Read Sukuma Bible 2015 – Bibilia Ilagano Lya Kale 2015 Ayubu 6 Bible Online

Ayubu 6 - Sukuma Bible 2015 – Bibilia Ilagano Lya Kale 2015 bible

Ayubu 6

¹Hūna ū Ayubu ūhaya,

²“Yee bagosha; gīt'ūlū ni bololwa chiza ū būpīna bone, na a makoye gane gūtūūlwa mu ngelekelo gamanwe!

³Ū būdito wago ni wakīla a ha būdito bo maseni ga ha nyanza, h'ī chene ī mihayo yane īlīfuma ya sagala sagala.

⁴Nguno a masonga ga Ndūji wa shose galī mu mīlī gwane, ū moyo gwane gūlībūng'wa ū būsūngū wago; Ī lyogohya lya ng'wa SEEBA līnikiimaalīlile.

⁵Ī gīsī, ī nzobe ya ng'wipoolu Īkang'oolaga ūlū īlī na maswa, nūūlū ī ng'ombe īkakumbaga ūlū īlīlya shilīwa?

⁶Ī shilīwa ūlū shitī shisandūku, shikalyiagwa na kūtwīlwa munhu yaya, nūūlū ū winzī w'igī būlī na būnonu kī?

⁷Ī shenīsho yaya ū nene ū kūshikuumya, nguno shikwīsola sojaga Ī ng'holò yane.

⁸Gīt'ūlū ni napandīka īsho nalīshilomba, ū Mulungu ūninha īsho nashiikūmbilwe;

⁹ūlū ni wazunya ū Mulungu kūnitobagūla, ūgūlekela ū nkono gwakwe gūūniyagaja!

¹⁰Ū mhayo gwenūyū ni gwanilūngūja no, ni nayega nūūlū ū mu kūsaatwa kwane ū kūtaale, nguno natīlemile ī mihayo yakwe ū Ng'wela.

¹¹Ū nene nalī na nguzu kī nose nabize na kwisagīlwa? Gūlīho mhayo kī ū kū ng'halīlo nose nikale niyūmīlījaga?

¹²Ī nguzu jane jilī nguzu ja mawe? Nūūlū ū mīlī gwane gūlī mīlī gwa chūma?

¹³Ī gīsī, īkī nīngījiwe pyī ū būdūla bone, nataalī na nguzu kī hangī Ī ja kūnigunanha?”

¹⁴Ū munhū ūlū alī mu makoye, a banwani biye bakang'olekejaga ng'holò niiza, nūūlū akajimīīja ū logohano ū kūlī Ndūji wa shose.

¹⁵Alīyo a banwani bichane aba batī basanyiwa, balī gītī mahululu ga minzī ng'wikanza iguhī; mahululu ayo gakasejaga minzī

¹⁶ng'wikanza mbula īkūtūlaga, ayo gakokalaga ūlū galanukūla minzī.

¹⁷Alīyo ū mu chū gakakamaga, ūlū lyaseba ī līīmi gakūūmaga gaakalamuka.

¹⁸A bashimīzi bakatajaga bīnga ūmo gabītile, baaja kū matogolo bakūkoobaga minzī, ba kachīla kwenūko.

¹⁹A bashimīzi ba kūfuma Tema bakilalangījaga, a basūlūja ba Sheba bakalolaga mu kwisagīlwa.

²⁰Bakashikaga moi balī na kūsanya, ūlū bagayiwa bakagwaga ng'holò bazwangana.

²¹Na a bing'we h'ūmo mulī ū kūlī nene, ng'wahayilūnibona nakūgekemiagwa makoye ng'ogoha.

²²Ī gīsī, naahayile nūūlū hado gīkī, “Nifunīlījagi shose shose, funyagi shakwīnga mu sabo jing'we munikomoole”

²³nūūlū gīkī, “Nipījagi ū mu nkono gwa ng'wanishi?” Nūūlū, “Nīnjagi ū mu makanwa ga ng'wiboneeji?”

²⁴Bing'we, ū nene nitongagi nakūhuumūla; noolekejagi aho naahūbīlile.

²⁵Ī mihayo ya ng'hana īkasaatyaga, alīyo īyo mukwīhayaga yenīy'a bing'we, Īlīlanga kī ī gīsī?

²⁶Mulīnihama kūlwa mihayo Īyo nalīyīhaya, ī mihayo ya munhū azwanganile mukwībalaga kūbiza ītī na solobo?

²⁷A bing'we mudūgije nūūlū kūbeesela mbale banhū baachīlwa basaabo, nūūlū nwani ng'wiching'wi mudūgije kūnjinja a bing'we!

²⁸Alilūūlū, iyūmīlījagi munilole; a bing'we mulībona gīkī ū nene nashikile kūlomaloma kū būtongi wing'we?

²⁹Shoshagi moyo, muleke ū wiboneeji; iganikagi chiza, nguno mulībūkenaagūla ū būtūngīlīja bone.

³⁰Ī gīsī nalī na būhūbi kī ū mu kalūngalūngīle kane? Muliganika ū nene natīko ū kūwitegeleja ū būbi?