Read Sukuma Bible 2015 – Bibilia Ilagano Lya Kale 2015 Zabuli 129 Bible Online

Zabuli 129 - Sukuma Bible 2015 – Bibilia Ilagano Lya Kale 2015 bible

Zabuli 129

¹Lyīmbo ng'wikanza lya kūlamya. Baaniluhya no kūfuma ha būdo wane; ū Isilaeli ni ahayage gīkī,

²“Na ng'hana baniluhya kūfuma ha būdo wane, alīyo nahene bataalī ū kūheeba.

³Balīmi bakūnigūndagūlaga a ha ngongo gwane, Ī haha baalīmile ho mandī gabo malīhu no.”

⁴Kwike ū SEEBA ng'wene ntūngīlīja, wajitīnagūlile ī ngoye ja bakenaagūji.

⁵Leka bagooke pye abo bīkolilwe ī Sayuni, nīyo bashoshiwe kū numa.

⁶Babize gītī maswa gazwile higūlya y'itembe, ayo gakanyaalaga gataalī nū kūkūla;

⁷nūūlū ng'wipi atīko kūpandīka ga kwigela mu shiganza, pyī nūūlū ntungi wa miligo atīko kūpandīka ga kūbūūcha mu nkono gwakwe.

⁸Abo balayūbīta haho hihī batizūdūla kūhaya gīkī, “Ī ja ng'wa SEEBA jibize hamò nang'ho, tūlīkūfuuha mu lina lya ng'wa SEEBA.”