Read Sukuma Bible 2015 – Bibilia Ilagano Lya Kale 2015 Ayubu 3 Bible Online

Ayubu 3 - Sukuma Bible 2015 – Bibilia Ilagano Lya Kale 2015 bible

Ayubu 3

¹Hanuma ya yenīyī, ū Ayubu wandya kūfunya mihayo ya kūlūzuma ū lūshikū lwa kūbyalwa kwakwe.

³“Ū lūshikū ūlo nakabyalwa ni lūjimīīlage, pyī nū būjikū ūbo bakiwīla gīkī, ‘Wabyalagwa ng'wana ngosha!’

⁴Ū lūshikū lwenūlo ni lūbizage lwa giiti, ū Mulungu ūyo alī higūlya ni alūlekanījage, nūūlū isana lītizūlwakīīla.

⁵Lūshīkījiwe giiti na nengeeji gwa lūfu; lūkundīkījiwe ilunde lya giiti.

⁶Ū būjikū wenūbo būding'we giiti shitaale, lūtizagūbalanījiwa ū mu shikū ja mu ng'waka, yaya nūūlū kwingījiwa mu shikū ja ng'weji gose gose.

⁷Ū būjikū wenūbo būbize būgūmba, ilaka lya būyegi lītizigwiwa moi nūūlū hado.

⁸A bamani ba kūzuma shikū ni balūzumage ū lūshikū lwenūlo; abo balī na būdeeba wa kūlīgulumūla lībūnanze[2] kūfuma mu nyanza.

⁹Ī sonda ja dilū ū mu lūshikū lwenūlo jibize giiti, ū būjikū wa lūshikū lwenūlo būtizeela; ū lūshikū lwenūlo lūtizūlībona Ī likīngo lya dilū.

¹⁰Nguno lūtīlugalile ī nda ya ng'wa mayū ī ya būbyīle, kūgabisa a makoye natizūpamanya nago!”

¹¹Nibūlī natachile a hikanza lya kūbyalwa? Būlī natalūmbūlīlile aho nafuma dūhū ū mu nda?

¹²Nibūlī gaalīho mazwi ga kūnanukūla, na mbeele ja kūnonhya?

¹³Nguno ī haha ni nalaalile mu mhola, ni nalembeelile mu kwifuula

¹⁴hamò na batemi, na balamuji ba mu sī; abo baalī bizengela mizengo, Īyo īlī mafuluka ī haha.

¹⁵Ni nalembeelile nabo a batemi abo baalī basabi ba zahabu, abo baalī bokaja feza mu manumba gabo!

¹⁶Nibūlī natabisilwe hasī, gītī nda ya kūkenaagūka ūmo beleele bakaīlaga, abo batalībonaga ī līīmi?

¹⁷Ū kwenūko a babūbi bakooyaga Ī ya nkūla, na a babo banojiwe makoye bakifuulaga.

¹⁸Na a batungwa balī mu kwifuula ū kwenūko, batī na kwikala bogohaga kūsaayīlwa na bīmīīji babo ba milīmo.

¹⁹Balīko koi a bataale na a bado, ū kwenūko ū nsese alī mu wiyaabī ū kūlī ise būgonzo.

²⁰Ī gete, abo balī mu makoye bakinhagwa isana lyakī, nūūlū ū būpanga bookī ū kū banhū abo baminyīkile mu ng'holò,

²¹abo balī na ng'hūmbū n'icha nūūlū īkī lītabizīīlaga; abo bakalīkoobaga mu būkomeezu kūtinda bachooji ba mawe ga mpango ntaale;

²²abo bakayegaga kīngī nasho, na bakasangabalaga ūlū būshika mu shigila?

²³Ūyo nzīla yakwe ībisilwe akinhagwa būpanga bookī, ūyo Mulungu ampīndīlīgije isanzagūtū lya giiti?

²⁴Nguno ū būgang'hīji ūbo būkūnizīīlaga h'ī shilīwa shane ī haha, nū kūgekema kūkūnifumaga gītī minzī!

²⁵Ū mhayo ūyo naalī nagogohile h'ūyo gwanigwīlile, ūyo gwikalaga gūkūniibakīja gwaniilongelile.

²⁶Natī na mhola, natī na būlembeezu, natī na kwifuula; ūlū ītī makoye dūhū!