Read Sukuma Bible 2015 – Bibilia Ilagano Lya Kale 2015 Ayubu 38 Bible Online

Ayubu 38 - Sukuma Bible 2015 – Bibilia Ilagano Lya Kale 2015 bible

Ayubu 38

¹Hūna ū SEEBA ūnshokeja ū Ayubu kūfuma mu nshūūlūlū; ūhaya,

²“Ī gete nani ū ng'wenūyū, ūyo akūkenaagūlaga būganikīji bone kūlwa kūkwīja mihayo mu būtūmana?

³Alilūūlū, itungage nyagosha widadīle, leka nakūbūje; shikwigeleelilwe ūnishokeje.

⁴Aho nalīgūtūūla ū nsingi gwa sī, walī halī ū bebe? Niwīlage ūlū ūmanile.

⁵Nani washihela ī shipimo shayo? Angū mmho ūmanile! Nūūlū nani ūyo akalūgoloola ū lūgoye lwa kwīpimīla?

⁶Ī ng'hīngī jayo jisīmbīlilwe ha kī? Nū yūyo akalītūūla ī liwe lya kwīgoloolela walī nani,

⁷ū ng'wikanza aho sonda ja dilū jahelelekeejaga kwīmba mu būsangī būmò, kūnū a baana ba ng'wa Mulungu nabo balī mu būyegi bakūtūlaga mhūndū?

⁸Ī nyanza aho yapuluka hanze gītī kūfuma mu nda ya būbyīle, nani akīlugalīla na nyango gīkī īlembeele?

⁹Hū nene nakīyītīla malunde gīkī gabize shizwalo shayo, nī giiti sha gamha shūbiza būlengeeti bo kwigumīīla;

¹⁰nakītūūlīla būgelelo kūlwa lūbīmbī lwayo, na wesheemelo nībeegeja, na a makīgījo ga kwīlang'hana.

¹¹Hū nene nīwīla gīkī, ‘Ūkūyūgelela ūmu, yaya ū kūkīlanhya, Ī nguzu ja mahuuli gako jikūyūkalīkīla henaha’!

¹²Ū bebe wabīta kūlagīja wela ū būjikū hūbiza dilū; nūūlū ī likīngo lya dilū ū bebe wabīta kūlyolekeja ū wikalo walyo?

¹³Wabīta kūlīlagīla gīkī lījidime Ī mhembe ja sī lībagung'humule bīnge mo a bakenaagūji?

¹⁴Ī suso ya sī īkagalūchiagwa gītī mabūmba gabītiagwa ng'wibūmbīlo; hūna yabiza na mabala mabala gītī ga shizwalo.

¹⁵Ī lisana lyabo a bakenaagūji līkajimiagwa, ū nkono gwabo gwa būdūla gwabīnzwa.

¹⁶Ū bebe wagema ū kūshimīza ūshika ūko jilī ī nzwīlo ja nyanza, nūūlū wabīta kwingīla ū mu myobo ya mu būjiba bo nyanza ī shimu?

¹⁷Ū bebe wabīta ū koolekejiwa ī mibita ya kwingīla ūko lūkikalaga ū lūfu, nūūlū wībona ī milyango ya kūbīta ūjile kū sī ya giiti sha gamha?

¹⁸Ūbūmanile ū būgalī galī wa sī? Hayaga ūlū wīyitegelegije pyī ī yenīyī.

¹⁹Ī nzīla ya kūja kū wikalo w'isana halī ūko īlī, nī lipandī lya wikalo wa giiti līlī halī?

²⁰Ī shenīshi ūdūgije kūshitwala ū kū ng'hambī jasho, ūjitegelegije ī nzīla ja kūja ū kū wikalo washo?

²¹Angū mmho ū bebe ūtūkīja ū kwīyitegeleja ī yenīyī, nguno walī ūbyalilwe ī shikū jene; nī myaaka ya būlamu wako yakwīlaga!

²²Wabīta kwingīla ū kū mabīkīlo ga seluji, nūūlū washika ū kū mabīkīlo ga mawe ga mbula,

²³Ī shikolo īsho nashitūūlile kūlw'ikanza lya makoye, kūlw'ikanza lya wilwisha na būlūgū?

²⁴Nzīla kī ī ya kūja ūko jikafumaga ī ndabi, nūūlū ūko miyaga ya kīya īkīngīīlaga, ūlū īlīsambaajiwa kūja hose pyī ū mu sī?

²⁵Nani ūyo akīītalīlaga nzīla ī mbula ya makūmba mbelele, nūūlū kwībeegeja nzīla ī mbula ya ndabi na kūpalalūka,

²⁶gīkī īdotye nū kūko batikalaga banhū, galobe matogolo ayo galī dalali,

²⁷afuje itogolo īlo lītī na shose shose, Ī sī īdūle kūzwisha maswa?

²⁸Bebe, ī mbula īlī na saayo? Nūūlū a mamote ga lūme, nani ū myaji waago?

²⁹Ī seluji īkafumaga mu nda ya ng'wa nani? Nani akagabyalaga a minzī a manedeku ayo gakiikaga kūfuma kwigūlū?

³⁰A minzī gakibūmbaga gīt'iwe, na a higūlya ya būjiba hūūma kūlū kūlū kūlwa mbeho.

³¹Ūdūgije kwībohya nyololo Ī Ndīmīla ī ng'hīma; nūūlū ī Ndīmīla ī ng'osha ūdūgije kūtaligūla ngoye jayo?

³²Ū ngamba gwa būjikū ūdūgije kūgwīta gwilonge mu makanza gago? Nūūlū ī ndūba ūdūgije kwīswaga hamò na mamunda gayo?

³³Ūshimanile ī shilagīlo īsho shilang'hanile mihayo ya kwigūlū? Ī ligūlū ūdūgije kūlīlang'hana ūlī mu sī?

³⁴Ūdūgije kūhamuka ū kū malunde yika mbula y'ihūūma lya kūkūlibīja?

³⁵Ū bebe, ūkajisambaajaga ī ndabi ja mbula? Jikizaga ū kūlī bebe jiibūūla gīkī, ‘Tūlīho aha?’

³⁶Nani ū ntūūji wa masala mu ng'holò[25] nūūlū ūyo akatūūlaga witegeleja mu maganiko?[26]

³⁷Nani alī na masala ga kūmana isaabu lya malunde? Nū yūyo adūgije kūpumunha shisaabo sha minzī kūfuma mu malunde

³⁸ū lūbuubu ūlū lwidamīīla na kūūma kūngūlū, na a malongo ga hasī gibūmba gūbiza magengeli?

³⁹Ī shimba ng'hīma ūdūgije kwīhwīmīla ndimu, nūūlū kūbalisha a baana ba shimba kūshisha bigūta,

⁴⁰ūlū jilī mu mapilinga gajo ūmo jikalambalalaga, nūūlū ū mu masaka ūmo jikibisaga jilīkūngīla ndimu?

⁴¹Nani ūyo akajinhaga ilya ī ng'hūngūūlū, a makune gajo ūlū ganīlīīla ū Mulungu kunū gakūjaga ūko na ūko gaagayiagwa shiliwa?”