Read Sukuma Bible 2015 – Bibilia Ilagano Lya Kale 2015 Ayubu 42 Bible Online

Ayubu 42 - Sukuma Bible 2015 – Bibilia Ilagano Lya Kale 2015 bible

Ayubu 42

¹Hūna ū Ayubu ūnshokeja ū SEEBA ūhaya gīkī,

²“Namanile ū bebe ūdūgije kwīta shose, shitīho sha kwīliganya īyo bebe wīhelile.

³Wabūūjaga gīkī, ‘Nani ūyo akūkenaagūlaga būganikīji bone kūlwa kūkwīja mihayo mu būtūmana?’ Ng'hana naahayile mihayo īyo natīyitegelegije, mihayo ya kūkumya no, ū nene naalī natīmanaga.

⁴Walī wahaya gīkī, ‘Degelekaga lūūlū nayombe, leka nakūbūje, shikwigeleelilwe ūnishokeje.’

⁵A matū gane gakalwigwaga ū lūkumo lwako; alīyo ī haha a miso gane gaakūbonaga.

⁶Na lūūlū ū nene nidalahaga; nīyo noyaga, naagalūkaga mu nzīla ya kwifudīka mu lūbubu na mabu.”

⁷Hūna ū SEEBA aho wamala kūng'wīla ū Ayubu ī mihayo yenīyī; ūng'wīla ū Elifazi ū muna Tema gīkī, “Naakūpelanīlile ū bebe na a banwani biyo a babīlī, nguno mutanihayile kūlenganīla nī ng'hana yane gīt'ūmo wītīlile ntūmami wane ū Ayubu.

⁸Alilūūlū, solagi nzagamba mpungatī na ng'ondi mpungatī; muje najo ū kūlī ntūmami wane ū Ayubu, mukafunye shitambò sha kūpemvwa kūlwa nguno ying'we. Ū ntumani wane ū Ayubu akūmulombela, nane nakwigwa ū kūlomba kwakwe natizūng'wītīla īyo īng'wigeleelilwe kūlwa būbbūūlī wing'we. A bing'we mutanihayile kūlenganīla nī ng'hana yane gīt'ūmo wītīlile ntūmami wane ū Ayubu.

⁹Hūna lūūlū a ba Elifazi muna Tema, nū Bilidadi muna Shūha, nū Zofali ū muna Namatī, būja būūkīīta īyo SEEBA akabawīla. Nang'hwe ū SEEBA ūkūzunya ū kūlomba kwa ng'wa Ayubu.”

¹⁰Ū Ayubu aho wamala kūbalombela a banwani biye, ū SEEBA ūnshokeja ī jakwe; nīyo būlī shikolo winhwa ng'hangala ibīlī kūtinda ūmo shalī ī kwandya.

¹¹A baana ba ng'wawe bagosha na bakīma, pye na a babo baalī bimane bakwe kūfuma kale na kale, biza a ha ng'wakwe kūlya shilīwa hamò nang'hwe. Būhooya nang'hwe mu kūnūngūja na kūng'olekeja ūmo yalī yabapīnīhagīja pyī īyo SEEBA walī wang'wenhela. Na būlī ūmò wabo ūng'winha inong'ho lya hela na pete ya zahabu.

¹²Ū SEEBA ūng'wīlūkīla ningī no ū Ayubu ū mu shikū jakwe ī ja kū būkalīkījo, kūtinda ūmo walī ī kwandya. Ūpandīka ng'holo ningī no, jūshika shihūmbī ikūmi na shinè; ī ngamīla ūshisha shihūmbī shitandatū, ī nzīkū ja kūlīma shihūmbī shibīlī; ī nzobe ng'hīma najo shihūmbī shimò.

¹³Walī na baana bagosha mpungatī na bashīke badatū.

¹⁴Ū nshīke ū wa kwandya ūng'wilīka ī lina lyakwe Yemima; ū wa kabīlī Kezia, ū wa kadatū winhwa lina lya Keleni-hapuchi.

¹⁵Pye a hose ū mu sī yenīyo baalī batīho bakīma basoga ba kūlenganīla na a bashīke ba ng'wa Ayubu. Ū saabo akabinha wingīji hamò na a basīza babo.

¹⁶Hanuma ya yenīyo ū Ayubu akalama myaka igana na makūmi anè; ūbabona a baana bakwe na a baana babo kūshisha kū shibyalīlwe shinè.

¹⁷Hūna ū Ayubu ūcha alī namhala wa myaka mingī.