Read Sukuma Bible 2015 – Bibilia Ilagano Lya Kale 2015 Zabuli 124 Bible Online

Zabuli 124 - Sukuma Bible 2015 – Bibilia Ilagano Lya Kale 2015 bible

Zabuli 124

¹Lyīmbo lya ng'wa Daūdi, ng'wikanza lya kūlamya. Ū SEEBA ūlū atī kū lwandī lwise, ū Isilaeli ni ayombage,

²ū SEEBA ūlū ni walī atī kū lwandī lwise, aho banhū bakatūūbūkīla,

³ū būpelanu wabo aho waabakaga gītī moto kūlwa nguno yise, ni baatūmila būlala tūlī bapanga.

⁴Ī lihūūma ni lyatūpyagūla, ū būpanga wise ni waja na myongo ya minzī.

⁵Mahuuli ga myongo ni gatūbītīla gūtūjaana.

⁶Ū SEEBA akumīlījiwe ūyo atatūlekanīgije batūsaasagūle na mino gabo.

⁷Twapūlūgūkile gītī noni mū ngono gwa bategi, ū ngono gwatandagūlilwe, nise tūpūlūgūka.

⁸Ū būgunanhwa wise būlī mu lina lya ng'wa SEEBA, ū Meeja w'igūlū na sī.