Read Sukuma Bible 2015 – Bibilia Ilagano Lya Kale 2015 Ayubu 7 Bible Online

Ayubu 7 - Sukuma Bible 2015 – Bibilia Ilagano Lya Kale 2015 bible

Ayubu 7

¹Ī gīsī, ū munhū ūlū alī mu sī, atalwishaga milīmo midito? Ī shikū jakwe jitabange gītī ja ng'witūmamīja wa mheela?

²Ūmo nsese akalindīīlīlaga mu kwisagīlwa gīkī līgwe ī līīmi, nūūlū ūmo ng'witūmamīja akalindīīlīlaga mheela yakwe;

³nū nene h'ūmo nahelelilwe myeji midūhū, nabalīlilwe būpīna mu makanza ga būjikū.

⁴Ūlū nalaalile nakwibūjaga gīkī, “Būkwela nanalī shi nabūke?” Ū būjikū būkūlīhaga no, naayikala nakwigalūchaga dūhū kūshisha dilū,

⁵ū kūnū ū mīlī gwane gūkūnyegukaga ngino gwakuulīkaga kū. Ī likoba lyane ūlū lyapīja, hangī lileega hūna lyatuumūka būpya.

⁶Ī shikū jane jilībīta wangū no, gītī nduutyo ya meeja wa būlūba; ī haha jilī kū būkalīkījo, alīyo natī na kwisagīlwa nūūlū hado.

⁷Ee Mulungu, izūkagwa gīkī ū būpanga bone būtikīlile na myūyī, a miso gane gatalabona wiza hangī.

⁸Ī liso īlo līlīnibona ī haha lītūnibona hangī, a miso gako gakwikala ganilolile, alīyo nakūbiza natīho.

⁹Ūmo ilunde līkasambaalīlaga lyajimīīla jimijimi, h'ūmo atashokelaga nū nja mu shigila.[4]

¹⁰Atīko kūshoka hangī ū mu kaya yakwe, ī lipandī lyakwe lītūng'witegeleja hangī.

¹¹Hūna lūūlū natūdūla ū kūhuumūla, nakūyomba kūlwa kūsaatwa kwa moyo gwane; nakūlīla nguno ū būpanga bone būlīminyiwa.

¹²Ū nene ūkwikalaga ūnikūūbīlīja gīko, nabizaga nyanza, nūūlū lībūnanze lya mu nyanza?

¹³Ūlū niganika gīkī ū būlīīlī bone būkūniifuuja, ī ndaalo yane īkūnigeeheja ū kwiyanda kwane;

¹⁴nahene ūkūniibakījaga na mashilooti, wayikala ūkūnidetemyaga kūlwa kūnoolekeja mashikolo mu shilooti.

¹⁵Nose nalī na ng'hūmbū nūūlū ni nakacha bo kūnigwa, kūtinda kwikala ū mu mīlī gwane ūyū.

¹⁶Ī haha natūbūtogagwa ū būpanga bone, nū kwikala nalī mpanga ilalī natatogilwe. Nilekage ū nene, ī shikū jane jilī dalali no.

¹⁷Ū munhū nang'hwe alī shikolo kī, nose wikale wandīīlīlaga, wikale ūkūjimīījaga makanza gako ūkūng'wiganikaga?

¹⁸Wakī nose wikale ūkūmpīndīīlaga būlī dilū, na kwikala ūkūngemaga būl'ikanza?

¹⁹Ūtūdūla gete ū kooya ū kūnikūūbīlīja, ūleke ū kūnilola kakanza kado nane namile nūūlū mate?

²⁰Ūlū nīītile shibi, naakūkenije kī Nang'hani wa banhū? Nibūlī wanitūūlile h'ipandī lya kwikala wanideebelejaga dūhū? Nibūlī ū būpanga bone wabūgalūkije kūbiza nigo ū kūlī nene?

²¹Nibūlī ūtūnilekejaga ū būkenaagūji bone, nī shibi shane ūnīngīje? Nguno ī likanza lyane lya kūlaala mu lūbuubu lyashikaga, ūkūnikooba, alīyo natūbiza ho!