Read Sukuma Bible 2015 – Bibilia Ilagano Lya Kale 2015 Ayubu 9 Bible Online

Ayubu 9 - Sukuma Bible 2015 – Bibilia Ilagano Lya Kale 2015 bible

Ayubu 9

¹Hūna ū Ayubu ūshosha ūhaya,

²Ūlītūngīlīja, nū nene namanile gīkī ī yenīyī ya ng'hana; alīyo ū munhū adūgije kūbiza ntūngīlīja ginehe ū kūlī Mulungu?

³Ūlū munhū ūtogwa kwihalalīja nang'hwe, ū mu mabūjo shihūmbī atūdūla kūnshokeja nūūlū līmò lyago.

⁴Nani ūyo wagema kwilwisha nang'hwe ūpyena? Ū būmani bokwe būlī higūlya no, ū būdūla bokwe būtaale.

⁵Ū wei akasaamyaga na ngūlū Ī joi ndūhū nū kūmana; ūlū ūsaaya akajisambaagūlaga.

⁶Nī sī akītinginyaga wei aho īkikalaga, Ī ng'hīngī jayo jayengeela.

⁷Hū wei akalīlagīlaga nī līīmi lyoya ū kwaka, hama nū būng'weku bo sonda akabūshīkījaga.

⁸Ū meeja walyo ī ligūlū alī we wike, na a mahuuli ga nyanza akagapandagīlaga.

⁹Hū ng'wene ūmeeja wa Ndīmīla, Ī ng'hīma nī ng'osha; nī sonda ī Shitanga fugo, nī ja mu ngamba gwa būjikū.[5]

¹⁰Ng'wīti wa mihayo ya kūkumya Īyo īkīlile būmanīle, shakūkumya shingī shitīko kūbalwa.

¹¹Nūūlū akabiza alībīta aho nalī, ū nene natūdūla ū kūmona; nūūlū alīshimīza natīko ū kūng'witegeleja.

¹²Nūūlū akasola īsho alītogwa, nani akūnkūūma? Nani ūyo ashikile kūmūja gīkī, “Ūlīīta mhayo kī ū gwenūyo?”

¹³Ū Mulungu atabūhamaga ū būpelanu bokwe, nūūlū a bagunanhi ba ng'wa Lahabu[6] bakagwaga mu magūlū gakwe.

¹⁴Ū nene nadūgije ginehe ū kwihalalīja nang'hwe? Nakwīpandīka kinehe ī mihayo ya kwishokeja nang'hwe?

¹⁵Nguno nūūlū nakabiza natī na būhūbi, nahene natūdūla ū kūnshokeja; nakwibūūla dūhū ū kūlī Namuji wane anichīle shigongo.

¹⁶Nūūlū nakang'witana ūniidīka, natizunīlīja gīkī adūgije ū kūnidegeleka.

¹⁷Alīnitobagūla bo mbula ya nyaga, a makoye gane alīgongeja nū mhayo ndūhū.

¹⁸Atūnilekaga niche myūyī nūūlū hado, akūnongegejaga dūhū a makoye ga kūsaatwa.

¹⁹Ūlū mihayo ya būdūla, ū wei h'ūyo alī nabo; ūlū ya būtūngīlīja, nani ūyo adūgije kūmūūgīlīja?

²⁰Ū nene nūūlū nabize natī na būhūbi, alīyo ū nomo gwane gūkūnihūbya.

²¹Ī chene ng'hana natī na shilingo, alīyo natiyiganikīlaga nene ng'wenekīlī, ū būpanga bone naabūdalahile no.

²²Ī yose ītikīlile, h'ī chene nalīhaya gīkī, “A bose akabakenaagūlaga, abo batī na shilingo, na a bahūbi.”

²³Ūlū mhayo gwenha icha lya kwisambūkīja, ū wei atafumagwa ng'holò kūlwa būlīji bo munhū ūyo atī na shilingo.

²⁴Ī sī ūlū yūding'wa na bahūnga, hū we ūyo akababbokujaga a basugi bayo; ūlū atī ng'wene, numho nani?

²⁵Ī shikū jane jilībīta wangū no, kūtinda ūyo akūpeelaga nhambo, jikūlalaga dūhū ndūhū ū kwībona ī yawiza.

²⁶Jilīhūūma wangū gītī maato ga mbelele, gītī ng'hoonà īlikweega kūjūhwehula sha kūlya.

²⁷Ūlū niwīla gīkī, “Ī gete nalekane nabo ū wilīja līja bone, nagalūche nū būshū bone, nane nayūng'weenya ng'weenya.”

²⁸Alīyo kūkūnogohyaga ū kūsaatwa kwane pyī ū kose, nguno namanile ūtūniisaaba gīkī natī na būbi.

²⁹Ī gīsī īkī namalaga kūbalīlwa būkenaagūji, nataalī na nguno kī ya kwikala nūkoyela midūhū?

³⁰Ū nene nūūlū noogela sabuni hīmba ya mbika kī, nūūlū nūūgakalabya na magembya a makono gane,

³¹ūkūniponya dūhū ng'wichongo lya būnhyūūlūlū, kūshisha nī shizwalo shane nene ng'wenekīlī shikūyūniishishimūlwa.

³²Ū wei atī munhū gīt'ūmo nalī nene, gīkī nanshokeje mhayo; gīkī twishishe ng'wibanza tūkīmīīle twilole būshū kū būshū.

³³Gīt'ūlū ni wigela wa kūtūlamula, ūtūtūūlīla nkono gwakwe a bose būbīlī wise;

³⁴munhū wa kūdūla kūnīngīja ū nang'ha go ng'wa Mulungu, ī lyogohya lyakwe ni lyoya ū kūniibakīja.

³⁵A henaho ni nalūngalūnga ndūhū ū kūng'ogoha, alīyo ūmo nalī ūmu ī haha, natūdūla!