Read Sukuma Bible 2015 – Bibilia Ilagano Lya Kale 2015 Zabuli 113 Bible Online

Zabuli 113 - Sukuma Bible 2015 – Bibilia Ilagano Lya Kale 2015 bible

Zabuli 113

¹Nkumīlījagi SEEBA, Ee bing'we batūmami ba ng'wa SEEBA, nkumīlījagi, līkumīlījagi ī lina lya ng'wa SEEBA.

²Līkumīlīji ī lina lya ng'wa SEEBA, kūfuma haha kūshisha welelo na welelo.

³Kwandīja kū būfuma līīmi kūshisha kū būgwīlo walyo, ī lina lya ng'wa SEEBA līkumīlījiwe.

⁴Ū SEEBA alī higūlya ya mahanga gose, nī likūjo lyakwe līlī higūlya y'igūlū.

⁵Nani ūyo alenganīlile nang'hwe ū SEEBA Mulungu wise, ūyo igashije kwigūlya,

⁶ūyo akinamaga ūlū ūhaya kūlīlola Ī ligūlū nī sī?

⁷Hū ng'wene akangūngūmulaga ng'habī, wang'wīnja mu lūbuubu; nū ngayiwa akamūūchaga wang'wīnja h'itūūgo lya mabu.

⁸Akabigashaga hamò na batongeeji, hamò na basugi ba banhū bakwe.

⁹Hū ng'wene ūyo akang'winhaga kaya nkīma ngūmba, wabiza myaji wa baana ba būyegi. Nkumīlījagi SEEBA.