Read Sukuma Bible 2015 – Bibilia Ilagano Lya Kale 2015 Ayubu 36 Bible Online

Ayubu 36 - Sukuma Bible 2015 – Bibilia Ilagano Lya Kale 2015 bible

Ayubu 36

¹Ū Elihu ongeja hangī kūhaya,

²“Iyūmīlījage hangī ho hado nakoolekeje gīkī ītaalī īlīho mingī ī ya kūlūngalūnga kūlwa ng'wa Mulungu.

³Ū būmani bone būfumile kūle, ū Meeja wane h'ūyo nakūūmalīla būtūngīlīja.

⁴Sanyaga gete gīkī ī mihayo yane ītī ya būlomolomo, ūyo alī hamò nang'ho ng'wene munhū wa būmani būshikanu.

⁵Ū Mulungu alī na būdūla, alīyo atadalahaga banhū; alī na būdūla na nguzu ū mu būmani.

⁶A bahūnga atabalekaga bikale bapanga, alīyo abo bakiboneelagwa akabagoloolelaga ī ng'hana yabo.

⁷A miso gakwe atagīnjaga ū kū batūngīlīja, nīyo akabigashaga hamò na batemi, hangī akabagūngūhyaga baabiza bataale ilalī.

⁸Alīyo a banhū ūlū batungilwe nhendele, babohiwe na mbohyo ja būluhi,

⁹akaboolekejaga ī shītwa shabo, gīkī bīīta shibi bo makaala.

¹⁰Hūna akabalugūlaga a matū gabo babize bigwi ū kū būhūgūlwa, na akabalagīlaga bagalūke bīnge ū mu shibi shabo.

¹¹Ūlū bigwa hūna bandya kūntūmamīla, bakūbiza mu kwīlūkīlwa pyī Ī shikū jabo, nī myaka yabo ī yose mu būyegi.

¹²Alīyo ūlū būlema ū kwigwa, bakūmalwa kūbūlagwa bo līlūshū; bakūshila kūcha balī mu būtūmana.

¹³Abo batī na logohano mu ng'holò bakīītaga isuku; nūūlū abatunge nhendele batalīlaga balīlomba kūgunwa.

¹⁴Bakachaaga bataalī badinha bado, ū būpanga wabo wabbudīka balī mu nzīla ja malofu.[24]

¹⁵Alīyo a baaluki akabīnjaga ū mu būluhi wabo; akalūngalūngaga nabo ū mu makoye gabo.

¹⁶Nū bebe alīkūduta akwīnje ū mu mino ga būluhi ūbo būkūlumile, akūtūūle h'ipandī igalī lītī na wishiteleja; wiyagaalūle ha meza yako ya shizeeze sha būlī mbika.

¹⁷Kwike ī haha ūlī mu nsango ūyo gūkabagwīlaga banhū bahūbi, ū nsango nū būlamulwa bo wīīmà shikwikalīlile.

¹⁸Alilūūlū, ilang'hanage ūtizūdutwa ūkalondeela sabo, ūtizīnjiwa a ha ng'hana kūlwa nguno ya būhongwa bo sabo ningī.

¹⁹Ū būsabi wako nūūlū ī nguzu ja būdūla wako pyī ī jose, jidūgije kūkūlang'hana ūtizūgwa mu mayanga?

²⁰Ūtizikūmvwa ikanza lya būjikū, kūlwa kūbadutanja banhū kūfuma mu kaya jabo.

²¹Ilang'hanage ūtizūgalūka kūja mu nzīla jabūbi ūbo ūlībonekana kūbūyegela, kūtinda būluhiwa.

²²Managa gīkī ū Mulungu alī higūlya no kūlwa būdūla bokwe. Nani ūngī ū nangi gīt'ūmo alī wei?

²³Nani wang'helela ī nzīla jakwe, nūūlū adūgije kūnkuuma gīkī, ‘Bebe wahūbīla a henaho?’”

²⁴Izūkagwa kwīyinha ikūjo ī milīmo yakwe, Īyo banhū bakīgongoolaga mu mīmbo.

²⁵Pye a banhū bakībonaga, a banhū bakīloleelaga bo kūle.

²⁶Managa gīkī ū Mulungu ntaale, alī kūle no nako a kitegelegeje kise! Ū wingī bo myaka yakwe būtadūgije kūmanwa.

²⁷Hū ng'wene akagadutaga kwigūlya a minzī wagagalūcha kūbiza mbula ya mihūūmo.

²⁸A malunde gakitaga minzī gago hasī, banhū baapandīka mbula ya kūbigela.

²⁹Nani wa kūdūla kūmana ūmo akagahelelaga a malunde, nū mumo mihilimo īkizīlaga kūfuma kū wikalo bokwe?

³⁰Manīlaga dūhū ūmo akajenhelaga Ī ndabi jiiza jimpīndije hose hose, jikūng'weng'weetaga kūshisha mu būjiba bo nyanza.

³¹H'ūmo akagalelelaga a mahanga, wabinha a banhū shilīwa sha kūbigela.

³²A makono gakwe akagookajaga ndabi ja lūkūba, hūna wayūjilagīla kūtūla aho alatogelwe wei.

³³Ū kūpalalūka kūkakumūchaga gīkī alīho, ū wei ūyo abūkolilwe no ū būbi.