Read Sukuma Bible 2015 – Bibilia Ilagano Lya Kale 2015 Zabuli 118 Bible Online

Zabuli 118 - Sukuma Bible 2015 – Bibilia Ilagano Lya Kale 2015 bible

Zabuli 118

¹Nūmbagi SEEBA, īkī alī wawiza; nguno ī Kīgongo chakwe shilī sha kūshinga welelo bose.

²A Baisilaeli ni bahayage gīkī, “Ū būtogwa wakwe būlī wa kūshinga welelo bose.”

³A ba mu numba ya ng'wa Alooni ni bahayage, “Ū būtogwa wakwe būlī wa kūshinga welelo bose.”

⁴Abo bang'ogohile ū SEEBA ni bahayage gīkī, “Ū būtogwa wakwe būlī wa kūshinga welelo bose.”

⁵Ū mu būluhi wane nakanīlīīla ū SEEBA, ū SEEBA nang'hwe ūniigwa, ūnitungūla.

⁶Ū SEEBA ūlū alī kū lwandī lwane, natīko kogoha, ū munhū akūnīīta kī?

⁷Ū SEEBA alī hamò nane kūlwa kūnigunanha, a banishi bane nakūbalola na liso lya nyapyeni.

⁸Īlī chiza no ū kūnsanya SEEBA kūtinda kūng'wisagīlwa munhū.

⁹Īlī chiza no ū kūnsanya SEEBA kūtinda kūbisagīlwa basugi.

¹⁰Banhū ba mahanga gose bakanigobanīla, alīyo nakabahūlūla mu lina lya ng'wa SEEBA.

¹¹Bakanigobanīla mhandī jose, alīyo nūbahūlūla mu lina lya ng'wa SEEBA.

¹²Bakaniibbūpa gītī nzūkī, alīyo būyūshila gītī masanzu gakūbabagwa moto; na ng'hana nakabahūlūla mu lina lya ng'wa SEEBA.

¹³Bakanikandīkīja no, būsangwa banidedya, alīyo ū SEEBA ūnigunanha.

¹⁴Ū SEEBA alī nguzu jane na lyīmbo lyane, hū ng'wene alī būpīji wane.

¹⁵Ū mu ng'hambī ja batūngīlīja gakūyoganyaga malaka ga būpyeni na mhūndū ja būyegi; gakūhayaga, “Ū nkono gwa būlyo go ng'wa SEEBA gwītile mitaale!

¹⁶Ū nkono gwa būlyo go ng'wa SEEBA gwenhile būpyeni; na ng'hana ū nkono gwa būlyo go ng'wa SEEBA gwītile mitaale!”

¹⁷Natūcha yaya, nakwikala nalī mpanga, nīyo nakwīkumūcha no īyo wīyītīle ū SEEBA.

¹⁸Ū SEEBA wanihūgūlile hataale no, alīyo ataniponije mu kūcha.

¹⁹Nilugūlīlagi ī mibita ya būtūngīlīja, nabītīle ng'wenūmo nakankumīlīje ū SEEBA.

²⁰Ūyū hū gwene ū mita go ng'wa SEEBA, h'aho bakwingīlīla a batūngīlīja.

²¹Nakūkūlūmba nguno wanishokegije, wabizile būpīji wane.

²²Ī liwe īlo bakalīlema bazengi, h'īlo lyabizile lya kwīgoloolela ī numba.

²³Ū mhayo gwenūyū gūfumile kūlī SEEBA, nīyo gūlī gwawiza no ū mu miso gise.

²⁴Ū lūshikū lwenūlū lūbeejiwe na SEEBA, tūyegelagi mo na tūsangabale.

²⁵Ee SEEBA, tūlīkwikūmbīlīja ūtūpīje, Ee SEEBA, tūlīkwikūmbīlīja ūtwinhe kwīlūkīlwa.

²⁶Akumīlījiwe ūyo aliza mu lina lya ng'wa SEEBA. Tūlīkūkumīlīja kūfuma mu numba ya ng'wa SEEBA.

²⁷Ū SEEBA alī Mulungu, hū ng'wene watwenhelile isana. Beejagi shigukulu, mubūūche matambī muje mukūhūnjaga mukashike kū ng'walīlo.[27]

²⁸Ūlī Mulungu wane, nakūkūlūmba; ūlī Mulungu wane, nakūkūkumīlīja.

²⁹Nūmbagi ū SEEBA, nguno alī wawiza; ī Kīgongo chakwe shilī sha būja na būja.