Read Sukuma Bible 2015 – Bibilia Ilagano Lya Kale 2015 Zabuli 119 Bible Online

Zabuli 119 - Sukuma Bible 2015 – Bibilia Ilagano Lya Kale 2015 bible

Zabuli 119

¹Balī na abo nhūngwa jabo jitī na shilingo, abo bakashimīzīlaga mu shilagīlo sha ng'wa SEEBA.

²Balī na abo babūdimile ū būkaanīji wakwe, abo bakankoobaga na ng'holò yose;

³abo batīītaga ya malofu, alīyo bakashimīzīlaga mu nzīla jakwe.

⁴Ū bebe ūtūūlile ho kahūgūlīle, ako kigeleelilwe kūlondeelwa.

⁵Gīt'ūlū ni jabiza jigoloolile ī nzīla jane, ni nadūla ū kūshidima ī shilagīlo shako.

⁶Ū mu gīko ni naleka ū kūding'wa soni; nguno ya kūshikūja pyī ī shilagīlo shako.

⁷Nakūkūkumīlīja mu ng'holò ngololoku ūlū nilanga a kalamulīle kako ka būtūngīlīja.

⁸Nakūshimīzīla ū mu katongeelele kako, ūtizūnileka gete najimīīle.

⁹Ū ng'walūki adūgije kūjilang'hana mu kinehe ī nzīla jakwe jikale neela? Mu nzīla ya kikalīle ka kūtongeelwa na mhayo gwako.

¹⁰Nalīkūkooba na ng'holò yane yose, ūtizūnileka nakatagaalīja nīnge ū mu shilagīlo shako.

¹¹Ū mhayo gwako nagūbīkile ū mu ng'holò yane natizūkwītīla shibi ū bebe.

¹²Ūkumīlījiwe, Ee SEEBA; nilangage ī shilagīlo shako.

¹³A kalamulīle ka kūfuma kūlī bebe, a kose nakūkakumūchaga na nomo gwane.

¹⁴Nakayegaga no ū kūshimīza mu katongeelele ka būkaanīji wako, gīt'ūmo būlī būyegi wa nsabi wa shikolo shose.

¹⁵Ū būhūgūji wako nakawideedeng'hanyaga no, nī nzīla jako nakūjikalalīla mu welwa ng'holò.

¹⁶Nakūyega no ū kūbiza ha sīlīlī ya katongeelele kako, natīko kūgūdalaha ū mhayo gwako.

¹⁷Nigaliilage ū nene ntūmami wako, hū nakūdūla kwikala nalī mpanga, nū mhayo gwako nakūgūdima.

¹⁸Niloleechage a miso gane, nashibone ī shakūkumya sha mu malange gako.

¹⁹Ū nene nalī ngeni ū mu sī, ūtizūnibisa ī shilagīlo shako;

²⁰Ū būpanga wane makanza gose būkūminyiagwa ng'hūmbū ja kūbona kalamulīle kako.

²¹Bebe h'ūyo ūkabahamaga a badooshi abo bazumilwe, abo bakīngaga mu shilagīlo shako.

²²Nīngījage ū wibengelejiwa nū būdalahījiwa, nguno nabūdimile ū būkaanīji wako.

²³Nūūlū bakigasha kūnisīīga a basugi, nahene ū nene ntūmami wako nakūshiideedeng'hanya ī shilagīlo shako.

²⁴Ū būkaanīji wako būkaniyejaga, hangī nīyo būlī na būhūgūji ū kūlī nene.

²⁵Ū būpanga wane būlīgalagala mu lūbuubu, nihīmbūūchage na mhayo gwako.

²⁶Aho najisomboola ī nzīla jane ūkaniigwa, nilangage ī shilagīlo shako.

²⁷Nigunage nawitegeleje ū būhūgūji wako, hū nakūdūla kūshiideedeng'hanya ī shītīle shako sha kūkumya.

²⁸Ū būpanga wane būlīshila kūlwa būpīna, niguzuhyage na mhayo gwako.

²⁹Nilang'hanage natizūgwa mu nhūngwa ja nyalomolomo, nichīlage shigongo ūnilange ī shilagīlo shako.

³⁰Naasolile gwa kūshimīzīla mu ng'hana, nū būlamuji wako būkūnitongeelaga gwa.

³¹Ee SEEBA, ū būkaanīji wako nadimanile nabo, ūtizūnileka nakagooka.

³²Nakūpeela nhambbo nalī mu shilagīlo shako, nguno ī ng'holò yane wīyinhile wiyaabī.

³³Ee SEEBA, nilangage ī nzīla ya shilagīlo shako, nane nakūshimana kūshisha kū ngelelo.

³⁴Ninhage witegeleja, nane nakūgadima a malange gako; nīyo nakūgalondeela na ng'holò yane yose.

³⁵Nitongeelage ū mu nzīla ya shilagīlo shako, nguno nakapandīkīlaga būyegi būtaale moi.

³⁶Īgalūchage ī ng'holò yane īlolele kū būkaanīji wako, ītī kū nhūngwa ja kwikūmvwa sabo.

³⁷Gagalūchage a miso gane gīnge ū mu kwiloleela shikolo shitī na solobo, hama ūnīīte kūbiza mpanga ū mu nzīla yako.

³⁸Ū nene ntūmami wako nishikīlīgījage ū kwisagīja kwako, gīt'ūmo ūkabinhīlaga abo bakogohile.

³⁹Nīngījage ī minala īyo īnogohije, nguno a kalamulīle kako kalī kawiza.

⁴⁰A kahūgūlīle kako nalī na ng'hūmbū no nako, būhīmbūūchage ū būpanga wane kūlwa būtūngīlīja wako.

⁴¹Ee SEEBA, ū būtogwa wako ni būnipandīkage nū nene, ū būpīji wako gīt'ūmo kūlī kwisagija kwako;

⁴²hū nakūdūla kūnshokeja ū ndalahi wane, nguno ū mhayo gwako hū gwene nagūsendamīlile.

⁴³Ūtizūgwīnja ū mhayo gwa ng'hana ū mu nomo gwane, nguno a kalamulīle kako h'ako nakisagīlilwe.

⁴⁴A malange gako nakūgadima gwa, kūshisha welelo na welelo.

⁴⁵Nakūshimīnzīla mu wiyaabī, nguno nakūbūkoobaga ū būhūgūji wako.

⁴⁶Nū būkaanīji wako nakūbūsomboola kū būtongi wa batemi, natīko kūding'wa minala,

⁴⁷nguno ī shilagīlo shako nashiyegelile, Īkī nashitogilwe.

⁴⁸Nakūgoloola makono gane nashanukūle Ī shilagīlo shako īsho nashitogilwe no; na a katongeelele kako nakūkideedeng'hanya.

⁴⁹Gwizūkagwe ū mhayo gwako ūyo ūkaniwīla nene ntūmami wako, nguno gūkaninha kwisagīlwa.

⁵⁰Ū mhayo ūyo gūkūnilūngūjaga mu būluhi wane gūlī gīkī, ū kwisagīja kwako kūkūniguzuhyaga ū mu būpanga wane.

⁵¹A bikumīlīja bakūnisondagūlaga no, alīyo ū nene natīko ū kūshileka ī shīlagīlo shako.

⁵²Ee SEEBA, ū būlamuji wako būlīho kūfuma kale na kale, ūlū nawiganika nakūlūngūjaga.

⁵³Nakūpelanaga no ūlū nabiganika a bahūnga, abo batagadīlīīlaga a malange gako.

⁵⁴Ū nene ī shilagīlo shako h'ī lyīmbo lyane, lya kwīmba būlī kwene ūko nūūkatūūla ng'hambī.

⁵⁵Ee SEEBA, būlī gwa ī būjikū nakalizūkagwa Ī lina lyako; nī shilangīlo shako nashidimile.

⁵⁶Ū kūshimīzīla mu kahūgūlīle kako hū mhayo ūyo gūkūninhaga ū nene.

⁵⁷Ee SEEBA, ū bebe ūl'inong'ho lyane, ū kwisagīja kwane kūlī gīkī, Ī mihayo yako nakwīdima.

⁵⁸Nalīkūlomba na ng'holò yane yose, nichīlage shigongo ūmo kūlī kwisagīja kwako.

⁵⁹Naajiideedeng'hanije ī nzīla jane nūgalūka, Ī mhambala jane jilī mu katongeelele kako.

⁶⁰Naakangīlīgije no, natatogilwe ū kūdīīla ū kūshishikīlīja ī shilagīlo shako.

⁶¹A ba malofu nūūlū būnitaligīnja ngoye jabo, nahene natīko ū kūshīība ī shilangīlo shako.

⁶²Nūūlū būjikū ha gatī nakabūūkaga kūkūkumīlīja, kūlwa būtūngīlīja wa kalamulīle kako.

⁶³Abo balī na logohano kūlī bebe, h'abo nalī na būsangī nabo; abo bakashimīzīlaga mu kahūgūlīle kako.

⁶⁴Ee SEEBA, ī sī yokalile būtogwa wako, nilangage ī shilagīlo shako.

⁶⁵Ee SEEBA, ū nene ntūmami wako wanigaliilile no, kūlenganīla na mhayo gwako.

⁶⁶Nilangage witegeleja na kalamulīle kawiza, nguno nashizunije ī shilagīlo shako.

⁶⁷Aho naalī nataalī kūluha naalī najimīlile, alīyo ī haha naagūdimile ū mhayo gwako.

⁶⁸Ūlī wawiza no, nī yīyo ūkīyītaga misoga, nilangage nashimane ī shilagīlo shako.

⁶⁹A bikumīlīja bakūnibyaagījaga mihayo mu kūnilembekeja, alīyo ū nene nabūdimile ū būhūgūji wako na ng'holò yane yose.

⁷⁰Ī ng'holò jabo jibambīlile gītī mhaama, alīyo ū nene nashiyegelile ī shilagīlo shako.

⁷¹Yabeelelile ū nene ū kūluha, nguno hū nakwilanga a katongeelele kako.

⁷²A malange ga kūfuma mu nomo gwako galī masoga no ū kūlī nene, kūtinda shihūmbī shingī sha feza na zahabu.

⁷³A makono gako gaanibeeja, hū gene gaanibūmba; ninhage witegeleja nadūle ū kūshiilanga ī shilagīlo shako.

⁷⁴Abo bakogohile bakūyūnibona baayega, nguno ū mhayo gwako h'ūyo nagwisagīlilwe.

⁷⁵Ee SEEBA, namanile gīkī ū būlamuji wako būtūngīlīgije, na gīkī ūkaniluhya mu ng'hana.

⁷⁶Ū būtogwa wako būlī wa būja na būja, ni būnilūngūjage gīt'ūmo kūlī kwisagīja kwako ū kūlī nene ntūmami wako.

⁷⁷Ī shigongo shako ni shiniihoolekelage nadūle kūbiza mpanga, nguno ī shilagīlo shako shīlī būyegi wane.

⁷⁸Leka bagooke a bikumīlīja, nguno bakūnīītīlaga ītigeleelilwe nū mhayo gūtīho, alīyo ū nene nakongeja kūwideedeng'hanya ū būhūgūji wako.

⁷⁹Abo bakogohile ni banishokelage, abo bawitegelegije ū būkaanīji wako.

⁸⁰Ī ng'holò yane ni ībizage ītī na shisembo ū mu katongeelele kako, natizūgwa mu magooke.

⁸¹Ū būpanga wane būlī na ng'hūmbū no ja kūbona būpīji wako, nīyo ū mhayo gwako h'ūyo nagwisagīlilwe.

⁸²A miso gane nose gaanogaga ū kwikala galolile mu kūlindīīla kwisagīja kwako; nakwibūjaga, “Ūkūnilūngūja nanalī?”

⁸³Nguno nose nūmile kūlū kūlū gītī ng'hoomele ha lyochi;[28] alīyo nahene nataalī ū kūshīība Ī shilagīlo shako.

⁸⁴Nakwiyūmīlīja kūshisha nanalī, ū nene ntūmami wako? A balūhya bane ūkūbagwisīja nanalī ū nsango gwabo?

⁸⁵A bikumīlīja baanisīmbīlile machongo gīkī nagwīle mo, banhū abo batashimīzīlaga mu malange gako.

⁸⁶Ī shilagīlo shako pyī ī shose shilī sha kūsanyiwa, bakūniluhyaga nū mhayo yaya; nigunage.

⁸⁷Baalī basaagije hado banikale gete ū mu sī, alīyo nahene nataalī ū kūwība ū būhūgūji wako.

⁸⁸Kūlwa būtogwa wako būlang'hanage ū būpanga wane, hū nakūgūdima ū mhayo gwa kūfuma kūlī bebe.

⁸⁹Ee SEEBA, ū mhayo gwako gūlī gwa welelo na welelo, gwīmīīlile kūlwa būdūla bo ng'wigūlū.

⁹⁰Ū būsanyiwa wako būlī wa kūshinga ho shibyalīwe shose; ī sī yīmīīlile na nguzu, wīhandatīgije bebe.

⁹¹Ī shose shilīho shīmīīlile kūshisha lelo, nguno pyī ī shikolo shikakūtūmamīlaga bebe.

⁹²Ū nene ūlū ni ītī kūyegela shilagīlo shako, ū būluhi ni wanibūlaga kale.

⁹³Natīko kūwība ū būhūgūji wako na hado yaya, nguno ū mu gīko ū būpanga wane ūkūwītaga kūbiza būpya.

⁹⁴Ū nene nalī wako, nipījage; nalī na ng'hūmbū no nako a kahūgūlīle kako.

⁹⁵A babūbi bakwikalaga baniibandīīle, nguno batogilwe kūnikenaagūla; alīyo ū nene a maganiko gane galī kū būkaanīji wako.

⁹⁶Naabonile gīkī būlī shikolo shilī na ngelelo yasho, shilagīlo shako dūhū h'īsho shilī na būgalī galī būtī wa kūkalīchiwa.

⁹⁷Ū nene nagatogilwe no a malange gako, nakadīīlaga līīmi ji nakūgideedeng'hanyaga.

⁹⁸Ī shilagīlo shako shikanīītaga kūbiza na masala kūbaheeba a banishi bane, nguno natalekanaga nasho.

⁹⁹Ū nene nalī na būmani būtaale no kūtinda pye a balangi bane, nguno ū wideedeng'hanya wane būsugilwe na būkaanīji wako.

¹⁰⁰Nalī na witegeleja kūtinda wa banamhala, nguno nīmīīlile mu kahūgūlīle kako.

¹⁰¹Ī mhambala jane najilang'hanile ū kūshimīzīla mu būlī nzīla jabūbi, gīkī nadūle kūgūdima ū mhayo gwako.

¹⁰²A kalamulīle kako natīko kūkinhīla ngongo, nguno bebe ng'wenekīlī hū ūlī nangi wane.

¹⁰³Ī mihayo yako minonu no ū kūlī nene, kūtinda būnonu wa būūkī ū mu nomo gwane.

¹⁰⁴A kahūgūlīle kako kakaninhaga witegeleja, na lūūlū pyī ī ya nyasala sala nīkolilwe.

¹⁰⁵Ū mhayo gwako gūlī talà kū mhambala jane, n'isana ū mu nzīla yane.

¹⁰⁶Naamalile kūlahīla nizunīlīja, gīkī nakūshimīzīla mu būlamuji wako nguno būtūngīlīgije.

¹⁰⁷Ee SEEBA, nalī mu būluhi no; nigunage ū būpanga wane kūlenganīla na mhayo gwako.

¹⁰⁸Ee SEEBA, shanukūlage ī shakwinha shane, h'ū kūkumīlīja kwane; hama ūnilange kalamulīle kako.

¹⁰⁹Ng'hangala ningī nakūbūdimīīlaga mu nkono ū būpanga wane, alīyo natīko kūshīība ī shilagīlo shako.

¹¹⁰A babūbi baanitegile ntego, kwike ū nene natīko kwīnga ū mu kahūgūlīle kako.

¹¹¹Ī mihayo yako būlī wingīji wane welelo bose, h'ī yene īkaninhaga būyegi ū mu ng'holò yane.

¹¹²Ī ng'holò yane īlī na būyegi no ū kūshishikīlīja ī shilagīlo shako, kūshisha kū ng'halīkījo ya yose.

¹¹³A banhū ba magalū galū natabatogilwe, alīyo ī shilagīlo shako nashitogilwe.

¹¹⁴Ū Bebe ūlī ibūngīlo na lūmūda lwane, ū kwisagīlwa kwane kūsendamīlile ha mhayo gwako.

¹¹⁵Bing'we bīīti ba shibi, nīngīlagi; ū nene natogilwe kūshimīzīla mu shilagīlo sha ng'wa Mulungu wane.

¹¹⁶Nihandatījage gīt'ūmo kūlī kwisagīja kwako, nadūle kwikala nalī mpanga; ūtizūnilekanīja nabize gītī nakwisagīlagwa mabu ng'wizungu, nakūgooka.

¹¹⁷Nidimage nakwikala mhola, nadūle kūshimīzīla mu katongeelele kako.

¹¹⁸Bose abo bakatagaalījaga bīnga ū mu shilagīlo shako, ūkabaponyaga; nguno bakilembaga mu mihayo īchile.

¹¹⁹A babūbi a bose ūkabapyagūlaga ū mu sī gītī mapalala, h'ī chene ū nene nabūtogilwe ū būkaanīji wako.

¹²⁰Ū mīlī gwane gūkūdetemaga kūlwa lyogohya lyako, nabogohile no ū būlamuji wako.

¹²¹Īyo nīītile ītūngīlīgije, hangī īgoloolile; ūtizūnilekanīja mu makono ga baluhya bane.

¹²²Ū nene ntūmamī wako nimanīkījage hape Ī gīkī nakwikala mhola, ūtizūnilekanīja banitobe a biboneeji.

¹²³A miso gane nose gaamalaga ī nguzu kūlwa kwikala nalolile mu kūwisagīlwa ū būpīji wako, nū wisagīja wako ūbo būtūngīlīgije.

¹²⁴Ū nene ntūmami wako nigaliilage kūlenganīla na būtogwa wako, ūnilange nī shilagīlo shako.

¹²⁵Ū nene nalī ntūmani wako; ninhage witegeleja, nabūmane ū būkaanīji wako.

¹²⁶Ee SEEBA, īlī h'ī likanza lyako lya kwīta mhayo, nguno a malange gako galīkenaagūlwa.

¹²⁷Ū nene īkī nashitogilwe ī shilagīlo shako kūtinda zahabu, nūūlū zahabu īyo īgusilwe chiza,

¹²⁸nīyo hangī īkī ū būhūgūji wako nawisaabile pye ū bose gīkī būtūngīlīgije, ī nzīla ja malofu najikolilwe jose pye.

¹²⁹Ū būkaanīji wako būlī wa kūkumya no, h'ī chene nakashikīlījaga ūmo būhayīlile.

¹³⁰Ī mihayo yako ūlū yūkundūlwa hape, Īkenhaga isana, īlo līkang'winhaga witegeleja ngaya masala.

¹³¹Ū nomo gwane gwasamaga nalīpīmīla kūlwa kūhahaalīla shilagīlo shako.

¹³²Nigalūkīlage ūnichīle shigongo, ūmo ūkīītīlaga kū bose abo balītogilwe ī lina lyako.

¹³³Nitongeelage ū mu kashimīzīle kane kūlenganīla na mhayo gwako, ūtizūnileka nakasugwa na shibi.

¹³⁴Nipījage ū mu wiboneeji wa banhū, nadūle kūbūdima ū būhūgūji wako.

¹³⁵Ū būshū wako ni būnakīīlage ū nene ntūmamī wako, nī shilagīlo shako ūnilange.

¹³⁶A miso gane gakūsejaga shisoji gītī myongo, nguno ī shilagīlo shako shitūdimagwa.

¹³⁷Ee SEEBA, ū bebe ūlī ntūngīlīja; na a kalamulīle kako katūngīlīgije.

¹³⁸Ū mhayo ūyo ūgūtūūlile ho gūtūngīlīgije, hangī gwigeleelilwe kūsanyiwa gete.

¹³⁹Ū wilu wane būlīniminya no, nguno a baluhya bane bakwīdalahaga ī mihayo yako.

¹⁴⁰Ū kwisagīja kwako kūmanīkile kūlī kwa ng'hana, h'ī chene ū nene ntūmami wako nakūtogilwe.

¹⁴¹Na ng'hana ū nene nalī ndo no, nīyo nalī nadalahilwe; alīyo natawībaga ū būhūgūji wako.

¹⁴²Ū būtūngīlīja wako būlī bo kūshinga ho welelo bose, nī shilagīlo shako shilī sha ng'hana.

¹⁴³Ī haha nalī mu makoye na būpīna, alīyo ī shilagīlo shako nashiyegelile no.

¹⁴⁴Ū būkaanīji wako būtūngīlīgije shikū jose, ninhage witegeleja nikale nalī mpanga.

¹⁴⁵Nalīīlīla na ng'holò yane yose; niidīkage, Ee SEEBA, nakūshidima ī shilagīlo shako.

¹⁴⁶Nalīkūlīlīīla, nipījage; na nakūbūdima ū būkaanīji wako.

¹⁴⁷Dilū mu makingo nakwipunaga kūlīla kūlwa kūkooba būgunwa, ū mhayo gwako h'ūyo nagwisagīlilwe.

¹⁴⁸Nakūkeyulaga būjikū pe nalī miso, nakūwideedeng'hanyaga ū wisagīja wako.

¹⁴⁹Ee SEEBA, liigwage ī lilaka lyane kūlwa būtogwa wako, ū būpanga wane winhage nguzu mhya kūlenganīla na kalamulīle kako.

¹⁵⁰A babeeja ba long'we ja mihayo mibi balī hihī no, a malange gako balī kūle no nago.

¹⁵¹Alīyo ū bebe, Ee SEEBA, ūlī hihī nū nene, nī shilagīlo shako ī shose shilī sha ng'hana.

¹⁵²Kūfuma kale nilanga kwīngīīla mu būkaanīji wako, gīkī ī shilagīlo shako ūshihandatīgije bebe ng'wenekīlī kūshisha welelo bose.

¹⁵³Kūlolage ū kūluhiwa kwane ūnipīje, nguno natīko ū kūgīība a malange gako.

¹⁵⁴Nigunage ūnipīje, ū būpanga wane winhage nguzu mhya, kūlenganīla na kwisagīja kwako.

¹⁵⁵A babūbi balī kūle no nabo ū būpīji, nguno a katongeelele kako batakakoobaga.

¹⁵⁶Ee SEEBA, ī shigongo shako shitaale no, ū būpanga wane winhage nguzu mhya, kūlenganīla na kalamulīle kako.

¹⁵⁷A banishi bane abo bakūniluhyaga balī bingī no, alīyo ū nene natūbūleka ū būkaanīji wako.

¹⁵⁸Abo batī na kūzunya bakanisaayīchaga no, nguno batagūdīlīlaga ū mhayo gwako.

¹⁵⁹Ee SEEBA, izūkagwa ūmo nabūtogelilwe ū būhūgūji wako, būlang'hanage ū būpanga wane kūlenganīla na būtogwa wako.

¹⁶⁰Ī mihayo yako ī yose īlī ya ng'hana, nū būlamuji wako būlī wa kūshinga ho welelo na welelo, hangī pyī ū bose būtūngīlīgije.

¹⁶¹Basugi bakūniluhyaga nū mhayo ndūhū, alīyo ī ng'holò yane īlī na logohano ūlū nalī kū būtongi wa mhayo gwako.

¹⁶²Ū nene nagūyegelile no ū mhayo gwako, git'ūmo munhū akayegaga kūlwa kūpandīka nding'wa mu būlūgū.

¹⁶³Ū būlomolomo nabūkolilwe, hangī nabūbbyedile no; alīyo a malange gako nagatogilwe.

¹⁶⁴Būlī lūshīkū nakakūkumīlījaga ng'hangala mpungatī, kūlwa nguno ū būlamuji wako būtūngīlīgije.

¹⁶⁵Abo bagatogilwe a malange gako balī na mhola ningī no, nīyo shitīho sha kūbipamya.

¹⁶⁶Ee SEEBA, ū būpīji wako nawisagīlilwe, nī shilagīlo shako nakashishikīlījaga.

¹⁶⁷Ū būkaanīji wako nabūdimile, na hangī nabūtogilwe nīyo no.

¹⁶⁸Ū būhūgūji nū būkaanīji wako nabūdimile, nguno ī nzīla jane jose jilī kū būtongi wako.

¹⁶⁹Ee SEEBA, ū kūlīla kwane ni kūshikage kū būtongi wako; ninhage witegeleja kūlenganīla na mhayo gwako.

¹⁷⁰Ū kwikūmbīlīja kwane ni kūshikage kū būtongi wako; nipījage kūlenganīla na kwisagīja kwako.

¹⁷¹Ū nomo gwane gūkūpumunha būgongooji wingī, nguno hū bebe ūkanilangaga ī shilagīlo shako.

¹⁷²Ū lūlīmi lwane lūkwīmba kūgūkumūcha ū mhayo gwako, nguno pyī ī shilagīlo shako shitūngīlīgije.

¹⁷³Ū nkono gwako ni gūnigunage, nguno naasolile gwa kūlondela kahūgūlīle kako.

¹⁷⁴Ee SEEBA, nalī na ng'hūmbū na būpīji wako, na a malange gako hū būyegi wane.

¹⁷⁵Nilekage nikale mpanga nakūkumīlīje, ū būlamuji wako h'ūbo būnigune.

¹⁷⁶Nakūtagaalījaga gītī ng'holo ījimīīlile, nikoobage ū nene ntūmami wako, nguno nataalī ū kūshīība ī shilagīlo shako.