Read Sukuma Bible 2015 – Bibilia Ilagano Lya Kale 2015 Zabuli 12 Bible Online

Zabuli 12 - Sukuma Bible 2015 – Bibilia Ilagano Lya Kale 2015 bible

Zabuli 12

¹Kūlī ntongeeji wa bīmbi; ng'wilaka lya Sheminisi. Zabuli ya ng'wa Daūdi. Nigunage, Ee SEEBA, nguno a ba logohano kūlī Mulungu baashilile; Ī haha batīho a batūngīlīja ū mu banhū.

²Būlī ng'wene nomolomo kūlī nzenganwa ng'wiye, Ī milomo yabo yokalile mihayo ya būbboodeleja, na kwikala bakūyombaga ya kūlembagūla banhū.

³Ū SEEBA akwīkenaagūla pyī ī milomo Īyo īkabboodelejaga, nī ndīmi ījo jikikalaga jikumīlīja;

⁴abo bakikumīlījaga balīhaya gīkī, “Ī ndīmi jise jikūtūmama tūkūpyena dūhū, nī milomo yise īlīho, nani akwikala watūhehenajaga?”

⁵Ū SEEBA alīhaya gīkī, “Kūlwa kwiboneelwa kwa bagokolo, na kūgang'hīla kwa baluhi, Ī haha nakwīmīīla nabalang'hane, ū ng'wibonya atizikala abasheedekegije.”

⁶Ī mihayo ya ng'wa SEEBA īlī myeela, Īlī myeela gītī feza yeejiwe mu moto, īyo yeejiwa ng'hangala mpungatī.

⁷Ee SEEBA, ūkūtūlang'hana bebe, hū bebe ūkūtūkīngītīīla ū kū shibyalīlwe īshi.

⁸Ī nhūngwa ja malofu ūlū jūsuga ū mu banhū, a bahūnga bakayeelaga mu kwiyagaalūla.