nūūlū mhambala ja banhū jitaalī kūpanda; hūna wakasīmba machongo mashimu kwenūko, walibīla kolobe kolobe akwilunhyaga na kwinungeleja ng'wenūmo.

⁵Ī sī īyo banhū bakīlīmaga shiigela shilīwa, ū mugatī yaho īkagalūchiagwa habiza gītī moto.

⁶Ū mu mawe gayo jikilongaga mo safilo;[22] nū mu lūbuubu lwayo jilīmo zahabu.

⁷Noni yose yose īyo īkalyaga nyama ītīmanile ī nzīla yenīyo; nūūlū liso lya lūbala lītaalī kwībona na hado yaya.

⁸Shiinū nibonya yose yose ītīko kūshimīzīla ū mu nzīla yenīyo, nūūlū ī shimba ītaalī kūpanda ko.

⁹Nkono gwa munhū gūkapaanagūlaga iwe h'ūmo līdaamīle, nī ngūlū akajisīmbagūlaga kūshisha jaseesagūka.

¹⁰Akatandūlaga migoka mu matale, a miso gakwe gībona pyī ī sabo īyo īlīmo.

¹¹Akalondejaga kū mbūūkī ya myongo wakasīmba na kūjūkūūla īsho shiibisile moi washifunīja hape kū welekele.

¹²Alīyo a masala halī ūko gakapandīkīlagwa? Ū witegeleja būkikalaga halī?

¹³Ū munhū atūdūla ū kūgwitegeleja ū mpango gwa masala; a goi gatī ga kūpandīkīlwa mu sī ya bapanga.

¹⁴Ū būjiba būkahayaga, “Gatīmo ū mulī nene.” Ī nyanza nayo īkashoshaga Īlīhaya, “Gatī hamò na nene.”

¹⁵A masala gatagūlagwa zahabu, ū mpango gwago gūtūlolwa mu būdito bo feza.

¹⁶Gatīko kūgūlwa bo zahabu ja Ofili, pyī nūūlū bo mawe ga mpango ntaale, gītī ga oniki nūūlu safilo.

¹⁷Ī zahabu na a mawe ga mpango shitalenganīlile nago a masala, gatapandīkagwa kūlwa kūfunya shikolo sha būlenji bo zahabu.

¹⁸A mawe ga mpango ga mu nyanza ndūhū nūūlū kwiganikīlwa, nūūlū mawe gangī a ga mpango kū banhū; nguno ū mpango gwa masala gūtūlenganījiwa na wiza bo mawe ga lubi.

¹⁹Nūūlū ī topazio ja Esiopia jitī na wiza bo kūlenganīla na masala, a goi gatī ga kūlenganījiwa na zahabu h'ūmo jibeelele.

²⁰Nose lūūlū ī gete, a masala gakafumaga halī? Ū witegeleja būkikalaga halī?

²¹A masala gabisilwe ū kū miso ga shose pyī ī sha myūyī ya būpanga, gabisilwe nūūlū ni kū noni ja kūlala.

²²Ī kūlimu nū Kūcha shikahayaga, “Lūkumo lwago dūhū h'ūlo lwashika ū mu matū gise!”

²³Ū Mulungu h'ūyo ayīmanile ī nzīla ya kūgapandīkīla, we wike h'ūyo amanile ūko gakikalaga.

²⁴Nguno ū wei akībonaga ī sī yose pyī ūmo īgelelile, hama akashibonaga pyī īsho shilī ha sīlīlī y'igūlū.

²⁵Aho wībeegeja būdūla ī miyaga, na a minzī ūgageleka bo ngelekelo,

²⁶Īmbula nayo wītūūlīla shilagīlo, nī ndabi ja lūkūba ūjibeegeja nzīla;

²⁷hūna ūgalola a masala ūbūhaya ū wiza wago, hama ūginha būdūla, ūgashikaanya.

²⁸Hanuma ūng'wīla ū munhū gīkī, “Ū logohano kūlī Seeba h'a masala; nū kūlekana na būbi hū witegeleja.”