Read Sukuma Bible 2015 – Bibilia Ilagano Lya Kale 2015 Zabuli 10 Bible Online

Zabuli 10 - Sukuma Bible 2015 – Bibilia Ilagano Lya Kale 2015 bible

Zabuli 10

¹Nibūlī, Ee SEEBA, wīmīīlaga winūūna kūle? Būlī ūkūniibisaga ū ng'wikanza lya makoye?

²A babūbi bakabahwīmaga a bahabī kūlwa būtūmana wabo, ni bigwashage boi benekīlī ū mu mitego Īyo bībisile mu nyasala sala yabo.

³Nguno ū munhū wabūbi akikumīlīgījaga Īyo ayikūmbilwe mu ng'holò yakwe, kūnū akūbakumīlījaga a babi ng'holò, alīyo ū SEEBA ūndalaha.

⁴Ū munhū wabūbi ū mu wikumīlīja wakwe, atīko kūnkooba SEEBA; ū mu maganiko gakwe gose, atī n'ikanza lya kūng'wizūkwa Mulungu!

⁵Ī nzīla jakwe jikang'winhaga kūpandīka shikolo būlī makanza, na lūūlū akikumīlījaga no. Īyo ūyīhelile alī kūle nayo, pye a banishi bakwe akabalolaga oyūshiimūla.

⁶Ū mu ng'holò yakwe akiganikaga aliwīla, “Shitīho sha kūnitinginya ū nene; nakwikala mu būyegi gīkī dūhū pyī ī shikū, natīko kūpandīka makoye!”

⁷Ū nomo gwakwe gokalile mazumo na būlembalembi, na būdūkani, nū lūlīmi lwakwe lūlī pa makoye na mayanga.

⁸Akajaga kūyeela kū magūngūli, wakibanda mu magoobe akūkūngīlaga banhū abo batī na shilingo, gīkī ababūlage; hūna ū kūfuma aho abandile henaho a miso gakwe gakūmanūbalola abo alībakūngīla.

⁹Akibandaga hibisu washeleela gītī shimba īkūkūngīlaga. Akwikala alembeelile akūkūngīlaga, gīkī abadime abo batadūgije kwigunīja; na ng'hana abo batī na būdūla akabagwashaga ūlū wabadutīla mu ntego gwakwe.

¹⁰Abo akabadimaga akabapondagūlaga, akabanyangīlījaga bashila ho gete, akabanyaalīīlaga bo nguzu jakwe.

¹¹Ū mu ng'holò yakwe akiganikaga akwiwīlaga, “Ū Mulungu wīība, atūbona nguno ikundīkīgije ū kū būshū.”

¹²Ee SEEBA, būkaga, gūgoloolage ū nkono gwako; yaya ū kūbīība abo bakūluhiagwa.

¹³Nibūlī ū nkenaangūji ikale akūndalahaga ū Mulungu? Nguno ū mu ng'holò yakwe akiwīlaga gīkī, “Atūnibūgīlīja ī yenīyī!”

¹⁴Alīyo ū bebe ūkībonaga īyo īkenhaga makoye na mayanga; īlī mu nkono gwako, wīdimile. Ū ng'wiboneelwa itūūlile mu makono gako; ū bebe ūlī Shiguna-bapīna.[5]

¹⁵Ū munhū wabūbi na wa malofu, mīnzage ū nkono gwakwe; ū būbi bokwe būpalagutage būshile ho pye.

¹⁶Ū SEEBA alī ntemi kūshisha welelo bose, a mahanga a gene gakūshila ū mu sī yakwe.

¹⁷Ee SEEBA, a bidohya ūkabigwaga ū kūlomba kwabo, ūkajiguzuhyaga ī ng'holò jabo, nū kūlīla kwabo ūkakwigwaga;

¹⁸Abo baachīlwa basaabo na a biboneelwa ūkabalwīlīlaga mu būtūngīlīja, ū munhū ūyo alī lūbuubu atizongeja kogohya.