Read Sukuma Bible 2015 – Bibilia Ilagano Lya Kale 2015 Zabuli 122 Bible Online

Zabuli 122 - Sukuma Bible 2015 – Bibilia Ilagano Lya Kale 2015 bible

Zabuli 122

¹Lyīmbo lya ng'wa Daūdi, ng'wikanza lya kūlamya. Nakayega no aho baniwīla gīkī, “Tujage kū numba ya ng'wa SEEBA.”

²Ee Yelusalemu, tūlī mu mibita yako twīmīīlile na mhambala jise.

³Ī Yelusalemu gūlī nzengo ūyo gūzengilwe gūhelwa chiza, gūūdimanile gūbiza na nguzu.

⁴Ū kwenūko h'ūko jikalinhaga ng'anda, Ī ng'anda ja banhū ba ng'wa SEEBA kūja kūlīkumīlīja lina lya ng'wa SEEBA, kūlenganīla na mhayo ūyo akang'winha Isilaeli.

⁵H'ūko galī a masumbī ga kūlamulīla, masumbi ga būtemi ga numba ya ng'wa Daūdi.

⁶Gūlombelagi mhola ū nzengo gwa Yelusalemu: “Abo bakūtogilwe ū bebe babize mu mhola.

⁷Ū mu gatī yako habize halembeelile, nū mu numba jako ībize mo mhola.”

⁸Kūlwa nguno ya badūgū bane na banwani bichane, nakūhaya gīkī, “Leka ībize ho mhola ū mulī bebe!”

⁹Kūlwa nguno ya numba ya ng'wa SEEBA Mulungu wise, ū bebe nakūkūkoobela yawiza.