Read Sukuma Bible 2015 – Bibilia Ilagano Lya Kale 2015 Ayubu 5 Bible Online

Ayubu 5 - Sukuma Bible 2015 – Bibilia Ilagano Lya Kale 2015 bible

Ayubu 5

¹Hīlīkaga ūlū ūtogilwe, alīyo nani ūyo akūkwidīka? Ūkūngalūkīla nani ū mu beela?

²Ū nchilū akabūlajiagwa būdaki, nū ngaya masala akabūlajiagwa wilu.

³Ū nene nabīta kūbona nchilū wapandīka nguzu, alīyo kwimanīla ī kaya yakwe yagwīlwa izumo.

⁴A baana bakwe bakabizaga kūle no nayo ī mhola; nūūlū mu mabanza bakiboneelagwa, batī na wa kūbalwīlīīla.

⁵Ī shilīwa shakwe shikalyiagwa na ba nzala, bakashisolaga īsho akashikoya koyelaga; nī sabo jakwe jikalyiagwa na banhū ba shilangū.

⁶A makoye gatagulumūkaga kūfuma mu lūbuubu, nūūlū ū būluhi būtazwaga kūfuma hasī.

⁷Alīyo ū munhū akabyalagwa amanhye na makoye, gīt'ūmo masasī ga moto gakalalaga gajile ng'wigūlya.

⁸Ūlū ni naalī nene ni nankooba Mulungu, Ī mihayo yane ni nantūūlīla wei.

⁹Nguno īyo akīītaga mitaale Īkīlile būmanīle, mihayo ya kūkumya mingī Ītī na būbalīle.

¹⁰Hū ng'wene ūyo akenhaga mbula hasī, wasambaaja minzī hose pyī ū mu matogolo.

¹¹A bidoohya akabagūngūhyaga, na a babo balī mu būpīna akabagūngūmūlaga wabatūūla mu mhola.

¹²A bibeeleleja akabakenaagūjaga Īyo bakīhelaga, ī milīmo ya makono gabo yaacha mpandagīlo.

¹³A basala sala akabagwashaga mu nyasala sala yabo; na babo bakabanyeekejaga bichabo kakīnjiagwa a kahelele kabo kajimīīla wangū no.

¹⁴Nūūlū līīmi nyange bakakundīkījiagwa giiti, līīmi lūgala baaja bakūbbabbashaga gītī būjikū.

¹⁵A bahabī akabapījaga, akabīnjaga ū mu nomo gwa biboneeji, wabīnja ū mu makanwa ga banhū ba nguzu.

¹⁶Ū mu gīko a bahabī balī na kwisagīlwa, ū wiboneeji būkamumiagwa ū nomo gwabo.

¹⁷Managa gīkī ūyo akahūgūlagwa na Mulungu alī na mbango; alilūūlū, ūtizūbūdalaha ū būhūgūji bokwe ū Ndūji wa shose.[3]

¹⁸Nguno ū wei akachūbūlaga, alīyo nū kūpīja akapījaga; akaminyaga, alīyo nū kūlagūla a makono gakwe gakalagūlaga.

¹⁹Akūkūpīja kūfuma mu mihayo mibi ītandatū, nūūlū mu mihayo mpungatī ūtūgwīlwa būbi.

²⁰Ū mu makanza ga nzala akūkūkomoola ūtūnanuka, nūūlū mu būlūgū akūkūlang'hana ūleke ū kūcha.

²¹Ūkūlang'hanwa nūūlū kū mihayo ya kūminya, nīyo ūtogoha nūūlū būkenaagūji būūkwizīīla.

²²Ū būkenaagūji nī nzala ūkūshiseka kūlwa kūshidalaha, nī shiinū ja mu sī ūtī na nguno ya kūjogoha.

²³Na a mawe ga mu matogolo ūkūbiza na long'we nago, hama īkūbiza ho mhola a ha gatī yako nī shiinū ja mu matogolo.

²⁴Ūkūdeeba gīkī ī ng'hambī yako īlī mhola, nū mu lūbīgīlī lwako ūkūlola, alīyo shitūbiza mo sha kūlula.

²⁵Ūkūdeeba nī gīkī a baana bako bakūkwīla, nū būbyīle wako būkūbiza na banhū bingī gītī maswa ga hasī.

²⁶Ūkūshika ū ng'wikanza lya kūjīkwa kwako ūtaalī na nguzu, gīt'ūmo mangala gakomeelile gakenhelagwa ha lūbūūga.

²⁷Ī yenīyī twīgīsīlīgije twībona īlī chene; na lūūlū yigwage wītūmamīle, Īkūkūgunanha.