Read Sukuma Bible 2015 – Bibilia Ilagano Lya Kale 2015 Ayubu 4 Bible Online

Ayubu 4 - Sukuma Bible 2015 – Bibilia Ilagano Lya Kale 2015 bible

Ayubu 4

¹Kwimanīla ū Elifazi ū muna Tema wahaya,

²“Ī gīsī angū mmho ūkūsaaya ūlū munhū ūgima kūkūwīla mhayo? Alīyo nani ūyo akwikala wiyūmīlījaga aleke kūyomba?

³Ū bebe iganikage ūmo wabagunanhīla bingī, ū bebe waguzuhya makono ga banhū bingī no.

⁴Ī mihayo yako yaguzuhya banhū bingī no abo bakipamaga, bingī a ba mazwi gayogomile wabinha nguzu.

⁵Alīyo ī haha wazwanganaga Īkī nang'ho yakūgwīlaga, wagwaga ng'holò īkī yakūkuumyaga.

⁶Ī gīsī, ū ng'wihando gwako ū bebe, gūtī ha gīkī īkī ūng'ogohile Mulungu? Nū kūsanya kwako kūtī mu būshikanu bo nhūngwa jako?

⁷Alilūūlū, iganikage chiza; wabonela halī munhū wa kūyagaala alīyo atī na būbi? Nūūlū halī ūko bakakenaagūlagwa a ba nhūngwa jigoloolile?

⁸Ūmo namanīlile ū nene, abo bakabūlīmaga ū būbi bahamba makoye, h'īsho bakagesaga ī shenīsho.

⁹Myūyī ya ng'wa Mulungu Īkabayagajaga, ū būpelanu wakwe būkabamizūkīlaga bakenaagūka.

¹⁰Shimba na shimba jikazuumīīlaga na kūhīīta, alīyo na a mino ga shimba ī nhaale gakabīnzīkaga.

¹¹Ī shimba ūlū yūgayiwa sha kūdima īkūcha a baana bayo būsambaala kūja sagala hose hose.”

¹²Alilūūlū, ū nene nenhelilwe mhayo mu mbisīla, a matū gane gigwile gūlīhwehwetwa.

¹³Naalī mu maganiko kūlwa koolekegeje ka mu makanza ga būjikū, makanza ga tūlo kūnona mu banhū.

¹⁴Booba būtaale būkanidima nūyūdetema, pye a maguha gane gūyūyogoma.

¹⁵Nguno moyo nebe gūkabīta a ha būtongi bone gūlīchwelemuka; nūzwa looya pyī ū mīlī.

¹⁶Ū moyo gwenūyo gwīmīīla gūlembeela alīyo nūlemeelwa ū kūgūdeeba gwalī moyo kī. Shikolo sha suso ya mīlī shīmīīla kū būtongi bo miso gane, hūna nigwa ilaka līlīhwehweta gīkī,

¹⁷“Ū munhū wa mīlī adūgije kūbiza ntūngīlīja kūtinda Mulungu? Ū munhū dūhū sīmbīīla ūbiza ng'wela kūtinda ū Mūmbi wakwe?

¹⁸Ū Mulungu walemeelwa kūbasanya batūmami bakwe, nūūlū a bamalaika bakwe ababonile gīkī balī na shisembo,

¹⁹sumbagwa na a babo bakikalaga mu numba ja malongo, ījo misingi yajo īzengilwe hasī ya lūbuubu, abo īlī shinogu kūnyinyagūlwa kūtinda nūūlū bbalabbaapu!

²⁰Nguno ūlū līlīfuma ī līīmi ū kūlinda lyagwa bamalaga kūtobagūka; bakūyagaala ilalī, ndūhū na wa kūdīlīla!

²¹Ī ngoye ja maheema gabo ayo bagasanije jitatīnagwa, hūna baacha gīko dūhū mu būgaya masala?”