Read Sukuma Bible 2015 – Bibilia Ilagano Lya Kale 2015 Zabuli 108 Bible Online

Zabuli 108 - Sukuma Bible 2015 – Bibilia Ilagano Lya Kale 2015 bible

Zabuli 108

¹Lyīmbo. Zabuli ya ng'wa Daūdi. Ee Mulungu, ī ng'holò yane ītūtinginyiwa, nakwīmba nakumīlīje na būpanga wane bose.

²Bing'we ndono na malimba, mishagi; ū nene nakwipuna nalīmishe ī likīngo.

³Ee SEEBA, nakūkūlūmba ng'wibità lya banhū, nakūkūgongoola mu mīmbo ha gatī ya mahanga.

⁴Nguno ū būtogwa wako būlī būtaale, būlī kwigūlya no kūtinda igūlū, ū būsanyiwa wako būshikile kū malunde.

⁵Ee Mulungu, ūgūngūhiwe higūlya no, kūkīla mapandī g'igūlū; nī likūjo lyako lībize higūlya ya sī jose.

⁶Tūgunage na nkono gwako gwa būlyo, nishokejage, bapījiwe a batogwa bako.

⁷Kūfuma ng'wipandī lyakwe lyeela ū Mulungu, wayombile alīhaya gīkī, “Ī Shekemu nakwīgabanhya kūlwa būyegi; nī mbūga ya Sukoti nakwīmeganhya.

⁸Ī Gileadi yane, nī Manase nayo yane; Ī Efulaimu yene ngikili ya kū ntwe gwane, ī Yuda gūlī nang'ha gwane gwa būsugi.

⁹Ī Moabu ibbakuli lyane lya kūkalabīla, Ī Edomu nakwīponekeja shilatū shane; ī Filisti yene nakwītūlīla kaluulu kūlwa būtindi.”

¹⁰Nani akūnishisha ū kū nzengo ūyo gūpīndīlījiwe ndugu? Nani akūnitongeela ū kūja ī Edomu?

¹¹Ūtī bebe Ee Mulungu, ūyo watūponije, na a mabità gise oyile ū kūfuma nago?

¹²Twinhage būdūla wa kūbapyena a banishi; nguno ū būgunanhi wa munhū būtī na ngofyoolo.

¹³Alīyo ūlū tūlī hamò na Mulungu, tūkūpyena, hū ng'wene akūbapandagīla a banishi bise.