Read Sukuma Bible 2015 – Bibilia Ilagano Lya Kale 2015 Ayubu 41 Bible Online

Ayubu 41 - Sukuma Bible 2015 – Bibilia Ilagano Lya Kale 2015 bible

Ayubu 41

¹Ī Lewiasani[28] ūdūgije kwīzubūla n'ilobo lya ndīlo, nūūlū ū lūlīmi lwayo kūlūtunga na lūgoye?

²Ūdūgije kūsheepya lūgoye mu nindo yayo, nūūlū kwīchima ilobo lya ng'wisaya?

³Īkūkwikūmbīlīja gīkī wīchīle shigongo? Īkūlūngalūnga nang'ho mihayo mifuuku?

⁴Ūdūgije kūlagana nayo ng'wizunīlīja īkūtūmamīle nyasese ilalī?

⁵Ūkwīsuga wīyimanīlīgīja gītī noni, ūkwīkūnga lūgoye mu nhingo, gīkī baana[29] bako bapandīke ndimu ya ha kaya?

⁶A basūlūja bashikile kwīkaaba, nūūlū a bajinja badūgije kwībbutagūla mapingili būgabanha?

⁷Ī likūnza lyayo ūdūgije kūlyokaja someke, nūūlū ū ntwe gwayo migela ya kūzubīla ndīlo?

⁸Hadīkījaga bo makono gako ūkwībona īyo īlakūgwīle, ūtīība; hama ūtalashokeela hangī!

⁹Ī gīkī munhū ashikile kwīheeba ū gwene gūche gūjimīīle, nguno ū kwībona dūhū a magaka gayo gakūkūmala!

¹⁰Atīho nkalī wa kūgima kwīyikoloosha, al'ū nene, nani wa kūnīīmīla?

¹¹Ū nene nalī n'igasa kūlī nani ūyo shiniigeleelilwe nanipe? Pyī ī shose a ha sīlīlī y'igūlū shilī shane.

¹²Natilewa ū kūgahaya a magūlū gayo, nī nguzu jayo, nū wiza bo suso yayo.

¹³Nani adūgije kwīzuuja ī ng'handa yayo? Nani wa kūdūla kwīyegeela alī na mbohyo ībohye kū nomo gwayo?

¹⁴Nani wa kūgima kwīyasamya nomo gwayo ūyo? Nguno gūlī na ng'hīlīlī ja mino ga magaka!

¹⁵Ū ngongo gwayo gūlī na ng'hīlīlī ja magambala gilaalīlile gītī mūda, hūna giluma hamò,

¹⁶gidaamīīla būlī lyene na liye gūsheleela kīngī nasho, nūūlū lūyaga lūtīko kūbita.

¹⁷A magambala gayo galī nde nde nde, hūna giluma, nose gatī na būlekaanīje.

¹⁸Īkityamuchaga gwalaba moto, hama a miso gayo gabange ikīngo lya dilū.

¹⁹Ndali ja moto jikafumaga ū nomo gwayo, ūlū yafuupa gakafumaga masasī galīīlala.

²⁰Ū mu mūūlū gayo līkafumaga mo lyochi, gītī līlīfuma mu nengelo yasebiagwa moto gwa mbelele.

²¹Ī myūyī yayo īkabachaga nūūlū būpī, ū mu nomo gwayo jikafumaga mo ndali ja moto jikūtaamagūkaga.

²²Ī nhingo yayo īlī na nguzu ningī no, pye abo bakamanhyaga nayo bakagwaga ng'holò.

²³Ī likūnza lyayo lya magambala gilumile, madaamu no gatī na būmogolele.

²⁴Ī shikuba shayo shidaamu no, shidaamu gīt'iwe lya kūshela.

²⁵Ūlū yagulumūka na a ba nguzu bakadetemaga; ūlū yūpwaganja bakibisaga.

²⁶Nūūlū lūshū lwīkuumya lūtīyīta kanhū, nūūlū lībize ichimu, nūūlū isonga; pyī nūūlū someke ītahemeelaga.

²⁷A bana chūma ībabalile gītī mbelele, a bana shaba a bene gītī mitī ībūngile.

²⁸A masonga gatīko kwīyogohya, ū kū yoi na a mawe ga kūpondwa bo lūtaago, gatikīlile na mapūmba.

²⁹Ū būhili īwisaabile gītī matindigishi ga mbelele ja būsīga; ū mfuutumo gwa ngela īgwibengelegije.

³⁰A magambala ga mu dagaala gabange gītī maalūjo mūūgī, ūlū yūbīta mu tembe īkagukumbūlaga, yaleka līngweso gītī ly'itūlīlo lya būsīga.

³¹Īkashikaga ū mu minzī bochuumeela ū būjiba, git'ifulīla lya minzī gategile ha moto; Ī nyanza īkīyuugaga gītī nengelo ya maguta ga kwibila.

³²Ūmo īkūbītaga īkalekaga nkulubīla gwa mafulo gaape, munhū akwiganika ī nyanza yītaga mvī gītī ja banamhala.

³³Ū mu sī shitīho sha kūlenganījiwa nayo ī shinū yenīyo, ī yoi ītī na boobà nūūlū hado.

³⁴Ībadalahile pye abo bakigūngūhyaga, Ī yoi h'ī nhemi yabo pye a bikumīlīja.