Read Sukuma Bible 2015 – Bibilia Ilagano Lya Kale 2015 Ayubu 39 Bible Online

Ayubu 39 - Sukuma Bible 2015 – Bibilia Ilagano Lya Kale 2015 bible

Ayubu 39

¹Ū bebe ūgamanile a makanza ayo ngūlūgūlū jikabyalīlaga? Nūūlū ūkajilang'hanaga ī saala ūlū jilībyala?

²Ūdūgije kwībala ī myeji y'ikanza lyajo Ī lya kūbūūcha nda? Ūlīmanile ī likanza lya kūbyala kwajo?

³Jikacheelaga hasī ūlū jilībyala a baana bajo, ūlū jūmala kūbyala hūna boshilaga nū būsūngū?

⁴A baana bajo bakakūlīlaga mu matogolo babiza na nguzu; ūlū būlinda bīnga batūshoka hangī.

⁵Nani ūyo akīyīta ī ndūūlū yūbiza nyang'widīīma? Nani akītīnīla ī ngoye jayo?

⁶Nene nīyinha a matogolo gabize wikalo wayo, ī mbūga ja munhu būbize būzengo wayo.

⁷Ī yoge ja mu mizengo ījidalahile, Ītigwaaga kūhama kwa ndamhīji.

⁸Īkagatagambīlaga a magūlya ūko īkadīīmīlaga, īkadīīlaga īkūkoobaga maswa managana.

⁹Ī mbogo īkūzunya kūkūtūmamīla ū bebe? Īdūgije kūkeeyūla būjikū mu lūbīgīlī lwa ha ng'wako?

¹⁰Ūdūgije kwītunga ngoyī īkūlīmīle ngūnda? Īkūkūlondeela a ha numa īje īkūkūlīmīlaga ilago lyako?

¹¹Ūdūgiji kwīsanya īkī īlī na nguzu ningī? Nūūlū ūdūgīji kwīlekela milīmo yako īkūtūmamīle?

¹²Ūlīsanya gīkī īshikile kūkūsombela shilīwa shako, yūshibilinga hūna yūkwenhela ha lūbūūga lwako?

¹³Ī nongu īkagung'humūlaga manana gayo mu kwisandaala, alīyo ī nzooya jayo jitīko kūlenganīla na ja ng'oong'oli.

¹⁴A magī gayo īkateelelaga hasī, hūna yagaaleka galūngūjiwe būsebu bo maseni.

¹⁵Ītakoyaga n'iganiko lya gūgūlū ūyo gūshikile kūgatobagūla, nūūlū shiinū īyo īdūgije kūgapanda.

¹⁶A makune gayo īkagalang'hanaga gītī gatī gayo, ītadīlīlaga nūūlū būche mpandagīlo ū būsūngū wayo.

¹⁷Nguno ū Mulungu akīyima a masala, ūleka kwīdaasa witegeleja nūūlū būgeehu.

¹⁸Alīyo ūlū yūzanzamula nzooya kūpeela, nūūlū muna falasa na ndamhīji okwe īkūnseka.

¹⁹Al'ī falasa wīguzuhya bebe? Hū bebe wītūūlīla lūng'iling'iza lwa booya būlīhu mu nhingo?

²⁰Ū bebe h'ūyo ūkīyītaga yizwanuke gītī kwizwanuka kwa njige, na kūlunduma bo mūūlū gayo mu lyogohya itaale?

²¹Kūlwa kūdooshiwa nguzu Īkakulījaga hasī, hūna yimeema nhambo kūjūmanhya nabo ū būlūgū.

²²Ū boobà gūlī mhayo gwa kūsekwa dūhū ū kūyo, shitīho sha kwīdetemya; nūūlū lūkabiza lūshū ītamanile ū kūlwihoha.

²³Ntana gwa masonga gūkūmanūtingina ū mu kabazu, na machimu gakūlabangīlīlaga būyaga na someke.

²⁴Ī yoi īkalyaga mabbaala gītī īsalile, ūlū yūlinda yūng'ang'aajiwa nhaaninga ya būlūgū, īlemile ū kūlembeela.

²⁵Ī nhaaninga ūlū yūng'ang'aala, Ī falasa īkalundumaga bo mūūlū gayo īkūhayaga, “Būgatū!” Ū būlūgū īkabūbbehaga būtaalī kūle, yabigwa a bataale ba mabità nī yoge yabo bakūfunyaga shilagīlo.

²⁶Al'ī fungwe, ūkīyinhaga bebe a masala ga kwamba manana hū yikweega kūtūngīīla dakama?

²⁷Ū bebe h'ūyo ūkīlagīlaga ī ng'hoonà kūlala, na kwinunga īkabeeje chanjo kwigūlya?

²⁸Īkazengaga kwigūlya ya shiganga yatūūla wikalo wayo, yabiza ya kwenūko, kū mahalo ga mawe mūūgī.

²⁹Ū kwīngīīla ko ū kwenūko, Īkūman'ilalangīja sha kūpula; nūūlū shibize shilī kūle, a miso gayo gakūshibona.

³⁰A makune gayo gakong'heelaga mininga, nīyo aho īlī ī mibimba, nayo īkabizaga ho.