Read Sukuma Bible 2015 – Bibilia Ilagano Lya Kale 2015 Zabuli 103 Bible Online

Zabuli 103 - Sukuma Bible 2015 – Bibilia Ilagano Lya Kale 2015 bible

Zabuli 103

¹Zabuli ya ng'wa Daūdi. Ee būpanga wane, nkumīlījage SEEBA, shose pyī īsho shilīmo ū mulī nene, shilīkumīlīje ī lina lyakwe lyeela.

²Ee būpanga wane, nkumīlījage SEEBA, nīyo ūtizūwīība ū wiza ng'holò wakwe.

³Ū wei akakūlekejaga pyī ī shibi shako, nū būlwīle wako ū bose akakūpījaga;

⁴ū būpanga wako akabūkomoolaga kūfuma mu kūcha, na akakūzwīkaga ngikili ya būtogwa na shigongo,

⁵akawigūtyaga shizeeze ū būpanga wako, ū būdinha wako winhwa nguzu mhya gītī ja ng'hoonà.

⁶Ū SEEBA akabalamulaga mu būtūngīlīja na mu ng'hana abo bakiboneelagwa.

⁷Ī nzīla jakwe akajoolecha ū kūlī Musa, nī shītīle shakwe ū kū Baisilaeli.

⁸Ū SEEBA alī nsaatwa wa banhū, na wa shigongo, ndīzu kūpelana na ookalile būtogwa.

⁹Atakūūbīlījaga būhūbi shikū jose, nūūlū atabīkaga nhungī ya būpelanu ilalī.

¹⁰Atatwinhaga nsango gīt'ūmo shiigeleelilwe shibi shise, nūūlū atatūlīpaga kūlenganīla na būkenaagūji wise.

¹¹Nguno ūmo igūlū līlī kūle higūlya ya sī, h'ūmo būlī nū būtaale wa būtogwa wakwe ū kū banhū abo bang'ogohile we.

¹²Ūmo kīya īlī kūle na ng'weli, h'ūmo akashīngījaga nī shibi shise, washiponya kūle shatūsegenela.

¹³Ūmo myaji akabasaatīlagwa baana bakwe, h'ūmo nū SEEBA akabasaatīlagwa abo bang'ogohile we.

¹⁴Nguno agūmanile ūmo gūlī ū mīlī gwise, izūkilwe gīkī tūlī lūbuubu dūhū.

¹⁵Ī shikū ja būlamu wa munhū jibange maswa, akafulumaga wabeelela gītī būlabo wa mu matogolo,

¹⁶ūbo būkafuulagwa nyaga walagala wīnga ho, Ī lipandī lyabo lītīko kūwizūkwa hangī.

¹⁷Alīyo ū būtogwa bo ng'wa SEEBA, būlīho gwa gwa gwa kūlwa shibyalīlwe na shibyalīlwe sha banhū abo bang'ogohile we; nū būtūngīlīja wakwe būlīho kūshisha kū baana ba baana babo,

¹⁸abo balīdimile ī lilagane lyakwe, na bizūkilwe kūshishikīlīja ī shilagīlo shakwe.

¹⁹Ū SEEBA alītūūlile ng'wigūlū ī lisumbī lyakwe lya būtemi, ū būtemi wakwe būsugile hose pye.

²⁰Nkumīlījagi ū SEEBA, pye a bing'we bamalaika bakwe, a bing'we ba nguzu abo mukīshikīlījaga Īyo ayīhayile, na kūgwigwa ū mhayo gwakwe.

²¹Nkumīlījagi ū SEEBA bing'we mabità gakwe gose, bing'we batūmami bakwe, abo mukīītaga kūlenganīla na katogelwe kakwe.

²²Bing'we shiseeng'wa shakwe shose, nkumīlījagi ū SEEBA hose pye ū mu mapandī ga būsugi wakwe. Ee būpanga wane nkumīlījage SEEBA.