Read Sukuma Bible 2015 – Bibilia Ilagano Lya Kale 2015 Zabuli 102 Bible Online

Zabuli 102 - Sukuma Bible 2015 – Bibilia Ilagano Lya Kale 2015 bible

Zabuli 102

¹Nuhiwa ng'wikanza lya kūnīlīīla SEEBA kūlwa kūgwa ng'holò nguno ya makoye. Ee SEEBA, Kwigwage ū kūlomba kwane, nū kūlīla kwane kūkūpandīke.

²Ū ng'wikanza lya makoye gane yaya ū kūnibisa ū būshū wako; neegelegejage ū gūtū gwako, ūlū nūkwitana ūnishokeje wangū.

³Nguno ī shikū jane jilībīta gītī lyochi, a maguha gane gakūjigaga gītī shitinde.

⁴Ī ng'holò yane īlīsaatwa no, Ī haha īnyaalile gītī maswa, nose nakwībaga nū kūlya ī shilīwa.

⁵Nakūlīlaga mu kūgang'hīla kūtaale no, nose gwashilaga ū mīlī nasaagaga maguha gike.

⁶Ī haha nabange ging'hi ya kū matogolo, natikīlile na ging'hi ja mu mapagale.

⁷Būjikū pe natūpandīkaga ī tūlo, nalī gītī noni ya kwikala yisūtaga iyene ha shisūnzū sha numba.

⁸Līīmi tole a banishi bane bakūnisondagūlaga, a baneeneleja nabo bakūlītūmamīlaga ī lina lyane gītī mhayo gw'izumo.

⁹Nose ī shilīwa shalemile, nalīlya mabu; ū mu shakung'wa shane shilīyūsanganīkīla moi shisoji.

¹⁰Ī yenīyī īlī kūlwa būdaki na būkalī wako, nguno wanisolile ūnibaliga kūle.

¹¹Ī shikū ja būlamu wane jilī gītī nengeeji mu līīmi līkūsalalījaga, nalīnyaala gītī maswa.

¹²Alīyo ū bebe, Ee SEEBA, ūlī ntemi welelo bose, Ī lina lyako līlī lya kūshinga ho shibyalīlwe na shibyalīlwe.

¹³Ūkūbūūka wīyoolekeje shigongo ī Sayuni, nguno ī likanza lya kwīgaliila lyashikaga, lyashikaga ī likanza īlo līhelilwe.

¹⁴Nguno a batūmami bako bagatogilwe no a mawe ga nzengo gwenūyū, pyī nū lūbuubu lwamo balūsaatilwe no.

¹⁵A mahanga gakūlyogoha ī lina lya ng'wa SEEBA, a batemi ba mu sī jose bakūlyogoha ī kūjo lyako.

¹⁶Nguno ū SEEBA akwīzenga hangī ī Sayuni, hūna akwilonga ng'wikūjo lyakwe.

¹⁷Akūkūdīlīla ū kūlomba kwa baluhi, ū kūdaaya kwabo atīko kūkūdalaha.

¹⁸Ī yenīyī ni yandīkagwe kūlwa shibyalīlwe Īsho shikūlondeela, banhū abo bataalī kūseeng'wa balankumīlīje ū SEEBA:

¹⁹“Nguno kūfuma kwigūlya ū ng'wipandī lyakwe lyeela, walolile ī hasī; Ī sī wīkalalīlile kūfuma ng'wigūlū,

²⁰akūdegeleke ū kūgang'hīla kwa batungwa, abo bahelelilwe nsango gwa kūcha abataligūle.”

²¹Hūna ī lina lya ng'wa SEEBA līkūkumūchiwa ū mu Sayuni, nī likūjo lyakwe ū mu Yelusalemu,

²²ūlū bibilinga hamò a banhū, a mabūsugi ūlū gūūmanhya kūnamya ū SEEBA.

²³Ū wei wanīngīgije ī nguzu jane nataalī ng'wikanza lya waalūki, wajigeehije ī shikū ja būlamu wane.

²⁴Hūna lūūlū nakahaya, “Ee Mulungu wane, ūtizūnitīnya ī shikū ja būlamu wane; ū bebe ī myaka yako īlī ya kūshinga ho shibyalīlwe shose pye.”

²⁵A ha wandījo wa yose, bebe ūkītūūlīla nsingi ī sī, nī ligūlū līlī nīmo gwa makono gako.

²⁶Ī shenīshi shikūbīta, alīyo ū bebe ūlī wa kūshinga ho; ī shingī pyī shikūkūlūhala gītī shizwalo. Ūkūshigalūcha gītī ng'wenda, hama shikūbīta shishile ho gete.

²⁷Alīyo ū bebe ūlī gīt'ūmo ūlī dūhū, nī myaka yako ītī na ngelelo.

²⁸A baana ba batūmami bako bakwikala kū būtongi wako shikū jose, ū būbyīle wabo būkwinhwa nguzu kūlī bebe.