Read Sukuma Bible 2015 – Bibilia Ilagano Lya Kale 2015 Zabuli 107 Bible Online

Zabuli 107 - Sukuma Bible 2015 – Bibilia Ilagano Lya Kale 2015 bible

Zabuli 107

¹Nūmbagi ū SEEBA, nguno alī wawiza, ī Kīgongo chakwe shilī sha kūshinga welelo bose.

²A bakomoolwa ba ng'wa SEEBA ni bahayage gīko, abo wabakomoola kūfuma mu nkono gwa nuhya,

³ūbabilinga kwīnga kū sī ningī, kūfuma kīya na ng'weli, kūfuma sukuma na dakama.

⁴Bangī bajaga bakūyūngaga mu matogolo makalamuku, batapandīkile nzīla ya kūbashisha kū nzego gwa kwikala.

⁵Baakoyaga na būtamo na notà, ū būpanga wabo wamalaga ī nguzu.

⁶Aho banīlīīla ū SEEBA kūlwa makoye gabo, akabapīja kwīnga mu būduki wabo;

⁷ūbatongeela mu nzīla ngololoku, kūshisha būpandīka nzengo gwa kwikala.

⁸Ni banumbage ū SEEBA kūlwa būtogwa wakwe ūbo būtashilaga, na kūlwa shītwa shakwe sha kūkumya ū kū banhū.

⁹Nguno abo bakolilwe notà akabinhaga sha kūng'wa bigeja, na a babo balī nzala akabigūtyaga shizeeze.

¹⁰Bamò baalī bigashije mu giiti n'ilundu itaale, mu būtungwa na kūluhiwa nhendele ja chūma,

¹¹kūlwa kwīgomela ī mihayo ya ng'wa Mulungu, na kūbūdalaha ū būganikīji wakwe ūyo Alī Higūlya no.

¹²Būyūminyiwa milīmo midito, ūlū baagwa hasī walī atīho wa kūbagunanha.

¹³Nose bakanīlīīla ū SEEBA kūlwa kūluha kwabo, ng'hana ūbapīja kūfuma ū mu makoye gabo.

¹⁴Ūbīnja ū mu giiti n'ī lilundu ī litaale, nī nhendele jabo ja chūma ūjibīnzagūla.

¹⁵Ni banumbage ū SEEBA kūlwa būtogwa wakwe ūbo būtashilaga, na kūlwa shītīle shakwe sha kūkumya kū banhū.

¹⁶Nguno wabīnzagūlile mibita ya shaba, ūbbutagūla na būgong'ho wa chūma.

¹⁷Bangī baalī bachilū kūlwa būshitiigwa wabo, būyūluha kūlwa būsobya wabo;

¹⁸nī shilīwa būyūlemeelwa ū kūshilya, nose būgwegeela ū mita gwa kūlimu.

¹⁹Aho banīlīīla hangī ū SEEBA kūlwa makoye genayo, ūbapīja ū mu būluhi wabo.

²⁰Akatūma mhayo gwakwe ūbapīja, ūbīnja mu kwihīga kwa kūyagaala.

²¹Ni banumbage ū SEEBA kūlwa būtogwa wakwe ūbo būtashilaga, na kūlwa shītīle shakwe sha kūkumya kū banhū.

²²Leka bafunye shitambò sha kūlūmba, na bashikumūche ī shītwa shakwe mu mīmbo ga būyegi.

²³Bangī bajaga ng'endo ja mu nyanza bo meli, baalī basūlūja mu minzī mingī

²⁴Bashibonaga ī shītwa sha ng'wa SEEBA, Ī milīmo yakwe ya kūkumya īyo īlī mu manyanza mashimu.

²⁵Nguno walagīlaga gwahemba nyaga, gwayūlibangūla mahuuli mataale;

²⁶gayūbaponya ng'wigūlya biza baagwa mu shimu; aho bibona balī mu nhabaala būbbaha.

²⁷Nguno baahuuyembiagwa, na kūlulunguta gītī bakolilwe walwa, baalī batī na gwa kwīta.

²⁸Ū mu kūkoya koya kwabo, nose būnīlīīla ū SEEBA, ūbapīja kūfuma ū mu kūzwangana kwabo.

²⁹Ū nyaga ūgūlembeeja gūhuumūlīja sele, na a mahuuli ga nyanza gūfulīka zugwi.

³⁰Bakayega no aho yabiza sele sele, hūna ūbatongeela būshika ū kū ng'walo ūko bajaga kūkola.

³¹Ni banumbage ū SEEBA kūlwa būtogwa wakwe ūbo būtashilaga, na kūlwa shītīle shakwe sha kūkumya kū banhū.

³²Leka bankūje ū mu kwibilinga kwa banhū, na bankumīlīje mu kwibilinga kwa banamhala.

³³Ū wei akagalūchaga myongo gabiza matogolo makalamuku, ī nzwīlo ja minzī najo jabiza sī ya notà.

³⁴Ī sī ya mhona yagaalūka kūbiza itogolo lya magembya, kūlwa nguno ya būkenaagūji wa bikaji baamo.

³⁵Alīyo hangī akagalūchaga matogolo gabiza malambo ga minzī, ī sī ng'halamuku yokala nzwīlo ja minzī.

³⁶Hūna wabenha abo balī na makoye ga nzala wiza wabatūūla moi, babeeja nzengo gwa kwikala banhū.

³⁷Bayūhamba shilīwa mu malaale, balīma na migūnda ya mizabibu, bapandīka mhona nhaale.

³⁸Kūlwa kūbīīlūkīla jakwe, bakibyalanaga bongeja ū kūkwīla; na a madaale ga mitugo jabo atazunyaga gīkī gageehe.

³⁹Ūlū būgeeha na kūgwa mu magooke nūūlū būpīna, kulwa kwiboneelwa na kūluhiwa,

⁴⁰ū wei akabagwisījaga būdalahwa a basugi babo, hūna wabīīta bayūja bakūtagaalījaga mu matogolo gatī na nzīla.

⁴¹Alīyo abo batī na sha kwigunanhīla, akabagūngūmūlaga wabīnja ū mu būluhiwa, nī kaya jabo wajongeja gītī madaale ga ng'holo.

⁴²A ba nhūngwa jitūngīlīgije bakabonaga bayega, lelo a bakenaagūji bakamumiagwa ī milomo yabo.

⁴³Ūyo alī na masala, ni ayīdīlīlage ī yenīyī, nū būtogwa bo ng'wa SEEBA ūbo būtashilaga awideedeng'hanye mu welwa ng'holò.