Read Sukuma Bible 2015 – Bibilia Ilagano Lya Kale 2015 Ayubu 35 Bible Online

Ayubu 35 - Sukuma Bible 2015 – Bibilia Ilagano Lya Kale 2015 bible

Ayubu 35

¹Ū Elihu ūhaya hangī,

²“Ū bebe ūliganika ū gwenūyū gūtūngīlīgije? Īkī walinhije kūhaya gīkī, ‘Ū būtūngīlīja bone būkīlile a ha bo ng'wa Mulungu.’

³Alīyo hangī ū kūnū ūkūmūjaga, ‘Ī gīsī īlīho na solobo ū kūlī nene, nakūpandīka kī ūlū nūleka kwīta shibi?’

⁴Natogilwe nakūshokeje ū bebe, pye na a banwani biyo abo ūlī nabo.

⁵Alilangamīlaga ū kwigūlya ūlīlole ī ligūlū; gakalalīlage a malunde ayo galī kwigūlya yako.

⁶Ū bebe ūlū wīta shibi gūkūnkoya kinehe ū wei? Ī shibi shako ūlū shūkwīla no no no, shikūng'wīta kinehe ū wei?

⁷Ūlū ūbiza ntūngīlīja numho ūlīng'winha kī, nūūlū kī īsho akūpandīka kūfuma mu nkono gwako?

⁸Ū būbi wako būlī wa kūnkoya munhū dūhū gītī bebe, nū būtūngīlīja wako bo kūbagunanha banhū dūhū.

⁹A banhū bakalīlaga kūlwa nigo gwa wiboneelwa, bakikūmbīlījaga bagunanhwa kwīnga mu nkono gwa munhū wa nguzu.

¹⁰Kwike atīho ūyo akahayaga gīkī, ‘Alī halī ū Mulungu ū Meeja wane, ū ng'winhi wa mīmbo mu būjikū;

¹¹ūyo akatūlangaga a bise kūtinda shiinū ja mu sī, na kūtwīta tūbize bitegeleja kūkīla noni ja kūlala?

¹²A banhū nūūlū būlīla kūlwa nguno ya wikumīlīja wa bahūnga, ū wei atashoshaga mhayo.

¹³Na ng'hana h'ūmo alī ū Mulungu, atabūdegelekaga ū būlīji bo dalali; ū Ndūji wa shose atīko kūdīlīla būlīji bo mbika yenīyo.

¹⁴Nose ū bebe akūkūdegeleka ginehe, nguno ūlīta wahaya gīkī ūtūmonaga, na gīkī ī mihayo yako īlī kū būtongi bokwe, na lūūlū ū bebe ūnindīīlile wei;

¹⁵hama a higūlya ya henaho ūlīyūhaya na gīkī ū būpelanu bokwe būtīko kūng'wenheleja kūfunya nsango, na gīkī ū būbi atabūdīlīlaga nūūlū hado!

¹⁶Hūna lūūlū ū Ayubu akwitagūlaga mihayo midūhū, alī na malang'wa mingī no alīyo atamanile nūūlū kī!’”